BIAPHUAN 3 - Laibaibal Thiang (BSI)

¹ “Sardis kawhhran vancungmi sinah hitihin ṭial. Pathian Thlarau pasarih le arfi pasarih a ngeitu nih hi bia hi a chim. Na tuahmi kha ka hngalh. A nungmi min nâ put nain na thi.

² I ralring law, an thih cuahmah lio ah a tangrihmi hna kha ṭhawnter hna. Na tuahmi kha Pathian hmaiah a tlingmi ka hmu hna lo.

³ Cucaah na theihmi le na ngeih cangmi kha philh hna hlah, fek tein i tlaih law, i ngaihchih. Cucaah nâ ralrin lo ahcun, mifir bangin ka ra lai, zei cân ahdah kan rat hnawh lai kha na hngal lo.

⁴ Sardis khua ah khan mi tlawmte an puan a thûrter lomi nan ngei; annih cu puanrang aih in ka sinah an leng ve lai, zeitintiah â tlâkmi an si.

⁵ A teitu cu puanrang aihter a si lai i Nunnâk cauk chungin amah min kha ka hrawk lai lo, ka Pa hmai le a vanmi hna hmaiah a min kha ka ṭanh lai.

⁶ Thlarau nih kawhhran hna sin i a chimmi hi hnâ a ngeimi nih thei ko seh,” tiah a ti.

⁷ “Cun Filadelfia kawhhran vancungmi sinah hitihin ṭial, Mithiang, Mi taktak, David tawh ngeitu, ahohmanh khar lo dingin a hung i ahohmanh hun lo dingin a khartu nih khan hi bia hi a chim.”

⁸ “Na tuahmi kha ka hngalh. Zohhmanh, ahohmanhnih khar khawh lomi inkâ on cia nahmai ah ka chiah, zeitintiah ṭhawnnâk tlawmte lawng na ngei nain ka bia fek tein nâ tlaih i ka min zong na hlaw lo.

⁹ Ngaihmanh Satan sinagog i â pummi, Judah mi â ti nain a si taktak lomi, lih a chimmi hna kha na kehram ah kan biakter hna lai i zeitlukindah kan dawt hna ti kha ka hngalhter hna lai.

¹⁰ Zeicatiah lungsau in ka nawlpêk nâ tlaih caah, lei minung hna hneksak dingin vawlei dihlak i a phân hngami teminnâk chungin kei zong nih kan luatter ve lai.

¹¹ Ngaihmanh, ka ra zau lai! Na bawiluchin kha ahohmanhnih an in chuh nâkhnga lo, na ngeihcia kha fek tein i tlaih.

¹² A teitu hna cu ka Pathian ṭempal tungah ka ser hna lai i cu hmun in a chuak ti lai lo. Amah ah ka Pathian he, ka Pathian khua, Jerusalem thar, ka Pathian sinin van i a rungṭummi min he ka ṭial lai. Cun amah cungah ka min thar ka ṭial lai.

¹³ “Thlarau nih kawhhran hna sin i a chimmi hi, hnâ a ngeimi nih thei ko seh,” tiah a ti.

¹⁴ “Cun Loadisia kawhhran vancungmi sinah hitihin ṭial, ‘Amen, Zumhtâk le Hngalhpitu Taktak, Pathian sermi thil hna Hrampi nih hitihin a chim.

¹⁵ Na tuahmi kha ka hngalh, kih zong na kik lo, sat zong na sa lo. Na kih siseh na sat siseh ka duh.

¹⁶ Cuticun sa ṭung lo, kik ṭung lo, a lum menmen nasi caah ka kâ chungin kan châk lai.

¹⁷ Zeicatiah ka rum ko, chawva ka ngei, zeihmanh ka baulo, na ti, mi sifak, zângfah awktlâk, zeihmanh ngei lo, mitcaw, taklawng i a ummi na si kha nâ hngal lo.

¹⁸ Cucaah na rum taktak nâkhnga ka sinah meiin thian termi sui rak caw dingin ruahnâk kan cheuh, taklawng i na ummi ningzah phentu dingah puangrâng le, na mit nih khua a hmuh nâkhnga mitfah sî zong ka sinah rak caw.

¹⁹ Ka dawtmi cu ka sîk hna i ka chimhhrin tawn hna. Cucaah i zuam law i ngaihchih;

²⁰ Ngaihmanh inkâ hramah dir in ka kingh. Ahohmanh ka aw a theih i inkâ a hun ahcun a sinah ka lut lai i a sinah zanriah ka ei lai, anih zong kasin ah a ei ve lai.

²¹ Teitu sinah ka bawiṭhutdan cungah ka pawng i ṭhutnâk nawl ka pêk lai, kei zong nih ka tei i ka Pa sinah a bawiṭhutdanh cung i ka ṭhut bantukin.

²² “Thlarau nih kawhhran hna sin i a chimmi hi hnâ a ngeimi nih thei ko seh,” tiah a ti.