LAMKALTU 18 - Laibaibal Thiang (BSI)

¹ Cuthil hna hnu ah Paul nih Âthên a chuahtâk i Korin ah a kal.

² Cuka ah Judah mi pakhat Akuila a hmuh, amah cu Pontia ram i a chuakmi a si. Klaudias nih Judah mi vialte Rom khua in chuak dih dingin nawl a pêk ruangah a nupi Prisila he Itali in an rak phâk ka a si, cu hna innah a tlung.

³ Zeicatiah an rianṭuanmi â lawh caah an umṭinâk cu a si. An rianṭuanmi cu Puaninn ser a si.

⁴ Sabbath nichiarte Sinagog ah Pathian bia a chim tawn i Judah mi le Krik mi zong a sawm khawh hna.

⁵ Sailas le Timote cu Mesidonia ram in an rak phâk hnuah Paul cu Thlarau nih a namchih ruangah, Judah mi hna sinah Jesuh cu Krih a si tiah a chim tawn.

⁶ Asinain an rak doh i an thangchiat tikah a puan a thinhnawh hna i an sinah, “Nan thisen mawh cu nan lucung ah tla seh, kei cu ka thiang. Atu thawk in Gentel hna sinah ka kal cang lai,” tiah a ti.

⁷ Cu hmun cu a chuahtâk i mi pakhat a min Jastas innah a lut, amah cu Pathian biatu a si i a inn zong sinagog changtu a si.

⁸ Krispas, sinagog hotu cu a chungkhar vialte he Bawipa an zumh. Korin khua mi tampi zong nih an theih i an zumh i baptisma zong an in.

⁹ Zanah Paul sinah Bawipa â lang i bia a chimh, “ṭih hlah, dai loin bia chim lengmang ko;

¹⁰ zeitintiah na sinah ka um ko, ahohmanh nih fahnâk an in pe lai lo, hi khua ah hin mi tampi ka ngeih ko hna,” tiah a ti.

¹¹ Kumkhat le thlaruk chung mi sinah Pathian bia chim in a um.

¹² Gallio cu Akai ram i uktu bawi a si lioah, Judah mi hna nih lungrual tein Paul cu an tlaih i biaceihtu hmai ah an chuahpi.

¹³ “Hi pa nih hin nawlbia ralchanh in Pathian biak awkah mi a sawm tawn hna,” tiah an ti.

¹⁴ Paul nih a leh hlan ah Gallio nih Judah mi hna sinah, “Judah mi hna, hihi nawl buarnâk maw, thil ṭhalo tuahnâk kong hna sisehlaw kan ruahpiak hrimhrim ko hna lai,

¹⁵ asinain, bia, min le nan nawlbia kong hna a si ahcun nanmah tein ceih u, kei nih cubantuk kong ka ruat duh lo,” tiah a ti.

¹⁶ Cuticun biaceihnâk hmun in a ṭhawl hna.

¹⁷ Grik mi vialte nih sinagog hotu Sosthen an tlaih i biaceihnâk ṭhutdanh hmai ah an tuk i Gallio nih cubantuk thil cu zeihmanh ah a rel lo.

¹⁸ Paul cu ni sau nawn ṭha te in a câm i unau hna cu a kaltâk hna. Siria ramlei ah tilawng in a kal. Prisila le Akuilas zong nih an zulh. Biakam a ngeih caah Kenkthria khua ah a lu â kongh.

¹⁹ Efesa khua a rak phân i cuka ah annih cu a chiahta hna, anih tu cu sinagog ah a lut i Judah mi hna sinah bia a chim.

²⁰ Annih nih sau deuh câm dingin an sawm nain a cân â rem deuh loin a ruah.

²¹ A ra laimi Thô ah hin Jerusalem i ka um hrimhrim a herh, Pathian a hna a tlâk ahcun nan sinah ka ra ṭhân lai tiah a ti. Cuticun Efesa khua in tilawngin a kal.

²² Sisaria a phân i Jerusalem khua ah a kal, kawhhran kha an kut a tlaih hna i cu hnuah Antiok ah a kal.

²³ Cuka ah cân saupi a câm hnu ah, a kal ṭhân i zultu vialte hna fehter pah in Galatih ram le Frizia ram a ṭol dih.

²⁴ Cubangin Judah mi pakhat, a min Apollo, Aleksandria khawchuak, ṭhahnem a ngai tak takmi, biachim a thiam i Cathiang zong a hngal tak takmi kha Efesa a phân.

²⁵ Cu pa cu Bawipa kong cawnpiak cangmi a si, ṭhahnem a ngaimi a si caah Bawipa kong cu ṭhahnem ngai ngaiin, a cawnpiak tawn, asinain Johan Baptisma kong lawng a theih.

²⁶ Sinagog ah ralṭha ngai in bia chim a thawk i Prisila le Akuilas nih a biachim an theih tikah a dang tein an hruai i a sinah Pathian lamthluan cu felfai tein an chimh.

²⁷ Akai ram ah kal â tim, an rak cohlan nâkhnga zultu hna sinah ca an ṭialpiak, a va phâk tikah, Pathian zângfahnâk ruangah zumtu kha tampi in a bomh hna;

²⁸ zatlâng hmai ah Judah mi hna cu holh kho loin a el tawn hna i Cathiang hmangin Jesuh cu Krih a si tiah a langhter tawn.