LAMKALTU 14 - Laibaibal Thiang (BSI)

¹ Ikonion khua ah Judah mi hna sinagog ah an lut i bia an chim i Judah mi le Grik mi tampi nih an zumh.

² Asinain a zum duh lomi Judah mi hna nih Gentel mi an forh hna i an ruahnâk ah huatnâk thlaici tuh in unau kha an huatter hna.

³ Cucaah cuka ah sau nawn an câm, a zângfahnâk bia hngaltu an si bangin Bawipa ah ralṭha in bia cu an chim, hmelchunhnâk le khuaruahharnâk kha an kut in a tuahter hna.

⁴ Khua mi hna cu an i ṭhen i a cheu nih Judah mi an ṭanh i a cheu nih lamkaltu an ṭanh.

⁵ Gentel mi le Judah mi hna le an hotu hna he an ṭangṭi hna i lamkaltu kha thazâng chuah in lung in cheh an timh hna,

⁶ annih nih an i timhmi an theih tikah Likaonia ram khualipi Lustra le Derbe le a pawngkam ram hna ah lodiam an zâm.

⁷ Cuka ah thawngṭha kha an chim.

⁸ Lustra khua ah kezengmi a ṭhu tawn i a nu paw chungin zengcia in a chuakmi a si i ke in a kal bal lo.

⁹ Cu pa nih Paul phungchim a ngai i Paul nih a zoh peng i dam khawhnâk tiang zumhnâk a ngeih kha a hngalh tikah,

¹⁰ aw thang ngaiin, “Ding tein nake in dir tuah!” tiah a ti. Cun â hlawk i kein a kal.

¹¹ Mizapi nih Paul tuahmi an hmuh tikah Likaonia holh in, thang ngai ngaiin, “Minung bantukin pathian kan sinah an rung ṭum a si hih,” tiah an ti.

¹² Barnabas kha Zeus an ti i Pual kha biachimtu deuh a si caah ‘Hermes’ tiah an ti.

¹³ Cuticun Zeus tlângbawi, hauleng i ṭempal a ngeimi nih cawtum le pangpar ṭhirual kha kutkâ ah a rak put i mizapi he raithawinâk ah thah an timh.

¹⁴ Lamkaltu Barnabas le Paul nih cucu an theih tikah an puan an thleh i zapi sinah an tli i an au,

¹⁵ Pu le hna zeiruangahdah hi thil hi tuah nan timh. Minung sawh sawh, nanmah bantuk sining ngeimi kan si. Hibantuk santlailo thil hna hi mertâk u. Kannih nih lei le van, rili le a chung i a ummi thil vialte Sertu Pathian lei ah nan i mer khawh nâkhnga kan in chimh hna.

¹⁶ Cu Pathian nih cun kan hnulei cân vialte ah khan, miphun kip nih anmah lam cio an zulh kha a sian.

¹⁷ Asinain Amah cu a um hrimhrim tiah i hngalhter loin a um bal lo. Cu â hngalhternâk hna cu, ṭhatnâk a tuah tawn i van in ruah hna a surter, nan thlai hna nih theipar tampi in an chuah, ei awk le lawmhnâk in nan lungthin a khahter tawn,” tiah an ti.

¹⁸ Cuticun mizapi nih an sin i raithawinâk saṭil thah an timhmi cu cu bia nih a lêtter khawh hna.

¹⁹ Cuticun Antiok khua le Ikonion khua Judah mi mizeimaw an ra i mizapi kha anmah leiah an ṭanter khawh hna, Paul cu lung in an cheh, khuachung in an chuah i a thi cang tiah an ruah.

²⁰ Asinain zultu hna a pawng i an dir lioah a hung tho i khuachung ah a lut. A thaizing ah a chuak i Barnabas he Derbe khua ah an kal.

²¹ Cuka ah Thawngṭha bia an chim, zultu tampi an ser i Lustra, Ikonion, le Antiok ah an kir.

²² Harnâk tampi tuarin Pathian pennâk ah kan luh awk a si ko, tiin zultu hna lungthin kha an ṭhawnter i zumhnâk ah fekte i dir dingin thazâng an pêk hna.

²³ Kawhhran kipah upa an chiah i rawlulhnâk he thla an cam dihin an zumhmi Bawipa sinah an chanh hna.

²⁴ Pisida ram an tan hnu ah Pamfilia ah an phân.

²⁵ Perga khua i bia an chim dih in, Attalia khua ah an vung kal.

²⁶ Cukacun Antiok ah tilawngin an kal. Cucu an lîmmi rian ṭuan awkah unau hna nih Pathian zângfahnâk i an chanh hnu ah an thlah hna nâk kha a si.

²⁷ An phâk hnu ah kawhhran kha an kawh hna i Pathian nih anmah hmangin a tuahmi vialte le Gentel mi hna caah zumhnâk lam Bawipa nih a onpiaknâk kong kha an chim hna.

²⁸ Cuticun zultu hna sinah saupi an um.