2 KORIN 6 - Laibaibal Thiang (BSI)

¹ Cuticun Pathian zângfahnâk nan hmuhmi hi santlai lo i nan canter nâkhnga lo Amah ṭuanpitu ah kan sawm hna.

² “Cânsunglawi ah kan ngaih ko i khamhnâk ni ah kan bomh,” tiah a ti. Ngaihmanh u, atu hi cânsunglawi cu a si i ngaihmanh u, atu hi khamhnâk ni cu a si.”

³ Kan ṭuanmi rian hi sawi a tonnâk hngalo mi ruahnâk thurter ding thil zeihmanh kan tuah lo.

⁴ Pathian rianṭuantu sinâk he â tlakin zeithil pauh ah mi mit hmai kan zoh tawn. Thinfual te i teminnâk, harnâk, chamhbaunâk, vansannâk ah siseh,

⁵ tuknâk, thongtlaknâk, buaibainâk, zângba i ṭuannâk, mitkuh vuai lonâk, rawlulhnâk,

⁶ thiannâk, hngalhnâk, lungsaunâk, velngeihnâk, Thiang thlarau, dawtnâk taktak,

⁷ biatak bia ah, Pathian ṭhawnnâk, orh lei keh lei i dinnâk ralthuam ah,

⁸ thangṭhatnâk le mualphoternâk, chimchiat le thangṭhatnâk hna ah; hlengtu bantukin, mi dik ngai si ṭung in,

⁹ mi hngalhlo mi bangin, min thangngai ṭungin, thi dengmang in, asinain kannung, chimhhrin tongin, thah ṭung loin,

¹⁰ ngaihchia bangin, i lawmpeng ṭungin, sifak mi bangin, mitampi rumter ṭungin, zeihmanh ngei lo bangin, zeizong vialte ngei ṭungin kan um tawn.

¹¹ Maw, Korin mi hna! Kan lungthin zong chuahdihin nan sinah i ong ngaiin bia kan chim lai.

¹² Kannih nih kan in kham hna lo, nanmah le nanmah tu nan i kham.

¹³ Cubangin nansin i kan tuah bantukin nannih zong kanmah leiah i ong ve u. (fa le sin i chim bangin ka chim)

¹⁴ Zumlotu hna he ruang lo ngaiin hngawngkual banhṭi hlah u. Dinnâk le dinlonâk nih zeidah an i hrawm khawh? Asilo ah muinâk le ceunâk nih zeidah pehtlaihnâk an ngeih.

¹⁵ Krih le khuachia nih zeitindah lungkhahnâk an ngei khawh lai? Asiloah zumtu le zumlo tu nih zeidah an coṭi khawh mi a um?

¹⁶ Pathian ṭempal le milem nih zeidah remnâk an ngeih? Nannih cu Pathian nung ṭempal nan si. Pathian nih hitihin a chim, “An sinah ka um lai i an lakah khua ka sa lai. An Pathian ka si lai i annih cu kami le an si lai.”

¹⁷ Cucaah, an sinin rak chuak ulaw, a dang tein um u, tiah Bawipa nih a ti. A thûrmi tawng hlah ulaw kan lawmh hna lai.

¹⁸ “Nan ca Pa ka si lai i ka caah fanu fapa nan si lai, BAWIPA, Zeizongtuahkho nih a ti.