LAMKALTU 16 - Laibaibal Thiang (BSI)

¹ Derbe le Lustra khua ah an kal i ngaihmanh, cuka ah zultu pakhat, a min Timote a um, amah cu Judah zumtu nu pakhat fapa a si i a pa tu cu Grik mi a si.

² Amah cu Lustra le Ikonion khua mi hna nih an thangṭhat ngai ngaimi a si.

³ Paul nih a sin i kal ve dingah a duh i cuka hrawng i Judah mi hna ralven ruangah a cuarpar a tanter, zeicatiah apa kha Grik mi a si ti an hngalh dih.

⁴ An kalnâk khuakip ah Jerusalem i lamkaltu le upa hna ceihmi bia kha zulh dingin an chimh hna.

⁵ Cuticun kawhhran hna cu zumhnâk ah an fek chinchin i nichiar te an karh chin lengmang.

⁶ Thiang Thlarau nih Asia ram i phungchim a onh lo ruangah, Frizia le Galatia ram tu an tlawng.

⁷ Misia ram an phâk hnu ah Bithinia ramah luh an i tîm, asinain Thlarau nih a onh hna lo.

⁸ Cuticun Misia ram kaltâk in Troas khua an phân.

⁹ Zan ah Paul nih langhnâk a hmuh i Masidonia ram i mi pakhat dir in, “Masidonia ram ah ra law, kan bawm,” tiah a nawl.

¹⁰ Cubangin langhnâk a hmuh dih in Masidonia ramah kal kan i tim cawlh, an sinah Thawngṭha bia chim dingin Pathian nih akan kawh tiah kan hngalh.

¹¹ Cucaah Troas khua in tilawngin kan chuak i ding tein Samothrasia kan phân i a thaizing ah Neapolis kan phân,

¹² cuka in Filipi kan phân. Cucu Masidonia peng i a biapi bik khua a si. Rom miphun tlâkmi a si i cuka ah ni zeimawzat kan câm.

¹³ Sabbath ni ah hauleng i tiva kam thlacamnâk hmun i an hman tawnmi ah kan kal. Cuka ah kan ṭhu i nu a rami hna sinah bia kan chim.

¹⁴ Cuticun nu pakhat, a min Lidia nih kan bia a ngai. Amah cu maimaw puansen zuartu, Thiatira khua mi, Pathian a biami a si. Paul nih a chimmi bia ṭha te i ngai dingin Bawipa nih a lungthin a onpiak.

¹⁵ Amah le a chungkhar nih Baptisma an in dih in, Bawipa sinah zumhtlâk in nan ka ruah ahcun, ka innah rak tlung u, tiah a kan nawl i a kan sawm khawh.

¹⁶ Cun hitihin a si. Thlacam i kan kal lio ah sal ngaknu pakhat khuachia tuahmi, hmailei kong chimchungtu nih a kan ton. Hmailei kong a chimchung nâknih a pu le nih phaisa tampi an hmuh.

¹⁷ Cu ngaknu nih Paul le kannih a kan zulh i, “Hi hna khamhnâk kong a kan chimtu hna hi, Cungnung Bik Pathian sal le an si,” tiah a au tawn.

¹⁸ Cubangin ni tam nawn a au hnu ah Paul ing kha fakpi in a ponh, a hei merhnawh i thlarau sinah, “Jesuh Krih minin a chungin chuak dingah nawl kan pêk,” tiah a ti. Cu cân lila ah a chuak cawlh.

¹⁹ A pu le nih an phaisa hmuhnâk hram a cat ti kha an hngalh tikah, Paul le Sailas cu an tlaih i hotu hna sinah Market hmunah an hnuhchih hna.

²⁰ Biaceihtu hna sinah an kalpi i “Hi hna hi kan khua an buaiter ngai ngai,

²¹ kannih Rommi ca i pom le cohlan khawh lomi a phunphun an cawnpiak,” tiah an ti.

²² Cuticun mibu kha lamkaltu ralchanh in an rak i pum ve. Biaceihtu hna nih an angki an thlehpiak hna i fung i tuk dingah nawl an pêk hna.

²³ Bechia ngai i an tuk hnuah thongah an thlak hna i thongin bawi kha ṭha te i vengding in nawl an pêk.

²⁴ Cubangin nawl an pêk caah, anih nih thong chung chungchin ah a chiah hna i an keah hreng a khenh hna.

²⁵ Zanṭim ah Paul le Sailas cu Pathian sinah thla an cam i hla an sa, thongtla nih an ngaih hna.

²⁶ Ruahlo pi ah li fakpi in â hnin i thonginn hram vialte â hnin dih. Innkâ vialte â ong dih i mikip cikcin khihmi kha a poih dih.

²⁷ Thonginn congtu cu â hngilhnâk in â hlau i thong innkâ â ongmi kha a hmuh, thongtla an zâm dih cang tiah a ruah, a vainam â zuh i amah le amah thah â tim.

²⁸ Asinain Paul kha thang ngai in a au i, “Fahnâk i pe hlah, zeitintiah kan dihlak in hika ah kan um ko,” tiah a ti.

²⁹ Cuticun meiin rak pu u tiah a ti, a chungah a tli i Paul le Sailas hmaiah ther lengmang in a bawk.

³⁰ Lengah a chuah hna i “Pu le hna khamhmi si dingin zeidah ka tuah lai?” tiah a ti.

³¹ Annih nih, “Bawipa Jesuh Krih zum law, khamh na si lai, nangmah le na innchungkhar he,” tiah an ti.

³² Cuticun amah le a inn chung i a ummi vialte sinah Bawipa bia kha an chim.

³³ Cu zan lila ah a hruai hna i an hma a ṭawlpiak hna. Cun chikkhat teah amah le a chungkhar vialte nih baptisma an in.

³⁴ Cuticun an innah a kalpi hna i rawl a pêk hna; an chungkhar in Pathian an zumh caah an i lawm ngai ngai.

³⁵ Khua a dei tikah biaceihtu hna nih hotu hna sinah, kha mi hna kha chuahter hna u,” tiah mi an thlah hna.

³⁶ Cuticun thonginn vengtu nih cu kong cu Paul sinah a chimh i, “Biaceihtu hna nih rak chuak hna seh tiah an ti. Atu chuak ulaw dai tein kal u,” tiah a ti.

³⁷ Asinain Paul nih, “Rommi kan si. Thiamlo coter zong kan si lo nain zatlâng hmuh ah ankan tuk i thongah an kan thlak. Atu ah a thli tein chuahter an kan timh ṭhân. A si hrimhrim lai lo. Anmah ra hna sehlaw ra kan chuah hna seh,” tiah a ti.

³⁸ Hotu hna nih cu bia cu biaceihtu kha an va chimh i Rommi an si ti kha an hngalh tikah an thin a phâng.

³⁹ Cuticun an ra i zângfah nawlin an chuahter hna i khua chuahtak dingin an nawl hna.

⁴⁰ Cun thonginn in an chuak i Lidia innah an lut, cuka i unau hna mui kha an hmuh hna i an hna an ngamter hna i an chuak.