2 KORIN 4 - Laibaibal Thiang (BSI)

¹ Cucaah zângfahnâk kan hmuhning cio in hi rian hi kan hmuh bangin kan lung a dong bal lo.

² Ningzah awktlak thuhmi thil hna kha kan hlawt hna, zernâk in kan nung lo, asiloah Pathian bia hi zatlâng hlennâk ah kan hmang fawn lo, Pathian hmai ah biatak cu phuangin mikip chiaṭha hngalhnâk le mit hmuh ah zoh a dawh maw ti hi kan conhmi a si.

³ Asinain kan thawngṭha hi khuh in a um ahcun, a tlau cuahmah mi caah khuh in a um tawn.

⁴ Krih, Pathian muisam, a liannganmi thawngṭha ceunâk nih a ceuh khawh hna nâkhnga lo hi vawlei pathian nih zumlotu ruahnâk kha a cawtter.

⁵ Zeitintiah kanmah kong kan chim lo, Krih Jesuh Bawi a sinâk le, kannih hi Jesuh ruang i ṭemchihmi nan sal kan sinâk hi kan chim.

⁶ Zeitintiah Jesuh Krih muihmaiah khan Pathian sunpar ning hngalhnâk ceu cu a kan pêk nâkhnga muihnâk chungin ceunâk pe ding i nawlpetu Pathian nih kan lungthin hi a ceuter.

⁷ Asinain ṭhawnnâk cungnung cu kanmah in a chuakmi si loin Pathian i a chuakmi a si zia langhter dingin, cu ro cu hi tlak ûm chungah hin kan chiah.

⁸ Kapkip in dihchih kan si nain, kan kuai lo, a ruah awk kan hngal lo nain kan lung a dong lo.

⁹ serhsat kan si nain kaltâk kan si bal lo, tlu lak in tuk kan si nain hrawh kan si bal lo.

¹⁰ Jesuh nunnâk hi kan taksaah a langh khawh nâkhnga Jesuh thihnâk zong kan taksa ah kan i put.

¹¹ Jesuh nunnâk cu kan taksa ah hin a langh khawh nâkhnga, kan nih a nungmi hna hi Jesuh thawngin thi ding i tlaih in kan um tawn.

¹² Cuticun kanmah ah thihnâk in a ṭuan nain nannih tu ah cun nunnâk in a ṭuan tawn.

¹³ Cun thlarau i zumhnâk pakhat kan ngeih ruangah, kan zumh ning te in kan chim tawn. “Ka zumh caah, bia ka chim,” tiah ṭialmi bang khan.

¹⁴ Bawipa Jesuh thawhtertu nih kan nih zong Jesuh sinah thawhter kan si ve lai, nanmah he a kan pumh te lai ti kha kan hngalh.

¹⁵ Zeitintiah thil vialte hi nanmah ṭhatnâk dingah a si, zângfahnâk cu mi tampi sinah a karh chin chin lai i Pathian sunparnâk dingah lawmhnâk biachimnâk zong a tam chinchin ko lai.

¹⁶ Cucaah kan lung a dong bal lo. Lenglei kan minung sinâk hi lo tlau cuahmah hmanhsehlaw, kan chunglei minung cu ni fatin tharchuah lengmang a si.

¹⁷ Atu mitṭhep chung i harnâk hmete kan teminmi hi, tahchunh khawh lomi zungzal sunparnâk i a kan luhtertu an si.

¹⁸ Hmuhkhawhmi thil lawng zoh loin, hmuhkhawh lomi khi kan zohmi cu a si. Zeitintiah hmuhkhawhmi hi cânkhat ca lawng a si i hmuhkhawh lomi cu zungzal ca a si.