LAMKALTU 12 - Laibaibal Thiang (BSI)

¹ Cu cân ah Herod nih kawhhran chungmi cheukhat serhsat dingin a kut a samh.

² Johan unau Jeim kha vainam in a thah.

³ Cu thil nih Judah mi a lawmhter hna ti kha a theih tikah Peter zong tlaih an timh. Cucân cu thilnu cawh lomi Changreu Thô lio a si.

⁴ A tlaih hnuah thong ah a thlak i ralkap buli, pali duahmah in a venter hna. Lantâk thô a dih tikah mizapi hmai ah chuahpi an timh.

⁵ Peter cu thong ah an umter i kawhhran hna nih biatak tein Pathian sinah thla an cam piak.

⁶ Herod nih chuahpi a timh lai ni zanah Peter cu ralkap pahnih hna lakah hreng pa hnih khenh buin â hngilh, a vengtu hna zong nih thonginn cu vengin innkâ hramah ṭha tein an congh.

⁷ Cun zohhmanh, Bawipa vancungmi pakhat a sinah a dir i thonginn cu a ceu, Peter cu a hnâk in a tongh i â hlau. “Khulrang in tho” tiah a ti. Hrengkhenh hna cu a kut in an tla.

⁸ Vanmi nih, “I tim law na kedan i danh,” tiah a ti. A chim bangin a tuah i vanmi nih a sinah, “Na thil i hruk law, ka zul,” tiah a ti.

⁹ Cuticun a chuak i a zulh. Vanmi cawlcanghning cu a taktak si loin, langhnâk a hmumi ah â ruah.

¹⁰ Vengtu ralkap hmasa le a changtu an lonh hnu ah, leng i chuahnâk ding thir kutkâ an phân, cucu amah tein an caah â ong, cun an chuak i lam pakhat an zulh i cuka ah vanmi nih a kaltâk.

¹¹ Peter cu a lung a fim i Bawipa nih a vanmi a thlah i Herod kut le Judah mipi hna an i ruahchanmi chungin a ka khamh tiah atu cu ka hngalhfian cang,” tiah a ti.

¹² A lung â fim hnuah, mi tampi nih thla an camnâk hmun Johan Marka nu innah a kal.

¹³ Kutkâ innkhar timi kha Peter nih a hun kingh tikah, ngaknu pakhat, a min Roda timi cu ong dingin a va kal.

¹⁴ Peter aw a si kha a theih tikah â lawmh tukah kutkâ ong loin a tli i Peter lengah a dir tiah a thanh hna.

¹⁵ Annih nih, “Na hrut cang,” an rak ti. Anih nih, ‘a si ko ê’ tiah a ti peng. Annih nih, ‘a vanmi a si lai,’ tiah an ti ṭhân.

¹⁶ Peter nih ngol loin a kingh i an on tikah amah cu an hmuh i an khuaruah a har ngai ngai.

¹⁷ Dai te i um dingin a kut in a zauh hna, Pathian nih thongin chungin a hruainâk kong kha a chimh hna. “Hi bia hi Jeim le unau hna va chim hna u,” tiah a ti. Cun a chuak i ka dangah a kal.

¹⁸ Cuticun khua a dei le cângkâ vengtu ralkap hna nih Peter umnâk an hngalh lo caah buai tak te in an buai.

¹⁹ Herod nih a kawl len nain a hmu kho lo, a vengtu hna cu a chalh hna i thah awkah nawl a pêk hna. Cun Judia ram in Sisaria khua ah a kal i cuka ah sau nawn a um.

²⁰ Herod cu Tair le Sidon mi hna cungah a thin a hung ngai ngai, asinain annih nih Blastus siangpahrang chungkhar kilvengtu kha hawikawm ah an i ser i lungkhat tein a sinah an ra, zeicatiah an ram kha siangpahrang ramin rawl an pêk tawn caah remnâk tuah awkah an nawl.

²¹ Cuticun an i biak chonhnâk ni ah, Herod cu siangpahrang puan i aih in siangpahrang ṭhutdanh ah a ṭhu i an sinah bia a chim.

²² Mizapi nih, “Minung aw a si lo, pathian aw a si,” tiah ngol lo in an au.

²³ Pathian sinah thangṭhatnâk a pêk duh lo caah, hmakhat teah Bawipa vancungmi kut tuarin rulhut nih an ei i a thi.

²⁴ Pathian bia cu a ṭhang i a karh chin chin.

²⁵ Barnabas le Saul nih an rian an ṭuan dih in Jerusalem khua in an kir ṭhân i Johan Marka timi an i kalpi.