KOLOSE 4 - Laibaibal Thiang (BSI)

¹ Hotu le hna nannih zong vanah hotu nan ngei ti kha hngal in nan sal le sinah dik le ṭha tein tuah u.

² Thla cam lengmang u law, ṭha te i ruah buin lawmhnâk bia chim u.

³ Kan ca zongah thla rakcam ve u, cikcin khih ka si chan Krih biathli ka phuan khawh nâkhnga le, cu bia cu phuang dingin ka ca i lam â on lengmang nâkhnga le,

⁴ ka chim hngami kha ka chim khawh nâkhnga ka nawl piak u.

⁵ Lenglei mi hna lakah fim ngaiin um u law a herh ningin cân rem kha hngak u.

⁶ Nan chimmi pauh ah cite in al termi zângfahnâk telhchih zungzal u law, cuticun mikip sinah zeitindah leh ding a si ti kha nan hngalh lai.

⁷ Ṭaikhikhas kan unau dawtmi, rianṭuantu zumhtlâk, Bawipa i kan sal hawi a simi nih ka konglam vialte an chimh hna lai.

⁸ Cucaah amah hi nan sinah ka rak thlahnâk chan cu a si, kan thawng nan rak theihnâk thawngin nanlung hna a ngam khawh nâkhnga.

⁹ Onesimas unau zumhtlâk le dawtmi nanmah chungmi kha â rak tel ve. Amah nih hi ka lei thil sining cu a dih um nâkin an chimh hna lai.

¹⁰ Aristarkhas, thong i ka tlâkpi hawi nih nan kut an tlaih hna: Marka Barnabas tupa zong nih nan kut an tlaih hna, (amah kong i tuahawk thil ka chim cang kha: nan sin a rat tikah rak cohlang u).

¹¹ Cun Jesuh Justus timi nih nan kut an tlaih hna. Hi hna lawng hi cuarpar tanmi hna sinin Pathian pennâk ca i ka ṭuanpi mi an si, ka hna ngamtertu taktak an si.

¹² Epafaras nanmah chungmi, Krih Jesuh ah ṭemmi sal nih nan kut an tlaih hna. Pathian duhning in lamkip i nan um i tlam nan tlin khawh nâkhnga, fak piin nan caah thla camtu a si.

¹³ Zeitintiah nanmah ca le Loadisia mi hna ca le, Heiropalis i a ummi hna caah ṭhahnem a ngaihning ka hngalhpi.

¹⁴ Luka dawtmi sibawi le Demas nih nan kut an tlaih hna.

¹⁵ Loadisia i a ummi unau hna kha an kut ka tlaihpiak hna u. Nimfa le a inn i kawhhran hna kha an kut ka tlaihpiak hna u.

¹⁶ Cubangin hi cakuat hi nan rel dih in Loadisia kawhhran zong relter ve hna u: nannih zong nih Loadisia khua i cakuat kha rak rel ve u.

¹⁷ Cun Arkhippas sinah, “Rianṭuannâk Bawipa sinin na hmuhmi kha lim dingin i ralring,” tiah nan rak ti lai.

¹⁸ Keimah Paul nih, ka kut hrimhrim i ṭialin nan kut kan tlaih hna. Ka cikcin hi philh hlah u. Zângfahnâk nan sinah um ko seh. Amen.