BIAPHUAN 2 - Laibaibal Thiang (BSI)

¹ “Efesa kawhhran vancungmi sinah hitihin ṭial, a orhlei kutin arfi parasih â put i sui meiin chiahnâk pasarih lak i â chok lenmi nih hi bia hi a chim,

² “Na tuahmi kha ka hngalh hna, nâ zuamning le, na inkhawhnâk le misual nain khawh hna lo kha ka hngalh. Cun lamkaltu an si lo nain lamkaltu ka si â timi hna zong na hneksak hna i lihchimmi an sizia na hngalh cang hna.

³ Cun lungsau ngaiin na in i ka min in na temtuar ngai nain na ba lo.

⁴ Asinain ralchanhnâk kan ngeihmi cu hihi a si, na dawtnâk hmasa na kaltâkmi hi;

⁵ Cucaah na tlûktâkmi kha hngal in i ngaihchih law na tuah hmasa bik kha tuah ṭhân, nâ ngaihchih lo ahcun hmakhat teah na sinah ka ra lai i na meiin vannâk kha a umnâk hmun in ka ṭhial lai;

⁶ Asinain na ṭhatnâk cu hihi a si, Nikolas zultu hna nih an tuahmi na huatmi hi cucu kei zong nih ka huatmi a si.

⁷ “Thlarau nih kawhhran hna sinah a chimmi hi hnâ a ngeimi nih thei ko hna seh. Teitu sinah Pathian Paradis laifang i a ummi nunnâk thing ei awkah ka pêk lai,” tiah a ti.

⁸ “Cun Smirna kawhhran vacungmi sinah hitihin ṭial, Hmaisa bik le Hmahnung bik, a thi cang i a nung ṭhânmi nih hi bia hi a chim.

⁹ “Na tuahmi le na harnâk le na sifahning (a sinain na rum) kha ka hngalh; Judah mi tak si loin Judah mi ka si â timi hna nih an in thangchiat mi zong kha ka hngalh, asinain annih cu Satan sinagog an si,

¹⁰ Na tuardingmi thil kha zei a si hmanhah ṭih hlah. A ngaingai tiah, khuachia nih nan lak i mi cheukhat hniksak dingin thongah an thlâk hna lai i ni hra chung harnâk nan tuar lai. Thih tiangin zumhtlâk in um law, nunnâk bawiluchin kan pêk lai;

¹¹ Thlarau nih kawhhran hna sinah a chimmi hi hnâ a ngeimi nih thei ko seh. A teitu pauh cu thih voihnihnâk nih fahnâk a pe lai lo,” tiah a ti.

¹² “Cun Pergamos kawhhran vancungmi sinah hiti hin ṭial, vainam kaphnihhar a ngeimi nih khan hi thil hna hi a chim.

¹³ “Na tuahmi kha ka hngalh, na umnâk zong Satan bawiṭhutdan umnâk hmun a si kha ka hngalh. Ka min fek tein nâ tlaih i nan lak i ka biahngalhtu zumhtlâk Antipas, Satan umnâk hmun i thah a si lio hmanh ah ka zumhnâk kha na hlaw lo.

¹⁴ Asinain tlawmte ralchanhnâk kan ngei, Balaam cawnpiaknâk pomtu cheukhat nan i umpimi kha a si, anih nih Balak kha Israelmi hna hmaiah tlukrilhnâk chiahpiak in nupa sualnâk tuah ding le milem biaknâk sa ei dingin sualnâk lam a cawnpiak hna.

¹⁵ Cubantuk ṭhimṭhiam in Nikolas zultu hna cawnpiaknâk a pomtu hna zong na umpi hna, cu thil cu ka huatmi a si.

¹⁶ I ngaihchih, culoahcun na sinah ka ra zau lai i ka kâ chung i vainam in ka doh hna lai.

¹⁷ Thlarau nih kawhhran hna sin i a chimmi hi hna a ngeimi nih thei ko seh. A teitu hna cu thuhmi mana cheukhat ei awk ka pêk hna lai. Cun min thar â ṭialnâk lungvar, a cotu dah tilo ahohmanh nih an hngalh lomi kha ka pêk lai,” tiah a ti.

¹⁸ “Cun Thiatira kawhhran vancungmi sinah hitinhin ṭial, Pathian Fapa; meialh bantuk mit a ngei i dartleumi bantuk kephah a ngeimi nih hi bia hi a chim.

¹⁹ “Na tuahmi ka hngalh, na dawtnâk le na rianṭuannâk le na zumhnâk le na inkhawhnâk kha ka hngalh, hmadung bik na ṭuanmi hna cu hmasa nâkin an ṭha deuh.

²⁰ Asinain ralchanhnâk tlawmpal kan ngei, zeicahtiah profet ka si â timi nu Jezebel nih nupa sualnâk tuah le milem biaknâk sa ei awkah ka sal le a cawnpiakmi le a hruaimi kha na dawn lo.

²¹ Cun nupa sualnâk a tuahnâk chungin i ngaihchihnâk cân ka pêk nain â ngaihchih lo.

²² Zawtnâk ihkhun ah ka hlawnh taktak lai i a ih pitu vialte hna zong an i ngaihchih lo ahcun ṭih a nungmi harnâk chungah ka hlawnh hna lai;

²³ A fale zong thihnâk in ka thah hna lai, cun kawhhran vialte nih ruahnâk le lungthin zohtu ka si hi an hngalh lai. Nannih zong nan tuahning cio in mikip sinah kan pêk hna lai.

²⁴ “Cubangin nanmah le Thiatira khua i a ummi hna, cu cawnpiaknâk a pomlo i Satan biathûk an timi a hngal lomi hna sinah thilrit dang kan khinh hna lai lo, tiah kan chimh hna;

²⁵ Asinain nan ngeihcia kha fek tein ka rat hlantiang i tlaih u;

²⁶ Cun teitu le a dongh tiang ka rian a pehzulhtu sinah miphun hna cung i ṭhawnnâk ka pêk lai i

²⁷ thirfung he a uk hna lai. Kei zong nih Ka Pa sinin ka hmuh bantuk in ûmsertu nih tlâk a den bantukin an den hna lai;

²⁸ cun amah cu deirel arfi ka pêk lai.

²⁹ “Thlarau nih kawhhran hna sin i a chimmi hi hnâ a ngeimi nih thei ko seh,” tiah a ti.