2 KORIN 2 - Laibaibal Thiang (BSI)

¹ Asinain ngaihchia buin nan sin i rat ti lo dingin biakhiahnâk ka tuah cang.

² Zeitintiah nan ngaih kan chiatter hna ahcun a ka lawmhtertu dang, nan ngaih a chiatnâk cu dah ti lo cu an um hlei hnga maw?

³ Hihi câ ka ṭial chan cu a si, culoahcun ka rat tikah, ka lunglomhnâk dingah, ngaihchiatnâk tu ka hmuh sual lai, kâ lawmh taktak ahcun nan dihlak lawmhnâk zong a si lai, tiah ka zumh.

⁴ Zeitintiah mitthli tla thluahmah in lungthin i hrum ai le lungfak taktak buin hi ca hi ka ṭialmi a si, nanmah ngaihchiatnâk ah si loin, zeitluk tam in dah kan dawt hna tiah nan hngalh nâkhnga caah a si.

⁵ Asinain mi pakhat nih ngaihchiatnâk a chuahter ahcun, keimah lawng ngaihchiatter lo in nangmah ngaihchiatter zong a si, asinain luantukin afah sual nâkhnga lo, ka timi a si.

⁶ Hi dântatnâk mi tampi nih nan tuahmi hi cubantuk mi caah cun â za ko,

⁷ cuticun nan rak ngaihthiam lehlam i a hna nan ngamter cang, culoah cun ngaihchiatnâk nih cupa cu a dawlh sual lai.

⁸ Cucaah amah nan dawtnâk tu kha fehter ṭhân ulaw kaduh.

⁹ Cucu hi ca ka ṭial chan zong a si, thil vialte ah nawl nan ngaih le ngaih lo kan hniksaknâk hna can zongah a si.

¹⁰ Cubangin zeithil pauh ah nan ngaihthiammi cu, kei zong nih ka ngaihthiam ve. Keizong nih zeithil pauh ka rak ngaihthiam ahcun nanmah caah Krih hmaiah ka ngaihthiam.

¹¹ culoahcun, Satan nih cânrem laknâk ah a kan hmansual lai; a hlenthawinâk cu kan hngalh ko.

¹² Cuhleiah Krih thawngṭha chimding in Troas khua ka phâk ah khan Bawipa nih lam a ka on piak,

¹³ ka unau pa Titas cu ka hmuh lo ruangah ka thlarau cu aidin kho lo; asinain annih cu kaltak in, Masidonia ah ka kal.

¹⁴ Cuticun Krih i teinâk chungah a ka hruaitu Pathian sinah lawmhnâk bia ka chim; kanmah hmangin Amah hngalhnâk rimhmui cu ka kipah â chawk.

¹⁵ Zeitintiah khamhlio mi le a tlau liomi hna caah Pathian caah Krih rimhmui kan si.

¹⁶ Bu khat caah thihnâk i hruaitu ding thihnâk rim kan nam, bu khat lei caah nunnâk i hruaiding ah nunnâk rim kan nam ṭhân. Cubantuk caah a hodah a tling kho hnga?

¹⁷ Zeitintiah mi tampi nih Pathian bia hi chawlehnâk i an hman bangin kannih nih cun kan hmang ve lo; biatak tein; Pathian thlahmi kan si bangin Pathian mithmuh ah Krih ah bia kan chim tawn.