2 KORIN 10 - Laibaibal Thiang (BSI)

¹ Cubangin keimah Paul, hmaitonh i ralchia, langhlat i nan hmai ah a ral a ṭha ngaimi nih Krih lungnemnâk le nunnemnâk in kan nawl hna.

² Nansin i ka rat tikah, thisa ngai i a nungmi ah a ka ruattu hna lakah ralṭha ngai i um ka timhning i um a herh sual nâkhnga lo kan nawl hna.

³ Zeitintiah thisa in um hmanh usihlaw, thisa bangin kan i doh lo.

⁴ Kannih ral dohnâk ralthuam hna cu taksa thil an si lo, a fekmi ralhruang chimkhotu Pathian ṭhawnnâk tu a si,

⁵ elhniahnâk le a sangmi thil, Pathian hngalhnâk dawntu dingah â santer chawmmi hna cu hrawk in, khuaruahnâk vialte hna cu Krih nawlngaihnâk sal ah kan luhpi tawn,

⁶ cun nawl nan ngaih dih hnu ah, nawl ngai lomi vialte hrem dingin timhcia in kan um.

⁷ Lenglei a langhning lawngin maw thil nan conh tawn? Mi zei pauh nih Krih ta ah â ruah ahcun amah cu Krih ta a si bangin kannih zong Krih ta kan si ve timi hi ruat ṭhân seh.

⁸ Zeitintiah kan nawlngeihnâk, nanmah hrawhnâk si loin, kanmah remhnâk ca i Bawipa nih a kan pekmi hi hmaihngal pi hmanh ninglaw, ka ning a zak lai lo.

⁹ Culoahcun, cakuat in nanmah ṭhih â timmi ka lo sual lai.

¹⁰ “Zeitintiah a cakuat hna cu a rit i a ṭhawng, a pumtu cu a nêm taktak, a phungchim le zomhtaih awk tlâk,” nan ti fawn.

¹¹ Cubantuk mi nih cun hihi ruat seh, nan sin kan rat hlan i kan ca kuat ningte khan kan rat tik zongah kan tuah lai.

¹² Zeitintiah mah le mah â thangṭhatmi hna sinah cun kâ telhchih ngam lo, anmah he kan i tahchunh ngam fawn lo. Annih cu anmah le anmah an i tahchunhtawn, an hrut ngai.

¹³ Kan nih tu cu Pathian nih kan ṭuannâk ding eria chung hlei in hmaihngalpi awk kan ngei lo, nannih zong cu eria nih cun an khumh chih hna.

¹⁴ (Kan nawl ngeihnâk nih an khumhchih hna lo bantuk in) kan eria a si lomi eria bantuk i kan ruah si loin, nan sin tiangin Krih thawngṭha chim i kan rat kha;

¹⁵ kan ṭuanmi hlei in midang rianṭuanmi kan i hmaihngal pi lo, asinain nan zumhnâk a ṭhanchoh bantukin nanmah thawngin kan eria hi a kau chinchin lai tiah kan i ruahchan,

¹⁶ nan ram pinlei tiangin thawngṭha hi kan chim lai, cun eria dang mi ṭuan ciami cu kan i hmaihngalpi lai lo.

¹⁷ Sihmanhsehlaw, “Hmaihngal a duhmi pauh nih Bawipa kha i hmaihngal pi seh.”

¹⁸ Zeitintiah mah le mah i thangṭhat cu conglomh an tong bal lo. Bawipa nih a thangṭhat ahcun conglomh a tong deuh lai.