2 KORIN 8 - Laibaibal Thiang (BSI)

¹ Cuhleiah ule nau hna, Masidonia ram i kawhhran hna sinah Pathian nih zângfahnâk a pêk ning hna hi kan hngalhter hna lai,

² kha bantuk harnâk le hneksaknâk nganpi an ton lio ah lawmhnâk i an khah ning le, sifahnâk khor thuk pi chungah an um nain pêknâk i an rum ning kha.

³ Zeitintiah khakha an ti khawh tawk a si, asi, an tikhawh mi pinlei hmanh ah anmah lungtho te i tuahmi an si kha ka hngalhpi hna;

⁴ mithiang hna rianṭuannâk ah i tel ve dingah a nawl in an nawl i an thilpêkmi tiangin kan co hlannâk hnga an kan nawl rih.

⁵ Cun kan i ruahchan lo ningin Bawipa ah an i pe hmasa, cu hnu ah Pathian duh ning tein kan sinah an i pe ṭhân.

⁶ Cuticun hram a rak thawk cang bantukin hi zângfahnâk thilpêk zong hi nanmah zongah tuah ṭhan dingin Titas cu kan nawl.

⁷ Asinain zeizong vialte, zumhnâk ah siseh, biachim ah siseh, hngalhnâk ah siseh, ṭhahnemngaihnâk vialte ah siseh, nankan dawtnâk ah siseh nan rum bantukin hi zângfahnâk rian zong ah rum ve u.

⁸ Nawlpêk bantukin ka chim lo, asinain midang an i biataknâk he cuaithlai in nan dawtnâk hi a tak maw a deu ti hniksaknâk in ka ṭialmi a si.

⁹ Zeitintiah kan Bawipa Jesuh Krih zângfahnâk cu nan hngalh, Amah cu rum hmanhsehlaw, a sifahnâk thawngin nannih nan rum nâkhnga, a si a fak.

¹⁰ Cun hitihin ruahnâk kan cheuh hna, kum khat a liam cangmi i tuah nan rakduh cangmi, a thawk zong nan thawk cangmi kha lanhter ulaw nan caah a ṭha lai,

¹¹ a hramthawk i tuah awkah nan rak timhmi kha lanko in ṭuan ulaw, nan ngeih ning cio in pe u law, ṭhahnem ngai ngaiin tlinter hram u.

¹² Zeitintiah siannâk lungput a um ahcun, mi nih a ngeih lomi si loin a ngeihmi chungin a pêkmi cu cohlan awk a tlâkmi a si.

¹³ Zeitintiah midang thilrit zanter in thilrit khinh kan in timhmi hna a si lo,

¹⁴ asinain ruang tein, nan ngeih a liammi nih an chamhbaunâk a tlinter ahcun, an ngeihliam mi zong nan chamhbaunâk tlintertu a si ve ko lai, cuticun i ruannâk a um kho lai.

¹⁵ “Tampi chartu nih tam a ngei hlei lo i tlawmte chartu chambau in a um hlei lo,” tiah ṭialmi bang khan.

¹⁶ Cuticun nan zawn ka ruahnâk bantuk, Titas thinlung zongah a chiatu Pathian sinah lawmhnâk bia um seh.

¹⁷ Zeitintiah amah cu kan nawlnâk a cohlan ruang lawngah si loin, mi teima a si ruangah amah zuamnâk thawngin amah nawl tein nan sinah rat â tim.

¹⁸ Cun a sinah unau pa ka thlah ve lai, amah cu kawhhran vialte nih thawngṭha ruangah an thangṭhatmi a si,

¹⁹ cu lawng si loin, Bawipa sunlawinâk le timhcia i nan um langhternâk ah hi thil pêk la dingin khual kan tlawnnâk ah i tel ve dingin kawhhran nih an thimmi a si,

²⁰ hi thilpêk tamnawn kan lâknâk ah hin mi sawiselnâk kan ton nâkhnga lo hrial kan timh pengmi a si.

²¹ Bawipa hmuhnâk lawng si loin, minung hmuhnâk zongah â dawh le dawh lo kha kan zoh tawn.

²² Cun anmah sinah kan unaupa hi kan ratter ve lai, ṭhahnem ngaimi a sizia lam tampi in kan hneksak cangmi a si, atu hna ah nanmah kan in bochan hna nâk thawngin ṭhahnem a ngai chinchin.

²³ Titas kong hi an in hal hna ahcun, ka hawikom, nanmah ca i ka rian ṭuanpi hawi a si. Kan unau hna kong hi theih an duh ahcun, kawhhran hna lamkaltu, Krih sunparnâk an si.

²⁴ Cucaah kawhhran hna hmai ah nan dawtnâk rak langhter ulaw nannih zong kan hmaihngalnâk nan si zia a mit hmuh ah rak langhter u.