BIAPHUAN 13 - Laibaibal Thiang (BSI)

¹ Cuticun rili kam these lakah ka dir i sahrang ki pahra le lu pasarih a ngeimi rili chungin a chuah kha ka hmuh. A ki ah bawi luchin pahra le a lu ah Pathian thangchiatnâk min an um.

² Sahrang ka hmuhmi cu keite bantuk a si i a ke cu vom ke bantuk a si, cun a kâ cu chiandeih kâ bantuk a si. Rulpi nih amah thiltikhawhnâk, bawiṭhutdan le nawlngeihnâk nganpi kha a pêk.

³ Cun alu pakhat cu thihpi tlâk hliamhmâ a put kha ka hmuh, asinain cu thihpi tlâk hliamhma cu a dam. Cun vulei mi vialte nih mak an ti i an zulh,

⁴ Sahrang sin i nawlngeihnâk petu rulpi le sahrang kha an biak i, “Sahrang bantuk hi a hodah a um? Ahonihdah an doh khawh lai?” tiah an ti.

⁵ Cun thil lianngan le Pathian thangchiatnâk hmurkâ a sinah pêk a si i thla 42 chung cubantuk thil tuah dingah cân pêk a si.

⁶ Cuticun Pathian min le a biakthlâm, van i vanmibu hna le Pathian tiangin a thangchiat cuahmah ko.

⁷ Mithiang hna doh i teinâk tiangin nawlpêk a si. Cun miphun kip le holh phunkip le ramkip cungah nawlngeihnâk zong pêk a si.

⁸ Vulei cung i a ummi vialte, vawlei serka i thahmi Tuufa Nunnâk Cauk i minṭial lomi vialte nih amah cu an biak lai.

⁹ Mizei pauh theihnâk dingah hnâ a ngeih ahcun, thei ko seh.

¹⁰ Sal ah a hruaitu pauh cu sal ah an um lai; vainam in mi a thattu cu vainam in thah a si ve lai. Hika ah hin mithinghlim hna inkhawhnâk le zumhnâk a lang.

¹¹ Cun sahrang dang vulei chungin a rak chuakmi kha ka hmuh, tuuki bantuk ki pahnih a ngei i rulpi holh in a holh.

¹² Sahrang hmasa deuh nawlngeihnâk vialte kha a mithmuh ah a hman hna. Lei le a chung i a ummi vialte cu sahrang hmasa deuh thihpitlâk hliamhma a ngei i a dam ṭhânmi kha a biakter hna.

¹³ A liannganmi hmelchunhnâk a tuah tawn, cuticun mizapi mithmuh ah van in mei tiangin a tlâkter.

¹⁴ Cun sahrang hmasa deuh mithmuh ah hmelchunhnâk tuah khawhnâk pek a simi kha vulei cungah a ummi minung hna hlennâk ah hmangin, vainam hliam hma a pu i a dam ṭhânmi sahrang milem kha tuah dingin lei cungah a ummi kha a chimh hna.

¹⁵ Sahrang milem kha bia a chim khawh nâkhnga le sahrang milem a bia lomi pauh a thah khawh hna nâkhnga a sinah thawchuahter khawhnâk nawl pêk a si.

¹⁶ Mi vialte a ngan a hme, mi rum, mi sifak, miluat le sal, an orhlei kut ah maw an cal ah maw chinchiahnâk a ngeihter dih hna lai,

¹⁷ cun sanhrang min le a chinchiahnâk siseh a min nambar a ngeimi dah ti lo nih cun ahohmanhnih zeihmanh an caw in an zuar kho lai lo.

¹⁸ Hika ah fimnâk a um. Theihthiamnâk a ngeimi nih sahrang nambar cu tuak seh, zeitintiah minung nambar a si: A nambar cu 666 a si.