BIAPHUAN 16 - Laibaibal Thiang (BSI)

¹ Cuticun ṭempal chungin a thang ngaimi aw nih vanmi pasarih hna sinah, “Kal u law, Pathian thinhunnâk hrai hna cu vulei ah toih hna u,” tiah a ti kha ka theih.

² Cuticun a hmaisa bik cu a kal i hrai cu vulei ah a toih; cun fih a nung ngaimi hmachia kha sahrang chinchiahnâk a ngeimi hna le a lem a biami hna cungah a tlung.

³ Vanmi pahnihnâk nih a hrai cu rili cungah a toih, cun mithi hna thisen bantukin rili kha thisen ah â cang dih; cun rili chung i thilnung vialte an thi dih.

⁴ Cuticun vanmi pathumnâk nih a hraicu tiva le cerhti ah a toih i thisen ah â cang dih.

⁵ Cun ti vancungmi nih hitihin a chim kha ka theih: “Maw Bawipa, Nang cu miding na si, hibantuk in bia na ceih caah a um liomi le a um cangmi le a um laimi cu na si.

⁶ Zeitintiah mithiang hna le profet hna thisen an chuahter, Cun din awkah thisen napêk ve hna. Zeitintiah cucu an cotawk a si,” tiah a ti.

⁷ Cun biakṭheng in midang nih, “Zeizongtuahkho Bawipa Pathian, Na biaceihmi cu a dik i a dingmi a si,” tiah a ti kha ka theih.

⁸ Cuticun vanmi palinâk nih a hraicu ni ah a toih, cun ni cu mei he minung hna emh dingin ṭhawnnâk pêk a si.

⁹ Cun mi hna cu a lin ngaimi nih a emh hna, cun cubantuk hremnâk cungah ṭhawnnâk ngeitu Pathian min cu an thangchiat i Amah kha sunparnâk pêk awkah an i ngaihchih hlei lo.

¹⁰ Cuticun vanmi panganâk nih a hrai cu sahrang bawiṭhutdanh cungah a toih i a pennâk cu muihnâk in a khat; cun an nganfah tuk ah an lei kha an i seh.

¹¹ An hma le an nganfah tuk ah vancung Pathian kha an thangchiat i an tuahmi kha an i ngaihchih hlei lo.

¹² Cuticun vanmi paruknâk nih a hrai cu Zufareiṭes tivapi cungah a toih, cuticun nichuah lei in siangpahrang hna caah lam kha timhlamh a si nâkhnga ti cu an reu dih.

¹³ Cun nal profet kâ chung le sahrang kâ chung le rulpi kâ chungin utlak bantuk thlarau thûr pathum an rak chuah kha ka hmuh.

¹⁴ Zeitintiah cuhna cu khuachia thlarau, hmelchunhnâk a tuahtu, Zeizongtuahkho Pathian ni lianngan i raldohnâk ah pum dingin vawlei cung siangpahrang hna sin i a kalmi kha an si.

¹⁵ Ngaihmanh, mifir bangin ka ra lai, timhcia le ralring tein a ummi cu mithluachuak a si, culoahcun taklawng in a um le a mualpho kha an hmuh sual lai.

¹⁶ Cun Hebru holh in Armageddon timi hmun ah an pumh hna.

¹⁷ Cuticun vanmi pasarihnâk nih a hrai cu thli chungah a toih, cun van ṭempal i bawiṭhutdanh in aw thangngai pakhat nih, “Lîm a si cang” tiah a ti.

¹⁸ Cun awn cukmak in khua a ri i nimtlau â lek, cun fakpi in li â hnin, cubantuk lihnin cu vawlei ah minung an um ri in a um bal lo.

¹⁹ Cubangin khualipi lianngan cu cheuthum ah â cheu, miphun kip khualipi hna zong an cim dih. Cun Babilon khua liangan zong a thinhunnâk hrai din awkah Pathian hmai ah philh a si lo.

²⁰ Cuticun tikulh vialte an zâm dih, tlâng zong hmuh awk an um ti lo.

²¹ Cun van in a ngan ngaingai mi rial, pawng zakhat tiang a ritmi hna nih mi kha a tlâk hna. Rial ruang i hremnâk cu a fah tuk hringhran caah mi hna nih Pathian kha an thang chiat.