1 PETER 3 - Laibaibal Thiang (BSI)

¹ Nupi le hna, nan va le sinah i pe u, nan va le lakah Pathian zum lomi an um zongah, holh lo zongin, nun ningin an nupi le nih an tei khawhnâk ding ahcun,

² anmah ṭihzahnâk he nun thianghlim tein nan um an in hmuhnâk ah hin a si.

³ Nan i ṭamhnâk zongah, lenglei ṭamhnâk, sam a hlei hluat i tuah le, sui ṭhi awih le, thil man tamtuk in i ṭamh lo in-

⁴ lungthin chung muru ah minung nun â phummi, ruahnâk tluangtlam le nunnemnâk kha, thilthuam ṭha le rawkkho lo cu a si, cucu Pathian hmuhnâk ah a sunglawimi cu a si.

⁵ Zeitintiah cubantuk in dah kaw hlanlio pi ah a thianghlimmi nu hna nih an va le nawlngai in an i ṭamh tawn kha.

⁶ Sarah zong nih Abraham nawl kha ngai in ‘bawipa’ ti tiangin a rak kawh. Nannih zong nih thilṭha nan tuah ahcun ṭih awk zeihmanh nan ngei lai lo i Sarah fanu nan si lai.

⁷ Cubantukin nannih va le hna theihthiamnâk he nan nupi le sinah um i zuam ulaw, nan thlacamnâk dawntu a si nâkhnga lo, kuai a fawideuh mi ûm an si kha hngal in upat hna u, zângfahnâk nun nan co pimi an si.

⁸ A hnu bik ah nan dihlak in ruahnâk hmunkhat in um ulaw vêl i ngeih hna u, unau bangin i daw u, zângfahthiam le toidornâk tein um u;

⁹ sual cu sual lila in lehrul hlah u; siknâk zong siknâk lila in lehrulh ding a si lo, thluachuah tu pe lehlam u. Cubantuk tuah awkah kawhmi nan si; cuticun thluachuahnâk nan hmuh lai.

¹⁰ Zeitintiah, “Nunnâk a daw i ni`ha hmuh a duhmi nih, sual lakah a lei kilveng sehlaw, ahmur zong hlennâk bia chim lo dingin kilveng seh.

¹¹ Sual kaltâk in thil ṭha tuah seh, daihnâk kawl law dawi thluahmah,

¹² Zeitintiah Bawipa mit cu miding hna cungah â fu i a hna zong an thlacamnâk ngaih awkah â chit. Asinain Bawipa hmai nih Ṭhatlonâk tuahtu hna a ralchanh tawn,” tiah ti a si.

¹³ Cun ṭhatnâk zultu na si ahcun fahnâk an petu ahodah an si lai?

¹⁴ Asinain dinnâk ruangah nan tuar ahcun nan i lawm lai. ṭih an i nun termi ṭih hna hlah u law, buai hlah u.

¹⁵ Bawipa Pathian kha nan lungthin ah thleidang ulaw, nanmah i nan ngeihmi ruahchannâk kong an haltu hna pauh lungnemnâk le hmaizah awktlâk i leh awkah timhcia tein um u.

¹⁶ Chia le ṭha hngalhnâk thiang ngei u, cuticun ṭhatlonâk tuahtu bangin puh an in timh mi hna cu, Krih i â dawhmi nun in nan umnâk nih an ning a zahter hna lai.

¹⁷ Zeitintiah sualnâk tuah ruang i tuarnâk cha cun, Pathian duhnâk a si ahcun, thilṭha tuah ruang i tuar hi a ṭha deuh.

¹⁸ Zeitintiah Krih cu kan sualnâk ruangah voikhat a thi, cuticun miding nih miding lo caah a tuar, cucu Pathian sinah a kan hruai khawhnâk ding a rak si, taksa in thihter a sinain Thlarau in nunter a si,

¹⁹ Amah nih thongchung i a ummi thlarau hna sinah kal in phung a chimh hna,

²⁰ cuhna cu Noa nunlio i tilawng a sak chung vialte Pathian nih lungsau in a hngahmi hna zumduh lotu kha an si, cu tilawng ah cun mi tlawm te, mi pariat lawng kha ti khan khamh an si.

²¹ Cu thil nih a langhter chungmi baptisma in Jesuh Krih thawhṭhannâk thawngin atu ah khamh kan si. Cu baptisma cu taksa thurhnawmmi thenh men hi si lo in chiaṭha hngalhnâk thiang he Pathian kan lehnâk hi a si.

²² Amah cu vanah a kai i Pathian orhlei ah um in; van mi hna le, nawlngeihnâk le, ṭhawnâk hna cu Amah tangah chiahdih an si.