BIAPHUAN 9 - Laibaibal Thiang (BSI)

¹ Cuticun vanmi panganâk nih a hun tum i van in arfi pakhat leiah a tlâk kha ka hmuh, A sinah taw a ngei lomi khor tawh kha an pêk.

² Cun taw a ngei lomi khor kha a on i khor chungin meikhu tampi sosernâk meikhu bantuk a hung chuak. Cuticun khor chungin mei khu ruangah ni le vanrâng khi muihter an si.

³ Cuticun cu meikhu lakah lei cungah khaubawk an hung chuak. Tlâng ngaikuang nih mi fahternâk a ngeihmi bang khin ṭhawnnâk an pêk hna,

⁴ Lei cung i ramhring hna le a hringmi vialte, thingkung vialte hna zong hrawk lo ding i nawlpêk an si, asinain an cal ah Pathian hmelchunhnâk a ngei lomi lawng kha harnâk pe dingin nawlpêk an si.

⁵ Cun mi thahnâk nawl kha pêk an si lo, asinain thla nga chung harnâk pe dingin nawlngeihnâk pêk an si. Harnâk an pêkning cu tlâng ngaikuang nih mi a seh i fahnâk a pêkmi bantuk khi a si;

⁶ Cu cân ah cun mi nih thihnâk an kawl lai i an hmu lai lo. Thih an duh ngai nain thihnâk nih a zâmtâk hna lai.

⁷ Cu khaubawk hna muisam cu raltuknâk dingah rang an thomhmi bantuk khi an si. An lu ah sui bantuk luchin an chinh hna i an hmai cu minung hmai bantuk an si.

⁸ An sam cu nu sam bantuk an si i an ha cu chiandeih ha bantuk an si.

⁹ Cun an ṭangah thir ṭangphaw bantuk an ngei i an thlazah thawng cu rang le ranglêng tampi ral dohnâk i a tlimi thawng bantuk an si.

¹⁰ Tlâng ngaikuang bantuk mei an ngei i an mei ah sivai a um. Thla nga chung minung fahnâk pe khotu hmual a si.

¹¹ Cun siangpahrang bantuk an ngei i cucu taw a ngei lomi khor vanmi a si, a min cu Hebru in Abaddon ti a si i Grik holh cun, Apollyon ti a si.

¹² Ngaihchiatnâk pakhatnâk cu a dih cang. Ngaihmanh hi thil hna hnuah ngaihchiatnâk phunhnih a phân rih.

¹³ Cuticun vanmi paruknâk nih a hun tum i Pathian hmai i sui biakṭheng ki pali chungin aw ka theih.

¹⁴ Vanmi paruknâk muko putu sinah “Zufareites rili i ṭemmi vanmi pali kha chuah hna” tiah a ti.

¹⁵ Cuticun suimilam cân le ni le thla le kum ca i an rak timhlamhmi vanmi pali hna kha minung cheuthum cheukhat that dingin an chuahter hna.

¹⁶ Cubangin rangcung i â citmi ralkap an tamning cu ting thonghnih an si tiah ka theih.

¹⁷ Cun langhnâk ah rang kha hitihin ka hmuh hna; a cung i â citmi hna nih mei bang a senmi ṭangphaw le a nakmi a duk deuhmi le aihre bang i a engmi an i benh. Rang lu hna cu chiandeih lu bantuk an si i ankâ chungin mei le meikhu le kât an chuak.

¹⁸ Cun zawtnâk phunthum ankâ in a chuakmi mei le meikhu le kât hna nih minung cheuthum cheukhat a thah hna.

¹⁹ Zeitintiah thiltikhawhnâk an ngeihmi cu an kâ le an mei ah a um, anmei hna cu rul bantukin lu a ngei i cu nih cun mi kha fahnâk a pêk hna.

²⁰ Asinain cu zawtnâk nih a thah lomi minung hna nih an kut chuak milem sui milem ngun le dar le thing le lung in an sermi milem zeihmanh a hmu kho lomi, thawng a thei kho lomi, a kal kho lomi milem kha bia ti lo dingin an i ngaihchih hlei lo.

²¹ Cun lainawn le doih, nupa sualnâk tuah le thil an fir tawnmi zong an i ngaihchih hlei lo.