GALATI 2 - Laibaibal Thiang (BSI)

¹ Kum hleili hnu ah, Barnabas he Jerusalem ah kan kal ṭhân, Titas zong ka sinah a kal ve.

² Langhnâk ka hmuh ruang i a kalmi ka si, Gentel mi hna sin i thawngṭha ka aupinâk kong ka chimh hna i hmaizahmi hna cu a dang tein ka chimh hna, culoahcun pakpalawng in a tlimi ka si sual lai, asiloah, sullam ngei lo i a tlimi ka si sual lai.

³ Kâ kalpimi Titas zong Grik mi a si nain cuarpar tanpiak a si theng lo.

⁴ Cubangin a sinâk cu unau deu, a thli te i an luh pimi hna ruangah a si. (Sal i an kan canter khawh nâkhnga Krih Jesuh i kan ngeihmi zalonnâk hi ngiatthlai duhah cuhna cu a thli tein an lut)

⁵ Asinain thawngṭha biatak hi nan caah kilven ka duh ruangah suimilam pakhat te hmanh an sinah kan i pe bal lo.

⁶ A biapi deuhmi zong an rak um kho ko, kan caah zeihmanh a dang hlei lo. Pathian nih thleidan a ngei lo, cucaah biapi deuh i ruahmi an um zongah, zeihmanh a poi hlei lo.

⁷ Kapkhat lei in, cuarpar tanmi hna caah thawngṭha Peter sinah pêk a si bantukin, cuarpar tanlomi sinah thawngṭha cu ka sinah chiah a si kha an hngalh dih

⁸ (zeitintiah cuarpar tanmi lamkaltu Peter sinah hlawk ngaiin rian a ṭuntu nih khan, Gentel Lamkaltu ka sin zongah hlawk ngaiin rian a ṭuan),

⁹ cun Jeim, Peter le Johan a biapi bik suttung ah ruahmi hna nih ka sin i pêkmi zângfahnâk an hmuh tikah, annih cuarpartanmi hna sinah kal in, kei le Barnabas cu Gentel mi hna sinah kal dingin hawikomhnâk orhlei kut ankan chanh.

¹⁰ Sifak mi hna philhlo dingin an kan duh lawng a si i cucu tuah ka duh bikmi a si fawn.

¹¹ Peter cu Antiok i a rat tikah sawi awk i a um ruangah hmaitonh tein ka mawhchiat.

¹² Zeitintiah Jeim sinin mi an rat hlan ah cun, Gentel mi hna sinah rawl a ei tawn, asinain cu hna an rak phâk le cângkâ cuarpar tanmi a ṭih hna ruangah an sinin â zuk ṭhân.

¹³ Judah mi vialte zong nih a depdet ning cu an i zohchunh dih. Barnabas tiangin an depdetnâk nih a pingah a hruai.

¹⁴ An thil tining kha thawngṭha biatak he â rem loning ka hmuh tikah an dihlak hmai ah Peter cu, “Nang cu Judah mi na si i Judah mi bangin um loin Gentel mi bangin na um ahcun, zeiruangah dah Gentel mi cu Judah mi bangin umter na timh? tiah ka ti.

¹⁵ Kan nih cu Judah mi kan si i Gentel misual kan si lo.

¹⁶ Asinain nawlbia tuahsernâk thawngin minih thiam a co kho lo, Jesuh Krih zumhnâk thawng lawng lawngin thiam a co kho ti kha kan hngalh, kannih zong nih nawlbia tuahsernâk thawng si loin, Krih zumhnâk thawngin thiam kan co khawh nâkhnga, Krih Jesuh cu kan zumh, nawl bia tuahsernâk thawngin ahohmanh nih thiam an co lai lo.

¹⁷ Krih i thiamconâk kan kawl lio ah khan, misual kan si zia kan i hngalh a si ahcun, Krih cu sual rianṭuantu a si tinâk a si hnga maw?

¹⁸ Ka ṭheh ciami ka sak ṭhân ahcun, nawlbuartu ah kâ chuah hnga lo maw.

¹⁹ Zeitintiah Pathian lei i ka nun khawh nâkhnga kei cu nawlbia in nawlbia ah ka thi cang.

²⁰ Krih sinah khenhchih in ka um nain ka nung; keimahtu ka si ti lo, Krih cu keimah ah a nung cang, atu thisa i ka nun hi, Pathian Fapa, aka daw i ka ai ah â pemi zumhnâk ah ka nung.

²¹ Pathian zângfahnâk cu ka hlaw hrimhrim lo; nawlbia ruang i dinnâk a um ahcun, Krih cu pakpalawngin a thi a si hnga.