BIAPHUAN 7 - Laibaibal Thiang (BSI)

¹ Cu thil hna hnu ah vanmi pali lei killi i a dirmi ka hmuh i leicung le rili le thingkung ah thli a hran nâkhnga lo, lei i thli pali kha an tlaih.

² Cuticun vanmi dang Pathian nung chinchiahnâk â putmi chaklei in a rak chuakmi ka hmuh. Anih nih lei le rili hrawhnâk nawl an pêkmi vanmi pali hna sinah awthang ngai in,

³ kan Pathian salle hna cu an cal i kan chihchiah hna hlanah cun lei le rili le thinghna cu hrawk rih hlah u, tiah a ti.

⁴ Cun an chinchiahmi zat cu ka theih i Israel miphun kip chungin thong 144000 an chinhchiah hna.

⁵ Judah miphun in 12000, Reuben miphun in 12000, Gad miphun in 12000,

⁶ Aser miphun in12000, Naphtali miphun in 12000, Manaseh miphun in 12000,

⁷ Simeon miphun in 12000, levi miphun in 12000, Isakar miphun in 12000,

⁸ Zebulun miphun in thong 12000, Josef miphun in 12000, Benjamin miphun in 12000 an chinchiah hna.

⁹ Cu thil hna hnu ah ka hun zoh i ngaihmanh mibupi ahohmanh i rel cawk lo, phunkip chung le hrinkip chung le, mikip chung le, holhphun kip chungin a rângmi angkifual in an i thuam, an kut in tûmhnah kha an i ken i bawiṭhutdanh hmai le Tuufano hmaiah an dir kha ka hmuh.

¹⁰ Aw thang ngaiin, “Khamhnâk cu bawiṭhutdanh i a ṭhumi kan Pathian le Tuufano ta a si,” tiah an au.

¹¹ Vanmi vialte cu bawiṭhutdanh le upa hna le thilnung pali hna umnâk velchum ah an ṭhu i bawiṭhutdanh hmai ah bawhbu in Pathian kha an biak.

¹² “Amen! Thluachuahnâk, sunparnâk, fimnâk, lawmhnâk bia, upatnâk, thiltikhawhnâk le ṭhawnnâk kha zungzal in zungzal tiang kan Pathian sinah um ko seh. Amen.” tiah an ti.

¹³ Cuticun upa hna lakah pakhat nih ka sinah, “Angki râng in â thuammi hna hi mizeidah an si? Khuazeiindah an rat? tiah a ka hal.

¹⁴ Keinih a sinah, “Ka pu nangmah nih na hngalh” tiah ka ti. “Hi hna hi harnâk nganpi chungin a rakchuakmi an si, an angki kha an suk i Tuufano thisen in ran termi an si tiah a ka leh.

¹⁵ Cucaah Pathian bawiṭhutdan hmaiah an um cang i chun zan hlan in a ṭempal ah a rian kha an ṭuan. Cun bawiṭhutdanh i a ṭhumi hrimhrim cu an sinah a um peng cang lai;

¹⁶ Anrawl a ṭam ti lai lo i anti zong a hal ti lai lo, ni nih a linh ti hna lai lo i a sat ti hna lai lo;

¹⁷ zeitintiah Tuufano bawiṭhutdan laifang i a ummi cu anmah kilvengtu a si lai i nunnâk tikhor ah a hruai hna lai. Anmit i mitthli vialte kha Pathian nih a hnawhpiak hna lai,” tiah a ti.