2 PETER 3 - Laibaibal Thiang (BSI)

¹ Dawtmi hna, atu hi nansinah ca kan kuatmi hna voihnihnâk a si. (nan ruahnâk thiang ṭhangh ter kha ka timh veve mi cu a si).

² Profet mithiang hna nih an rak chim cangmi le, kannih a lamkaltu hna hmangin Bawipa le khamhtu nawlpêkmi cu nan philh nâkhnga lo ka ṭialmi a si,

³ hihi hngal hmasa u, ni hmadung ah nihsawhtu kha an chuak te lai, anmah duhnâk bangin an ra lai i

⁴ “A ratṭhannâk ding biakam cu khuazeiahdah a um kun? Serhramthawk le pupa hna an i hngilh ri thawk in, zeizong vialte amah ning a si ko rih hi ta,” an ti lai.

⁵ Zeitintiah hi hna hi lungfim tein an i philhter, hlan lio ah Pathian bia in van a rak um i lei zong ti in a rak chuak timi le;

⁶ kha lio cân i vawlei kha ti nih a khuh dih i a lo tlau, timi hi.

⁷ Asinain cubia lila nih atu i van le vawlei hi a tlaih, Pathian zeiah a rel lomi hna cung i biaceihnâk le lohtlaunâk ni caah mei i khangh ding i zuahmi a si.

⁸ Asinain dawtmi hna hi thil pakhat hi philhhlah u; Bawipa ruahnâk ahcun ni khat hi kum 1000 bantuk a si i kum 1000 zong nikhat bantuk a si, ti hi.

⁹ Mi cheu khat nih nuar ngai i an ruah bangin, Bawipa cu a biakam ah a nuar lo, ahohmanh an tlau duh loin, mi vialte i ngaihchih hna seh tiah kanmah leiah a lung a sau caah a si.

¹⁰ Asinain Bawipa ni cu zan i mifir bangin a ra lai, cuni ah van khi fak piin an awn lai i an tlau lai, thil hram hna cu mei nih lo lakin a emh hna lai, vawlei le a chung i a ummi rian vialte hi a kâng dih lai.

¹¹ Cucaah thil vialte a loh dih lai caah, zeibantuk i thiang le Pathian ṭihzah i a um ding dah nan si?

¹² A phân hngami Pathian ni hi rianrang ngai le hngahhlang ngaiin cuan u, zeicatiah cu cân ah van khi mei nih a kangh lai i an lo lai, thil hram vialte hna zong a sa tukmi mei nih ti lak in a emh hna lai.

¹³ Asinain kan nih cu, a kan kamh bantukin vanthar le lei thar, a chung i dinnâk a ummi kha kan i ruahchan.

¹⁴ Cucaah dawtmi hna, cubantuk ruahchannâk cu nan ngeih caah, thûrhnawm lo le sawiawk um loin hngangam te i nan um lio an hmuh khawh hna nâkhnga, teihmâk chuah u.

¹⁵ cun kan Bawipa lungsaunâk cu khamhnâk ah ruat tuah u, kan unau dawtmi Paul zong nih a sin i pêkmi fimnâk bangin nan sin i a ṭial bang khan,

¹⁶ a cakuat dang vialte zongah cubia cu a chim tawn. Cuhna lakah theih a har deuhmi zong an um i cawnnâk a ngei lomi le lungfek lomi hna nih Cathiang dang anmerh bantukin an merh i anmah loh tlaunâk ah an hman tawn.

¹⁷ Cucaah dawtmi hna, nannih nih, hihi nan rak theih chung cang, nan i ralrin lo ahcun misuaksual hna lampialnâk in an in hruaihna lai i fek tein nan dirnâk hmun in nan tlu sual lai;

¹⁸ Kan Bawipa le khamhtu Jesuh Krih zângfahnâk le hngalhnâk ah khan ṭhang ko u. Atu le zungzal tiangin Amah sinah sunparnâk um ko seh. Amen.