BIAPHUAN 20 - Laibaibal Thiang (BSI)

¹ Cuticun van in vanmi pakhat a rung ṭum kha ka hmuh, a ngan ngaimi cikcin le taw a ngei lomi khor tawh a kut in â put.

² Khuachia le Satan timi hlanlio rulpi kha a tlaih i kum 1000 ca in a ṭêm;

³ kum 1000 a dih hlan lo miphun hna a hlen khawh ti nâkhnga lo taw a ngei lomi khor chungah a thlak i a khar khumh. Asinain cuthil hna hnu ah cân tlawmpal ca ah chuahter a si hrimhrim te lai.

⁴ Cun bawiṭhutdan kha ka hmuh hna i a cungah mi an ṭhu, an sinah biaceihnâk kha an pêk. Pathian bia le Jesuh biahngaltu an si ruangah le sahrang le a lem a bia lo i ankut le ancal ah chinchiahnâk a co lo ruangah anlu an tanmi hna thlarau kha ka hmuh hna. Cu hna cu an hung nung i Krih he kum 1000 chung an uk hna.

⁵ Asinain kum 1000 a dih hlan lo mithi dang cu an nung rih lo. Hihi thawhṭhân voi khatnâk a si.

⁶ Thawhṭhân a voikhatnâk i â telmi hna cu thluachuah an hmu i an thiang. Cu hna cungah cun thih voihnihnâk nih ṭhawnnâk a ngei ti lo, Pathian le Krih tlângbawi an si lai i Amah he kum 1000 an uk lai.

⁷ Cubangin kum 1000 a dih hnu ah Satan kha a thongtlaknâk in chuah a si lai

⁸ vawlei killi i miphun hna hlen awk ah a kal i Gog le Magog raldoh dingin rili these zat in mi a pumh hna.

⁹ Mithiang le an dawtmi khualipi kha dum dingin vulei vang awh in an kal. Cun van in mei Pathian sin in a tla i a kangh dih hna.

¹⁰ Anmah hlengtu khuachia cu sahrang le nal profet umnâk mei le kât in a kângmi tidil ah khan an hlawnh hna. Cun zungzal in zungzal tiang chun zan hlan in hrem an si lai.

¹¹ Cuticun a nganmi bawiṭhutdan râng le a cung i a ṭhumi kha ka hmuh, a hmaikâ in van le vulei an zâm dih. Cun an caah umnâk hmun a um lo.

¹² Cubangin mithi a hme le a ngan Pathian hmaiah an dir kha ka hmuh, cauk kha kau an si. Cun cauk dang, Nunnâk Cauk kha kau a si. Cun mithi hna cu cauk chung i ṭialmi an rak tuahning cio in biaceih an si.

¹³ Rili nih a chung i a ummi mithi kha a chuahter hna, cun Thihnâk le Mithi khua zong nih an chung i mithi kha an chuahter ve hna. Cun mikip an tuahning cio in biaceih an si.

¹⁴ Cuticun Thihnâk le Mithi khua cu mei tili chungah hlawnh an si. Hihi thih voihnihnâk a si.

¹⁵ Nunnâk Cauk chung i min ṭial an hmuh lomi vialte cu mei tili ah cun hlawnh an si.