2 PETER 2 - Laibaibal Thiang (BSI)

¹ Asinain mi hna sinah profet deu kha an rak um bantukin nanmah lak zongah cawnpiaktu deu an um ve te lai, anmah a tlanhtu Bawipa tiangin an hlawt lai, rawhralnâk ah phâk tertu lam a pialmi cawnpiaknâk cu a thli tein an luhpi lai i cunih cun anmah kha rawhralnâk ah khulrangin a hruai hna lai.

² Cun mi tampi nih cubantuk rawhralnâk lam cu an zulh ve lai i anmah ruangah biatak lam kha thangchiat in a um lai.

³ Hakkauh ruangah hlennâk bia hmangin hlawknâk caah an in hman hna lai, zeitintiah hlan liopi in an cungah biaceihnâk cu a hmun i an rawhralnâk ding zong â hngilh lo.

⁴ Zeitintiah sualnâk a tuahtu vancungmi kha Pathian nih a zuah hna lo, hell chungah a thlak hna i biaceih dingah muihnâk cikcin ṭem buin a chiah hna,

⁵ hlanlio vawlei zong kha a zuah hlei lo; Pathian zeiah a rel lomi hna vawlei ah khan tilian a tlunter. Asinain Noa dinnâk phungchimtu he mi pariat a khamh hna,

⁶ cun Sodom le Gomora zong kha hrawk in, vutcam ah a canter i a hnu i Pathian zeiah a rel lomi hna caah zohchunh awkah a hman.

⁷ Lot miding, a thûrhnawm tukmi misual hna nunning ruangah a ngaih a chiami kha a khamh.

⁸ (cu miding cu an lakah khua a sa i ningcang lo i nifatin an nunnâk le tuahsermi a hmuh le a theihmi nih a dingmi a nunnâk kha a fahter tawn),

⁹ cuticun Bawipa nih Amah ṭhzahtu cu tukforhnâk chungin luatter ning le, miding lomi hna cu biaceih ni caah zuah ning a hngalh.

¹⁰ Cun taksa duhnâk lawng a zul i a thûrhnawmmi hornâk ah a lut i nawlngeitu hna zei i a rel lomi hna cu, fahnâk pêk buin zuah a thiam chin chin. Annih cu poitinâk ngeilo le lungkhongmi an si. Vanlei mi hna chimchiat hmanh an ṭih lo.

¹¹ Ṭhawnnâk le thiltikhawhnâk a ngeimi vanmi hna hmanh nih Bawipa hmaiah, cu hna cu an thangchiat ngam hna lo.

¹² Asinain hibantuk minung, saram ruahnâk hmanh ngei lo, tlaih i thah awk men i a chuakmi hna nih hin, zeidah a si ti hmanh an hngalh lo tiangin bia chia kha an chim, an Ṭhatlonâk ah khan an rawkral te lai i

¹³ an sualman kha an hmuh te lai. Chun ceu zongah zuhmun ah â nuammi an si, nan sin i rawl an ei tikah, anmah hlennâk ding i â nuam sawh sawhmi an si, mi an thûrter i lohtlau tertu an si,

¹⁴ an mit cu ṭangdang kaiduhnâk in a khat i ngol kho lo i a sualmi, lungthin fek lomi an lâk tawn hna. Hakkauh lungput an i ṭhan pi i chiatserhmi fa le an si.

¹⁵ Lamdik cu hnu lei chit in, dinlonâk hlawh zong a duhtu Beor fapa Balaam lam kha zul in an tlau cang;

¹⁶ asinain amah cu a sualnâk ruangah khan sîk a si i a holh kho lomi Lâ cu minung bangin a rak holh i profet hna hruhnâk thil kha a khampiak.

¹⁷ Cumihna cu ti um lonâk tikhor le minmei thli nih a chawih lengmangmi bantuk an si, cu mi hna umnâk dingah an ruahmi cu, zungzal a nakmi muihnâk a si.

¹⁸ Zeitintiah, pakpalawng bia lianngan ngai in an chim tikah a palhmi nunnâk chungin a chuak cangmi hna kha, taksaduhnâk le hornâk chungah an luhpi ṭhân hna.

¹⁹ Mihna sinah zolonnâk an kamh hna i anmah tu cu rawhralnâk sal i a tângmi an si. zeitintiah minung hi a kan teitu pauh salah kan tâng ko.

²⁰ Zeitintiah Bawipa le khamhtu Jesuh Krih an hngalhnâk thawngin vawlei thûrhnawmhnâk hna an chuahtâk hnu ah, cuka ah an tân ṭhân i teiin an um ṭhân ahcun a hmadung deuh an nun cu a hmasanâk in a chiakha deuh.

²¹ Dinnâk lam kong an theih hnu i nawlpêk thiang an sin i chiahmi hnu lei chitnâk cha cun dinnâk lam kong kha hngal loin rak um lawlaw sehlaw an caah a ṭha deuh.

²² Hi phungthlukbia hi an cungah a rak phân, “Uico a luaknâk leiah a kir ṭhân i thiang tein kholhmi vawkpi cu nawncêk ah a kir ṭhân,” timi hi.