2 KORIN 9 - Laibaibal Thiang (BSI)

¹ Mithiang hna caah rianṭuannâk kong tu cu nan sinah ṭial theng a herh lo;

² zeitintiah nan nunsianning kan hngalh ko, Masidonia mi hna sinah, “Akai rammi hna nih kumkhat a liam cangmi ah an timh dih cang,” ti in ka ti hna i kan in hmaihngalpi ngaingai hna. Nan lungthawhnâk nih anmah chung i mi tampi lung zong a thawhter hna.

³ Asinain hi kong ah kan in thangṭhat mi hna hi pakpalawng a si sual nâkhnga lo, timh cia i nan um nâkhnga, unau hna hi ka rak thlah lai.

⁴ Culoahcun Masidonia in mi zeimaw nih an ka zulh sual lai i timh cia i nan um lo an hmuh sual ahcun kannih (nannih kan ti hna lo) nanmah â hmaihngalpitu hi kan ning a zak sual lai.

⁵ Cucaah nan rak i kam cangmi, siangngai i nan pêkmi cu timh cia te i a um nâkhnga, unau hna hi ka rak thlah hmasa lai. Cucaah nan thawhlawm cu hnêkchawm mi si loin siannâk in a chuakmi a si awk a si.

⁶ Asinain hihi ka chim. Tlawmte tuhtu nih tlawmte a zûn lai, tampi tuhtu nih tampi a zûn lai.

⁷ Cuticun mikip nih sianlo buin pe loin, peklo khawh lo i ruah ruang i pe loin, a lungin a timhning cio in pe seh. Zeitintiah Pathian nih lunglawm te i petu kha a dawt hna.

⁸ Cun rian ṭha kha tampi in nan ṭuan khawh nâkhnga le, zeizong vialte tling tein nan ngeih khawh nâkhnga, Pathian nih a zângfahnâk cu nan cungah tam piin an pêk hna lai.

⁹ “A phawtzamh i Sifak hna sinah a pêk, a dinnâk cu zungzal in a hmun,” tiah ṭial a si.

¹⁰ Cubangin thlaici tuhtu sinah thlaici petu, eiawk rawl petu, thlaici petu le karhtertu, dinnâk theitlai karhtertu nih,

¹¹ nansiannâk ruang i zeizong vialte ah an rumter hna nâk thawngin kannih lei zong nih Pathian sinah lawmhnâk bia chim awk kan rak ngei ve.

¹² Zeitintiah hi bomhnâk rian nih hin mithiang hna chamhbaunâk a tlinter lawng si loin Pathian sinah lawmhnâk bia chim awk a liam in a liamter,

¹³ hi rian nih hin, Krih thawngṭha zumhnâk nan pom ning le, anmah le mi vialte ca pêk lei i nan siannâk thawngin Pathian an thangṭhat tawn,

¹⁴ cun nan cungah Pathian zângfahnâk a tamtuk ruangah hin, nanmah ngaih bu in nan caah thla an cam.

¹⁵ Chimkhawhlomi a thilpêk ruangah Pathian sinah lawmhnâk bia um ko seh.