2 KORIN 7 - Laibaibal Thiang (BSI)

¹ Cucaah ka dawtmi hna, cubantuk biakam cu kan ngeih caah taksa le thlarau thûrtertu vialte chungin i thianter usih law, Pathian ṭih bu tein thianhlimnâk hi tlinter u sih.

² Nan lungthin kan on piak u, aho cung hmanh ah kan palh lo, ahohmanh kan pialter lo i ahohmanh kan hleng fawn lo.

³ Cucu thiamlo kan coter hna nâk a si lo, thih le thihṭi, nun le nunṭi dingin kan lungthin ah nan um peng tiah ka chim cang kha.

⁴ Nan sinah ralṭha in bia kan chim ngam, kan hmaihngalnâk bik nan si. Hnangamnâk in ka khat. Kan harnâk vialte zongah lunglomhnâk in kan khat tawn.

⁵ Zeitintiah Masidonia ram i ka rat lio zongah, kan pum cu â din manh hrimhrim lo, kap kip in buaiter kan si zungzal. Lenglei ah i sualnâk hna a um. chunglei ah ṭihphannâk a um fawn.

⁶ Asinain ngaichia mi hna hnemtu Pathian nih Titas a ratnâk nih ka hna a ngamter,

⁷ a ratnâk lawng si loin nanmah ruang i a hnangamnâk nih aka lawmhter ngai ngai, nanka ngaih ning le, nanka tuarpi ning le kan ca i ṭhahnem nan ngaih ning hna a kan chimh i cu nih cun ka hna a ngamter chinchin.

⁸ Ka cakuatmi nih nan lung a fahter tiah hngalh hmanhning law, kâ ngaihchih lo. A hramthawkah cun kâ ngaihchih. Zeitintiah kha cakuat nih khan cân toi te lawng nan ngaih an chiatter hna, tiah ka hngalh.

⁹ Atu ahcun kâ lawm cang: ngaihchiatter nan si ruangah si loin, nan ngaihchiatnâk nih ngaihchihnâk i an hruai hna caah a si. Pathian duh ningin ngaihchiatter nan si ah khan kanmah lei ah sunghmi zeihmanh nan ngei lo.

¹⁰ Zeitintiah Pathian duhning i ngaihchiatnâk nih khamhnâk dingah ngaihchihnâk a chuahpi, cucu i ngaihchih awk a si hrimhrim lo. Vawlei ngaihchiatnâk nih cun thihnâk ah a phâkter.

¹¹ Pathian duhning i ngaihchiatnâk nih a chuahpi mi hna cu hun zoh hna u sih law; taihmâknâk, mah le mah kilvennâk, sual huatnâk, sual tuah ngamlonâk, ṭhatnâk lei duhnâk, ṭhahnem ngaihnâk, sual dântat duhnâk te hna an ngeihter hna. Hi thil vialte hna chungin chuah nan si zia hi nan hngalh.

¹² Cucaah nan sinah ṭial hmanh ning law, sualnâk tuahtu kha ka ṭial hnawhmi a si lo, sualnâk tuahtu nih a tem in ruang i ka ṭialmi zong a si lo. Pathian hmai ah zeitlukindah nan zawn kan ruah tiah nan hngalh nâkhnga ka ṭialmi a si.

¹³ Cucaah hnangam tein nan umnâk nih kannih zong kan hna a ngamter. Nan dihlak in Titas thlarau nan tharthawh piaknâk ruang i â lawmhnâk nih kannih zong a kan lawmhter chinchin.

¹⁴ Zeitintiah Titas sinah ka hmaihngalnâk nan si zia ka rak chim a si zongah, ka ning a zak lo. Nan sinah thil vialte biatak i kan chim bangin Titas sin zongah kan hmaihngalnâk nan si zia kan chimmi hi biatak a si.

¹⁵ Nan dihlak i nawl nan ngaihning le, ṭih le phân bu i amah nan cohlannâk cu a philh lo, an tlaihchan chinchin hna.

¹⁶ Cucaah zeithil pauh ah kan in bochan hna caah hin kan i lawmh khunnâk cu a si.