KOLOSE 2 - Laibaibal Thiang (BSI)

¹ Zeitintiah nanmah le Laodisia khua i a ummi, cun thisa in kamui a tak i a hmu rih lomi hna nih nan ca i ka tha a batning hi nan hngalh ka duh,

² Pathian, Pa le Krih biathli hngalhnâk kongah an lungthin cu thazâng pêkmi a si i dawtnâk ah i funtom in a fekmi theihthiamnâk tling le rumnâk vialte kha an co khawh lai,

³ Amah ah fimnâk le hngalhnâk ro vialte kha thuh a si.

⁴ Cubangin hihi ka chim, culoahcun biachimthiamnâk men in hlen nan si sual lai;

⁵ Zeicahtiah pum in nan sinah ka umlo nain thlarau in nan sinah ka um. Krih zumhnâk i nanfeh ning le nan nuncan ṭhatnâk hmuh ka duhnâk nih a ka lawmhter tawn.

⁶ Cucaah Bawipa Krih Jesuh cu nan cohlân cang bangin Amah ah um peng u,

⁷ Amah ah hrambunh in sakmi si u law, zumhnâk ah a fekmi si uh, cawnpiak nan rak si cang bangin lawmhnâk bia tampi in chim uh.

⁸ I ralring u, culoahcun mi zeimaw nih Krih cawnpiakning si loin, fimnâk le pakpalawng hlennâk le, minung hna i chanhchinmi phung le vawlei phunghram men in hlen nan si sual lai.

⁹ Zeitintiah Amah ah Pathian tlamtlinnâk vialte cu pumsa lei in a um;

¹⁰ Cun Amah ah tlam nan tling, Amah cu bawinâk le nawlngeihnâk vialte lu a si.

¹¹ Krih cuarpartannâk ah, pumsa sual duhnâk kha i phoih in, kut i cuarpartan si loin Amah ah cuarpartan nan si.

¹² Baptisma ah a sinah vui nan si, cuka ṭhiamṭhiam ah thihnâk in Amah thawh tertu Pathian rianṭuan zumhnâk thawngin Amah sinah thawhter nan si.

¹³ Cun nannih nan sualnâk le taksa in cuarpartan lomi nan si ruangah a thimi nan si lio ah Amah sinah an nunter hna, kan sualnâk vialte a kan ngaihthiam i

¹⁴ kan leiba ṭialnâk câ, nawlpêk in ṭialmi, a kan ralchantu le dawnkhântu kha a hrawh cang, cucu vailam ah khenhchih in lo diam a lâk cang.

¹⁵ Cuticun bawinâk le nawlngeihnâk vialte phoihdih in cu hna cu a tei dih i zapi hmaiah mual a photer cang.

¹⁶ Cuticun ei le din kongah siseh, thô kongah siseh, thlathar kongah siseh, sabbath kongah siseh ahohmanh nih bia in ceih hna hlah seh.

¹⁷ Cu hna cu a um laimi muithlâm men an si i a taktak cu Krih ta a si.

¹⁸ Adeu i tangdormi le vanmi a biatu le, langhnâk phundang khun hmu i â chimmi hna, asinain vawilei lungput ngeiin amah le amah â sântermi hna nih nan hmuh hngami ṭuanman cu hleng in inchut hna hlah seh,

¹⁹ cu hna nih cun taksa pumpuluk a pehtonhtu le cawmtu Pathian sinin a ṭhan tertu taksa pum Lu a simi kha an i tlaih lo.

²⁰ Cucaah vawlei cawnpiaknâk hrampi cu Krih sinah nan thihtâk hnu ah, zeiruangahdah vawilei mi bangin nan nun ṭhân i vawilei sining tangah um ṭhân in-

²¹ “Tawng hlah, tep hlah, tlai hlah,”

²² timi minung nawlpêk hna le cawnpiaknâk, a lo tlau zau dingmi hna ah nan i pêk ṭhân khawh?

²³ Hibantuk biaknâk â ṭanhter ngaimi, a deu in toidormi hna le, pumsa zei i a rel lo i fahnâk â petu hna hi, ṭhat dawh ngaiin a lang nain, pumsa duhnâk teinâk kongah santlaihnâk zeihmanh a ngei lo.