1 PETER 2 - Laibaibal Thiang (BSI)

¹ Cucaah ruahnâk ṭha lo, hlennâk, zernâk, hnahchuahnâk le, bia ṭha lo vialte hna kha ngol cang u law,

² ngakchia chuakkâ bantukin, zeihmanh cawh lomi hnûk (Pathian) bia hi duh u, cu thawng cun nan ṭhang lai,

³ Bawipa cu zângfahthiam a si zia nan teh taktak ahcun.

⁴ A nungmi lung, minung hlawtmi, asinain Pathian thimmi le a sunglawimi Amah sinah ra in,

⁵ nannih zong a nungmi lung bangin, Jesuh Krih thawngin, Pathian cohlan awktlâk in thlarau lei raithawinâk kha pe in, a thiangmi tlângbawi, Pathian umnâk ding i sakmi nan si.

⁶ Cucaah Cathiang nih, “Zohhmanh, Zion ah, A biapi bik in thimmi a kil-lung, a sunglawimi cu ka chiah. Amah zumtu cu a mualpho lai lo.” tiah a ti.

⁷ Cucaah nannih a zumtu ca ah a sunglawimi a si, asinain a zumlotu caah cun a sunglawi lo. “Insatu hna nih an hlawtmi lung kha a biapi bikmi lung a rak si,”

⁸ “Tluknâk lung le rilhnâk lungpi kha.” Bia an zumh lo ruangah an tlu i cubang i um awkah ruahmi zong an si.

⁹ Asinain nannih cu thimmi miphun, siangpahrang tlângbawi, miphun thiang, a hleiin Amah mi nan si; cucu a mak ngaimi a ceunâk i lut dingah muihnâk chungin an kotu hna Amah cu nan phuan khawh nâkhnga;

¹⁰ hlan ah minung hmanh nan rak si lo, asinain atu ah Pathian minung nan si cang, hlanah vêl nan rak hmu bal lo, asinain atu cu vêl nan hmuh cang.

¹¹ Dawtmi hna khual le khualtlawng men nan si caah, thlarau ralchanhtu thisa duhnâk kha ngol dingin kan nawl hna.

¹² Gentel mi hna sinah upat awktlâk in nung u, cuticun minih thil ṭha lo tuahtu bangin nan thang an chiat zongah, thil ṭha nan tuahmi an hmuhnâk thawngin Pathian nih a veh hna ni ah an thangṭhat ve lai.

¹³ Cucaah Bawipa ruangah minung sermi phung tangah um ko u, cungnung bik siangpahrang bantuk a si zongah,

¹⁴ ram uktu hna an si zongah, misual hremtu dingah an thlahmi an si zongah, thilṭha tuahtu hna thangṭhattu dingah an thlahmi an si zongah, cu hna sinah nan i pêk awk a si.

¹⁵ Zeitintiah thilṭha nan tuahmi nih hngalh lo ruang i mihrut bangin a ummi hna dai tein a umter hna kha Pathian duhmi a si,

¹⁶ a luatmi bangin, asinain nan luatnâk cu sualkhuhnâk ah hmang loin Pathian sal sinâk tu-ah hmang u.

¹⁷ Mi vialte upat hna u. Unau kha daw hna u. Pathian ṭih u. Siangpahrang upat hna u.

¹⁸ Sinum hna, nan hotu le sinah i pe ulaw, anmah nawl in um u, miṭha le mi nunnem sin lawng ah si loin mi nunchia lak zongah i pe u.

¹⁹ Zeitintiah mi nih Pathian a hngalh ruang i a tuar lo dingmi tuar in lungfak ngaiin a tuar a si ahcun Pathian lunglomhnâk a si.

²⁰ Zeitintiah thilṭhalo nan tuah ruangah tukvelh nan si tikah, lungsau tein nan in zongah conglomh nan tong hnga maw? Asinain thilṭha nan tuah ruang i temtuarnâk kha, lungsau in nan tuar ahcun, cucu Pathian lawmhtertu a si.

²¹ Zeitintiah cubantuk tuah awk i kawhmi nan si, zeicatiah Krih zong nih an tuarpiak hna caah a keneh i nan zulh dingah zohchunh awk an chiah tâk hna.

²² Amah cu sualnâk zeihmanh a tuah lo i Akâ ah hlennâk bia an hmu bal lo,

²³ sik asi tikah a let hna lo i a tuar lio ah a hrocer hna lo; ding tein a ceihtu sin tu ah Amah le Amah â pe.

²⁴ Sualnâk leiah kan thih i dinnâk lei ah kan nun khawh nâkhnga, a taksa hrimhrim in thing cungah kan sualnâk kha a phorh i an tuknâk hma in nan dam cang.

²⁵ Zeitintiah tuu bangin nan rak tlau, asinain atu cu nan thlarau kilvengtu le zohkhenhtu Tuukhal sinah nan kir cang.