LAMKALTU 11 - Laibaibal Thiang (BSI)

¹ Lamkaltu hna le unau dang, Judia ram i a ummi hna nih Gentel mi zong nih Pathian bia an pom ve nâk kong kha an theih.

² Peter cu Jerusalem khua a phâk tikah cuarpar tanmi hna nih an rak chalh i,

³ “Cuarpar tan lomi innah na lut i rawl na ei,” tiah an ti.

⁴ Asinain Peter nih a hramthawk in â chang thliahmah in thil umtuning kha a chimh hna.

⁵ Joppa khua ah thla ka cam, mangcang hlanin ka um i langhnâk ka hmuh, bawm, puan nganpi i khihmi van in an run `humhmi kha ka hmuh i ka pawngah a um.

⁶ Cu thil cu zeidah a si hnga tiah ruahpah in ka zoh i lei cung i ke pali ngei saṭil hna le, ramsa hna le, a lawn in a lawnmi hna le vanva kha ka hmuh hna.

⁷ Aw nih, ‘Peter, tho, that law, ei,’ tiah a ti.

⁸ Asinain keinih, ‘Eihlah ê, Bawipa! Zeitintiah a thiang lomi le a thûrmi ka kâ ah a lut bal lo,’ tiah ka ti.

⁹ Asinain van i aw nih avoi hnihnâk ah, ‘Pathian nih a thianter cangmi kha, nangnih a thiang lo ti hlah,’ tiin a ka leh.

¹⁰ Cubantuk lawngte in voithum tiang a um i thil vialte cu vanah kaiter in a um ṭhân.

¹¹ Cu lio ah ka tlunnâk inn hmai ah mi pathum Sisaria i a ka autu dingah thlahmi an rak dir cang.

¹² Cuticun Thlarau nih lungawṭawm lo tein anmah zul cawlh dingin a ka thlah. Hi unau paruk hna zong nih anka zulh i an innah kan lut.

¹³ Cun cupa nih kan sinah, a inn chung i vanmi a hmuhning le a sinah Joppa khua ah mi thlah law, Simon Peter va ṭhi hna seh,

¹⁴ anih nih bia an chimh hna lai i cu pa chimmi thawngin nang le na inchungkhar hna cu khamhnâk nan hmuh lai, a timi kha anka chimh.

¹⁵ Phungchim ka hun thawk i a hlan ah kan cung i a rak phanh bantuk khan Thiang Thlarau a rung phân.

¹⁶ Cuticun Bawipa bia, “Johan nih tiin baptisma an pêk hna i nannih cu Thiang Thlarau in baptisma nan in lai a timi kha ka hun hngalh ṭhân.

¹⁷ Cucaah Bawipa Jesuh kan zumh tikah Pathian thilpêk kan comi bantuk kha an sinah pêk a si ve ahcun kei nih hin Pathian cu ka el kho hnga maw? tiah a ti.

¹⁸ Cu bia cu an theih tikah an dai i, “Cutiasiahcun Pathian nih Gentel mi zong nung dingin ngaihchih a sian ve hna a si cu,” tiah Pathian an thangṭhat.

¹⁹ Steven kong ah serhsatnâk a ummi ruangah â ṭhekmi hna kha, Foinisia ram le, Saiparas tikulh le Antiok khua tiangin an kal i Judah mi sin dah ti lo aho sin hmanh ah bia kha an chim lo.

²⁰ Asinain an lak i cheukhat cu Saiparas tikulh le Sairin khua mi an si i cu mi hna cu Antiok khua an phâk tikah, Grik mi hna sinah bia cu an chim i Bawipa Jesuh kong kha an chim.

²¹ Bawipa kut nih a umpi hna i mi tampi nih an zumh i Bawipa leiah an i mer.

²² Cu thawng nih Jerusalem kawhhran hnakhaw a phân, cun Barnabas kha Antiok khua tiangin an hei thlah.

²³ A phâk tikah Pathian zângfahnâk a hmuh tikah â lawm ngaingai, lungthin tak tein Bawipa i tlaih dingin thazâng a pêk hna.

²⁴ Zeitintiah amah cu miṭha a si i Thiang Thlarau le zumhnâk in a khatmi a si. Cuticun Bawipa sinah mi tampi an i chap.

²⁵ Cuhnuah Barnabas cu Saul kawl dingin Tarsus khua ah a kal.

²⁶ A hmuh tikah, Antiok khua ah a ratpi, kumkhat chung kawhhran hna he an i pawlkawm i mi tampi an cawnpiak hna. Antiok khua ah hin dahkaw zultu hna cu “Kristian” tiah hmasabik an ti hna cu.

²⁷ Cu cân ah profet mizeimaw Jerusalem khua in Antiok khua ah an kal.

²⁸ An lakah mi pakhat, a min Agabus timi a dir i, “Vawlei vialte ah mangṭam fak piin a tlung lai tiah Thlarau hngalhternâk bia a phuan. Cu mangṭam cu Klaudias Sizar a si lioah a rak tlung.

²⁹ Cuticun zultu hna nih an tikhawhtawk cio in Judia ram i unau hna sinah bomhnâk kuat an timh.

³⁰ Cuthil cu tlam an tlinter i Barnabas le Saul kut in upa hna sinah an kuat.