2 PETER 1 - Laibaibal Thiang (BSI)

¹ Simon Peter, Jesuh Krih sal le, Lamkaltu nih, khamhtu Jesuh Krih kan Pathian dinnâk thawngin a sunglawimi zumhnâk kan comi bantuk a co vemi hna sinah,

² Pathian le kan Bawipa Jesuh Krih hngalhnâk ah nan cungah zângfahnâk le daihnâk karhter in um ko seh.

³ A sunparnâk le ṭhatnâk thawngin a kan kotu nih, amah hngalhnâk thawngin a ṭhawnnâk in nunnâk caah le Pathian ṭihzahnâk caah a herhmi vialte a kan pêk,

⁴ cu nih cun a ngan tak takmi le a sunglawimi biakam kan sinah a kan pêk cang, cu thawngin Pathian nunning i hrawm kho ve dingin horduh cuainâk ruang i a rawkmi vawlei hi nan hrial khawh lai.

⁵ Hi ruangah hin teihmâk chuah u law, nan zumhnâk ah khan ṭhatnâk telhchih u law, ṭhatnâk ah khan hngalhnâk telhchih u,

⁶ hngalhnâk ah khan i sûmnâk telhchih u law, i sûmnâk ah khan inkhawhnâk telhchih u, inkhawhnâk ah khan Pathian ṭihnâk telhchih u law,

⁷ Pathian ṭihnâk ah khan unau zawnruahnâk telhchih u, cun unau zawnruahnâk ah khan dawtnâk telhchih u.

⁸ Zeitintiah hi hna hi nan ta a si i a karh lengmang ahcun kan Bawipa Jesuh Krih hngalhnâk kongah taklawng le theitlai ngei loin an umter hna lai lo.

⁹ Zeitintiah mizei pauh cubantuk a baumi cu tawite lawng a hmumi mit caw bantuk a si, hlanlio a sualnâk ṭawlpiak a simi hmanh a philh cang.

¹⁰ Cucaah unau hna, kawh nan sinâk le thim nan sinâk hi fehter dingin teihmâk chuah chin chin u, cucu nan tuah ahcun zeitikhmanhah nan tlu lai lo.

¹¹ cuticun Jesuh Krih kan Bawipa le khamhtu nih zungzal ram i luhkhawhnâk cu siangngai in an pek hna lai.

¹² Hiruangah hin biatak hngalhnâk kongah rak fek cang hmanh ulaw, hngalhter ṭhân ding in kâ zuam chin lai.

¹³ Asi, hi thlâm chung i ka um chung pauh cu nan lung lawmhter lengmang hi a ṭha tiah ka ruah.

¹⁴ Kan Bawipa Jesuh Krih nih aka hngalhter bang khan, hi ka thlâm ṭhehcân hi a phân zau lai ti kha ka hngalh.

¹⁵ Ka thihhnu zongah cu thil hna cu nan hngalh pengnâk lai, fakpi in kâ zuam ko lai.

¹⁶ Zeitintiah zer ngai i `awnchawmmi tuanbia zulin, kan Bawipa Jesuh Krih rat`hannâk le a ṭhawnnâk kong hi kan chimmi a si lo, a sunparnâk mit hrimhrim i hmutu kan si.

¹⁷ Zeitintiah Pa Pathian sinin thangṭhatnâk le sunparnâk a hmuh lio ah, Liannganbik sinin aw a rak phân i, “Hihi ka Fapa dawtmi, kâ lawmhnâk bik cu a si,” tiin.

¹⁸ A thiangmi Tlâng i a sinah kan um lio ah khan, vanin cu aw a rami cu kanmah hrimhrim nih kan theih.

¹⁹ Cun chimchung bia a hmânning fehter cangmi cu kan ngei. Ceunâk nih muihnâk hmun a ceuh i khua a dei in nan lungthin i deirel arfi a rak chuah hlanpauh cu, chimchung bia cu biatak i nan ruah ahcun nan ca a ṭha lai.

²⁰ Hihi hngal hmasa u, Cathiang chung i chimchung bia vialte hi pumpak ruahnâk phuannnâk bia men men an si lo,

²¹ Chimchung bia hna hi minung duhnâk in a chuakmi an si bal lo. Pathian mithiang hna nih Thiang Thlarau nih a hngalhter hna ningin an chimmi a si.