KOLOSE 3 - Laibaibal Thiang (BSI)

¹ Krih sinah thawhter nan si ahcun cunglei Pathian orhlei ah a ṭhumi Krih umnâk i a ummi thil hna khi kawl u.

² Cunglei thil ah nan ruahnâk chia u law, leicung thil ah hin chia hlah u.

³ Zeitintiah nan thi cang i nan nunnâk cu Krih he Pathian ah thuh a si.

⁴ Kan nunnâk Krih a langh tikah nannih zong Amah sinah sunglawi ngaiin nanlang ve lai.

⁵ Cucaah nan lei taksa ṭengnge nupa sualnâk, thûrhnawmhnâk, hornâk, duhnâk sual le hakkauhnâk, (cucu milem biaknâk a si)hna kha that hna u.

⁶ Cuthil hna ruangah Pathian thinhunnâk cu zumlotu cungah a lang tawn.

⁷ Nannih zong cubantuk thil hna tuah in nan rak nun lio ah khan, cubantuk thil tuah kha nan zia a rak si.

⁸ Asinain atu cu nanmah ah thinhunnâk, thinhânnâk, huatnâk, thangchiatnâk le nan hmurkâ chuak fih a nungmi bia hi hlawnh hna u.

⁹ Minung hlun cu a tuahsernâk he nan phoih cang bangkhan, lih i chim ti hlah u,

¹⁰ zeitintiah hngalhnâk tling ngei ding le a sertu muisâm lo dingin tharchuah i a um cuahmah mi minung tharin nan i thuam cang.

¹¹ Cukaah cun Grik mi le Judah mi, cuarpartan le tanlo, miphun niam, Skuthia mi, sal le miluat zong um khawh a si lo, Krih cu zeizong ah zeizong a si.

¹² Cucaah Pathian thimmi, a thiangmi le dawtmi nan si bangin velngeihnâk, zângfahnâk, toidornâk, nunnemnâk le lungsaunâk in i thuam u;

¹³ pakhat le pakhat karlakah sawinâk le ralchanhnâk bia nan ngeih ahcun lung sau tein i ngaithiam u, Krih nih an ngaihthiam hna bangin nan i ngaithiam hrimhrim awk a si.

¹⁴ Cu thil vialte hna cungah dawtnâk i hruk u, cucu pumkhat sinâk i funtomnâk tlamtling a si.

¹⁵ Cun Pathian daihnâk nih nan lungthin kha uk ko seh, cubantuk i um dingin pum pakhat ah kawh nan si, cun â lawmmi si u.

¹⁶ Krih bia cu fimnâk phunkip he nanmah ah khat ko seh, biazâi le hla, thlarau lei hla hna in i cawm changin i cawnpiak u law, Bawipa sinah nan lungthin in zângfahnâk he hla sa u.

¹⁷ Bia in siseh, tuahsernâk in siseh, nan tuahmi thil kipah Bawipa Jesuh min in tuah dih u law, Amah thawngin Pa Pathian sinah lawmhnâk bia chim u.

¹⁸ Nupi le hna Bawipa mi sinâk he â tlak bangin nan vale sinah i pe u.

¹⁹ Va le hna nan nupi le daw hna u law, an sinah chia-khâ tuk hlah u.

²⁰ Ngakchia hna, zeizong vialte ah nan nu le nan pa nawl ngai hna u,

²¹ Pa le hna nan fa le thin hunter hna hlah u, culoahcun an lung a dong sual lai.

²² Sinum hna, pumsa i nan hotu hna nawl kha zeizong vialte ah ngai u, mit rian ṭuntu le minung lawmh tertu men si loin, lungthin in i biatak u law, Pathian ṭihzahnâk he an nawl ngai hna u.

²³ Cun nan tuahmi thil vialte ah, minung caah ṭuan men si loin Bawipa ca i a tuahmi bantukin lungtho tein tuah u.

²⁴ Bawipa sin in nan ṭuanman nan co ding ro nan hmuh lai kha philh hlah u, zeitintiah Bawipa Krih riantu nan si.

²⁵ Asinain ṭhatlonâk tuahtu nih a tuahmi man cu a hmuh ko lai, zeitintiah thleidannâk zeihmanh a um lo.