BIAPHUAN 11 - Laibaibal Thiang (BSI)

¹ Cuticun tahnâk ṭhiangṭhunh phairuang kung bantuk hi pêk ka si. Cun vanmi cu a dir i, “Tho law Pathian ṭempal cu biakṭheng hna le a biatu hna he tah hna.

² Asinain ṭempal kulhnâk hnu deuh intual tiang cun tah hlah, zeitintiah cucu Gentel mi hna caah pêk a si cang. Cun annih nih khua thiang kha thla 42 chung an uk lai.

³ Cun ka biahngaltu pahnih hna sinah thiltikhawhnâk ka pêk hna lai, cuticun buri puan aih in ni 1260 chung bia an phuan lai,” tiah a ti.

⁴ Cu hna cu Oliv thing pahnih le mei vannâk pahnih vulei Pathian hmai i a dirmi an si.

⁵ Cun mizei hmanhnih fahnâk pêk an duh tikah ankâ chung in mei a rak chuak i an ral kha a kangh hna. Cubantukin fahnâk pêk a timtu pauh cu hi bangin thah a si lai.

⁶ Hi hna nih chimchung bia an phuan lioah ruahsur lo dingin van phih khawhnâk ṭhawnnâk pêk an si, cun ti kha thisen i canter khawhnâk an ngei i an duh cân pauh ah vulei hi zawtnâk rai phunphun in hrem khawhnâk an ngei,

⁷ An hngalhternâk bia an chim dih in taw a ngei lomi khor chungin a rak chuakmi sahrang nih a doh hna lai i tei in a thah hna lai.

⁸ Cun an ruak kha khua lianngan zatlâng lam, thlarau lei in Sodom le Ezipt an timi ah an suan lai, kan Bawipa an khenhchiahnâk hmun zong kha a si.

⁹ Cuticun mikip le phunkip le, holhkip le miphun vialte nih nithum le a cheu chung an ruak kha an zoh lai i thlân i phum zong an siang hna lai lo.

¹⁰ Vulei i a ummi minung hna cu an i lawm tuk lai i nuamhhnaihnâk kha an tuah lai, lawmhpinâk laksawng kha pakhat le pakhat an i kuat lai, zeicatiah cu profet pahnih hna cu lei i a ummi minung hna harnâk a petu an si caah a si.

¹¹ Cuticun nithum le a cheu hnu ah, Pathian sinin nunnâk thaw kha an chungah a lut i an dir, a hmutu hna kha ṭihnâk nganpi nih a tlaih hna.

¹² Cun van in aw thang ngai a rak chuakmi nih, “Hika hin rak kai uh” tiah an ti hna. Cun minmei lak in van ah an kai i an ral hna nih cat loin an zoh hna.

¹³ Cu lio ah li fakpi in â hnin i khualipi cheuhra cheukhat kha a cim dih. Li hninhnâk ah cun mi 7000 an thi a nungmi hna nih thinphang ngaiin van Pathian cu sunparnâk an pêk.

¹⁴ Cuticun ngaichiatnâk pahnihnâk cu a dih. Ngaihmanh ngaihchiatnâk pathumnâk kha a rak phân cawlh.

¹⁵ Cuticun vanmi pasarihnâk nih a hun tum: Cun van ah khin aw thang ngaiin, “Hi vawlei siangpahrang pennâk hna cu kan Bawipa le a Krih pennâk ah â cang, zungzal in zungzal tiangin a uk lai,” tiah a au;

¹⁶ Cuticun Pathian hmai ah an bawiṭhutdanh i a ṭhumi upa kul le li kha an bawk i Pathian kha an biak,

¹⁷ “Maw Bawipa Zeizongtuahkho Pathian, A um liomi le A um cangmi le A um laimi na si. A liannganmi na ṭhawnnâk i bia na ceih caah lawmhnâk bia kan in chimh.

¹⁸ Miphun hna cu an thin a hung i na thinhunnâk a rak phân ve ai. Mithi hna ca i na biaceihnâk a phâk lioah na sal profet hna le mithiang hna caah ṭuanman na pêk cân a si. Na min a ṭhzahtu milian le mihme hna tiangin vulei hrawktu hna na hrawh hna cân a phân cang,” tiah an ti.

¹⁹ Cuticun van ah Pathian ṭempal cu â ong i a ṭempal chungah a biakamkuang kha a lang. Cun nimtlau â lek i thawngpang a thang, khua a ri, li kha â hnin i a ngan ngaimi rial kha an tla.