2 KORIN 3 - Laibaibal Thiang (BSI)

¹ Mahle mah thangṭhat kan thawk ṭhan hawi maw? Asiloah cheu khat bantukin thangṭhatnâk câ ṭialpiak hna kan herh ve hnga maw?

² Nanmah hi dah kaw ka ca kuat, kan lungthin i ṭialmi, mi vialte hngalh le rel nan si cu,

³ fiang tein nanmah hi Krih cakuat, a kan `ialter mi, cahang i ṭialmi si loin, Pathian nung Thlarau i ṭialmi, lung cung i ṭialmi zong si loin, lungthin catlap cung i ṭialmi cu nan si cu.

⁴ Cubantuk zumhnâk cu Pathian leiah Krih ah kan ngei

⁵ Thil vialte hi kanmah lei in a tling dih kan tinâk si loin, kan tlinnâk cu Pathian sinin a si,

⁶ Amah lila ah biakam thar rianṭuantu ah a kan tlinter, câ chung bia men i rianṭuantu si loin, Thlarau riantuantu ah a si deuh. Câ chung bia men nih cun mi a thah i Thlarau nih cun a nunter.

⁷ Thihnâk rianṭuannâk, lung cung i ker le ṭialmi hmanh a sunlawi i alo zau dingmi Moses mui sunparnâk a langmi ruangah Israel mi hna nih an zoh ngam lo a si ahcun,

⁸ Thlarau in rianṭuannâk cu zeitlukindah a sunlawi chinchin lai?

⁹ Thiamlocoternâk rianṭuannâk hmanh a sunlawi ahcun, dinnâk rianṭuannâk cu a let tampi in a sunglawi chinchin lai.

¹⁰ Zeitintiah sunglawi ngaiin rak um cang hmanhsehlaw, hika ah cun a sunglawi kho ti lo, zeicatiah sunlawinâk ah a lonhtu a um cang.

¹¹ A lo cuahmah mi hmanh a sunlawi ahcun, a hmun ding cu tampi in a sunglawi chinchin lai.

¹² Cubantuk ruahchannâk kan ngeih caah, ralṭha in bia kan chim ngamnâk hi a si.

¹³ Moses he kan i lo lo; Isarel hna nih a ceumi a mui a dongh tiangin an zoh peng nâkhnga lo puan in a hmai â khuh.

¹⁴ Asinain an ruahnâk cu cawtter a si. Zeitintiah nihin ni tiangin Biakam hlun an rel tikah hmaikhuhnâk cu ong loin a um peng, cu hmaikhuhnâk cu Krih ah lak a si cang.

¹⁵ Asinain nihin ni tiangin Moses cauk an reltik ah an lungthin ah hmai khuhnâk cu a um peng ko rih.

¹⁶ Bawipa lei i an i mer tikah, hmaikhuhnâk cu lak piak an si.

¹⁷ Bawipa cu Thlarau a si i Bawipa Thlarau umnâk pauh ah zalonâk a um tawn.

¹⁸ Asi kan nih cu hmaikhuh loin Bawipa sunparnâk cu thlalang i kan hmuh bangin kan zoh, Amah muisam keng dingin, Bawipa Thlarau nih sunparnâk in sunpar chinchin nâkah thlen in kan um cuahmah lio a si.