1 KORIN 9 - Laibaibal Thiang (BSI)

¹ Lamkaltu ka si lo maw? Miluat ka si lo maw? Kan Bawipa Jesuh zong ka hmu cang lo maw? Nannih hna hi Bawipa rian ka ṭuanmi theitlai nan si lo maw?

² Midang caah lamkaltu ka silo hmanh ah, elkhawh lo in nan caah cun ka si ko. Zeitintiah nanmah hi Bawipa lamkaltu ka si hmelchunhnâk cu nan si.

³ Sual aka puhtu sinah kâ kilvennâk cu hitihin a si.

⁴ Ei le ding dingin nawl kan ngei lo maw?

⁵ Lamkaltu dang, Bawipa unau le Peter bantukin khualtlawnnâk ah zumtu nupi hruainâk nawl kan ngei ve lo maw?

⁶ Asiloah Barnabas le kei kan pahnih zong nih rianṭuan ngoltâk dingin zalonnâk kan ngei ve lo maw?

⁷ Ahodah raldohnâk i kalpah in amah le amah â cawm bal? Ahodah a theitlai ei ṭung lo in misur dûm a tuah bal? Asiloah ahodah a hnûk ding lo in saṭil run a zohkhenh bal?

⁸ Hi kong hi minung phung menmen i chim ka si maw? Nawlbia zong nih hihi a chim ve lo maw?

⁹ Moses nawlbia cauk ah, “Cawtûm nih facang a cil lio ah a hmur ṭêm hlah,’ tiah ṭial a si. Pathian nih cawtûm kong lawng maw a ruah?

¹⁰ Asiloah kanmah kong dah a chim? Zeitintiah kanmah kong i ṭialmi a si. Lei thuangmi nih ruahchannâk ngei in lei a thuan awk a si i facang cîltu zong nih comi ngeih lai ruahchannâk he a cîl tawn.

¹¹ Kannih nih thlarau lei thil nan sinah kan tuh i nan sinin vawlei thil kan zûn ah hin thil ngan ngai a si hnga maw?

¹² Midang zong nih nan sinah nawlngeihnâk an co ahcun kannih zong co chin chin awk kan si ko. Asinain kannih nih, cu nawlngeihnâk cu kan hmang ve lo. Krih thawngṭha kan phenh sual nâkhnga lo zeithil pauh hi kan in ko.

¹³ Ṭempal i thil thianghlim cung i rianṭuantu hna nih cu thil hna ei cu an caah a thiang i biakṭheng cung i rianṭuantu hna zong nih biakṭheng cung i pekchanhmi cu an ei tawn ti kha nan hngal lo maw?

¹⁴ Cubantuk in thawngṭha chimtu hna nih thawngṭha bia in ei an hmuh awk a si, ti cu Bawipa nawlpêkmi a si.

¹⁵ Asinain keitu nih cun cucu pakhat hmanh ka hmang hlei lo. Ka cung i nan tuah awkah ka ṭialmi zong a si lo. Kâ porhlawt pimi hi zeihmanhlo i an canternâk cha cun thih hmanh ka duh deuh.

¹⁶ Zeitintiah thawngṭhabia hi chimhmanh ninglaw porhlawt ding zeihmanh ka ngei lo. Tuahlo khawhlo in ka cungah khinhmi a si. Thawngṭha hi chim hlah ning law aka chiat lai.

¹⁷ Zeitintiah mah duhnâk i tuahmi ka si ahcun ṭuanman ka ngei hnga. mahduhnâk i tuah ka si lo ahcun, thawngṭha zohkhenhnâk rian hi a thiah i thiahmi ka si, tinâk a si.

¹⁸ Ka ṭuanman cu zeidah a si? Hlawhhlâm um lo in man loin thawngṭha ka chimmi hi a si. Keimah hlawknâk ca i thawngṭha i ka nawl ngeihnâk ka hman lomi hi a si.

¹⁹ Zeitintiah mi vialte sinin zalonâk ka ngei nain, mi tampi ka tei khawh nâkhnga mi vialte sinum ah kâ tuah,

²⁰ Judah mi ka tei khawhnâk hnga Judah milakah Judah mi bangin ka um tawn. Nawlbia tang i a ummi hna ka tei khawh nâkhnga nawlbia tang i a ummi bantukin ka um tawn.

²¹ nawlbai ngeilo mi ka tei khawh nâkhnga, nawlbia ngei lomi bangin ka um tawn (Pathian nawlbia buarlo le Krih nawlbia tangah um buin)

²² zângdermi ka lak khawh nâkhnga zângdermi sinah, zângdermi bangin ka um. Lam pakhat khat in micheu khat ka khamhkhawh nâkhnga mi vialte sinah zeizong vialte ah kâ cang tawn.

²³ Nanmah he covo kangeih khawh nâkhnga hihi thawngṭha ruangah ka tuahmi a si.

²⁴ Tlik â zuammi cu an dihlak in an tli na in, an lakah pakhat te lawng nih laksawng a hmuh tawn ti kha nan hngal lo maw? Nan co khawh nâkhnga tli ve tuah u.

²⁵ Cun laksawng hmuh â timmi hna cu zeizong vialte ah â sum tawn. Annih nih a rawk khomi luchin hmuh awkah an i zuam i kannih nih a rawk kho lomi luchin hmuh awkah kan i zuam.

²⁶ Cucaah ka phanhnâk ding hngalcia in dah kaw ka tlik. Kâ thongh tik ah, thlitu men ka thongh lo.

²⁷ Ka pum hi ka uk i ka nawl tangah ka chiah, culoahcun, midang sin i ka aupi hnu hmanh ah keimah hmanh hi laksawng hmuhawk tlâk loin ka um sual lai.