2 KORIN 11 - Laibaibal Thiang (BSI)

¹ Ka hruhdeuh hmanh ah ka ing hram u, asi in zong nanka in ko.

² Zeitintiah Pathian hnahchuahnâk in dah kaw kan hnahchuah hna. Krih sinah cun ngaknu thiang bangin kan pêk khawh hna nâkhnga va pakhat kan ham piak hna.

³ Asinain rulnih a fimzernâk in Evi a hlen bantukin Krih i tluangtlam te i nan umnâk chungin nan ruahnâk kha a hrawh sual lai ti kha ka phang.

⁴ Zeitintiah kan in chimhmi hna si loin, Jesuh dang chim ah a rami hna kha nan rak cohlan hna, nan co bal lomi thlarau nan co i na cohlan bal lomi thawngṭha dang zong nan rak co hlan ko mu!

⁵ Zeitintiah cu lamkaltu ngan hna nâk in ka hme deuh lai tiah ka ruat hrimhrim lo.

⁶ Biachim leiah cawnnâk ngeihlah hmanh ning, hngalhnâk ah cun ka si lo dah kaw. Lamkip in nan sinah kan langhter cang.

⁷ Asiloah hlawh ngeilo in nan sinah Pathian Thawngṭha ka chim i cawisan nan si khawh nâkhnga kâ niamter mi kha ka rak palh maw?

⁸ Nan sin i rian ka ṭuan lio ah khan kawhhran dang chawva kha la in cawmnâk ka rak hmuh.

⁹ Cun nan sin i ka um lio i chambau i ka um ah khan ahohmanh thilrit ka khinh hna lo; Masidonia ram i a rami unau hna nih ka herhmi anka rin dih. Cun nan caah thilrit ka si lonâk dingah thilvialte ah keimah te kâ zohkhenh tawn. Cubantukin kâ zohkhenh lengmang ko lai.

¹⁰ Krih biatak keimah i a um bangin Akai ram in ka hmaihngalnâk chungin ahohmanh nih anka thlauh kho lai lo.

¹¹ Zeiruangah? kan dawt hna lo ruangah maw? Pathian nih a hngalh!

¹² Asinain mi cheukhat cu kanmah bantukin langh an i tim i an hmai a hngal tawn, asinain cubantuk mi hna nih cânrem an ngeih nâkhnga lo ka tuah tawnmi hi ka tuah peng lai.

¹³ Zeitintiah cubantuk hna cu lamkaltu deu, mihlenhmang, lamkaltu bangin â umtermi an si.

¹⁴ Cucu khuaruahhar awk a si lo! Satan hmanh ceunâk vancungmi bantukin â umter khawh ko.

¹⁵ A rianṭuantu hna zong dinnâk rianṭuantu bangin i umter hna hmanhsehlaw khuaruahhar awk a si lo. An tuahning tein an dongh te ko lai.

¹⁶ Ka chim rih lai, ahohmanh nih mi hrut ah ka ruat hna hlah seh, an ka ruah a si ahcun, tlawmte tal ka hmaihngal ve nâkhnga, mihrut bangin rak ka cohlang hna seh.

¹⁷ Ka biachim hi Bawipa bangin ka chim lo, mihrut bangin ka hmaihngalnâk le ralṭhatnâk in ka chim.

¹⁸ Mi tampi nih thisa in an hmai a hngal bangin kei zong ka hmaihngal ve lai.

¹⁹ Zeitintiah mifim nan si i mihrut hna cu lunglawm in nan in khawh hna.

²⁰ Zeitintiah minih salah in chia hna sehlaw, in ei dih hna seh, inhleng hna seh, amah le amah i hlawrhseh, nan hmai ah in beng hna seh, nan in ko rih hna lai.

²¹ Kan thazâng a der ti hi a chimhmanh ningzak a si! Asinain mi nih zeithil pauh ah a ngamh ahcun hruhbia in chim ning law, kei zong nih ka ngamh ve.

²² Hebru mi a si maw? keizong ka si. Israel mi an si maw? kei zong ka si. Abraham fale an si maw? keizong ka si.

²³ Krih rianṭuantu an si maw? Hruhbia in chim ning law, ka si deuh, anmahnâk in ka ṭuan deuh, a hleiin tuk ka ton, atu le atu thong ka tla, thihnâk hmunah voi tampi.

²⁴ Judahmi hna sinin ṭum khat ah voi sawmli, voikhat i tling lo in ṭum nga tuk ka ton.

²⁵ Voithum fung in anka tuk, voikhat lungin anka cheh; voithum tilawng rawhnâk ka ton, zankhat le nikhat rili cungah ka tâng.

²⁶ Ka khual tlawnnâk ah voi tampi ti lak i ṭihnung, damiah lak i ṭihnung, ka phunhawi chungin ṭihnung, Gentel hna chungin ṭihnung, khuapi chungin ṭihnung, ramcar i ṭihnung, rilipi chungin ṭihnung, unau deu hna chungin ṭihnung;

²⁷ zânghlei cawi i thabat tuk le buhrinâk ah voitampi, mitkuh vuailonâk ah, rawlṭam tihalnâk ah, voitampi rawlulhnâk ah, taklawng i khuasik temtuarnâk ah,

²⁸ hi vialte hna hlei ah kawhran hna zawn ka ruahnâk thilrit nih nifa te a ka nenh.

²⁹ Thazâng dermi hram lo in ka um bal maw? Mi an tluk tikah zawnruahnâk ngei lo in ka um bal maw?

³⁰ Hmaihngal ding ka si ahcun, ka thazâng dernâk tu hi ka hmaihngal pi hna lai.

³¹ Kan Bawipa Jesuh Krih Pa le Pathian zungzal i thangṭhat mi nih cun lih ka chim lo ning hi a hngalh.

³² Damaska khua ah khan siangpahrang Aretas tang i mangki bawi nih khan tlaih a ka timh i Damaska mi hna kha khualipi a conghter hna,

³³ asinain thlalang awngin hau pawngah bawmrângin an ka ṭhumh i a kut chung in kâ zûk kho.