1 KORIN 7 - Laibaibal Thiang (BSI)

¹ Câ nanka kuatmi ah: Pa caah nu tonghlo a ṭha timi kongah.

² Asinain nupa sualnâk tuah a um tawn caah pa nih a dang tein nupi ngei cio seh, nu zong nih a dang tein va ngei cio seh.

³ Pa nih a nupi sin i a tuah hngami cu dawtnâk in tuah seh, cubantukin nu zong nih a pasal sinah tuah ve seh.

⁴ Nupi nih a pum cungah nawl a ngei ti lo, ava kha nawlngeitu a si. Cubantukin va zong nih a pum cungah nawl a ngei lo, a nupi kha nawlngeitu a si.

⁵ Rawlul ding le thlacam dingin nan i timhlanh khawh nâkhnga, cân tawi te chung lawng rem nan ti chung pauh cu aho veve hmanh diriam lo in i umter hlah u. Cu dih cun nan um bon in um ṭhân ko uh. Culoahcun nan i sûm khawh lo tikah Satan nih an tukforh sual hna lai.

⁶ Asinain hihi nawlpêk lei in ka chim lo, siannâk lei i ka chimmi a si.

⁷ Zeitintiah mi vialte hi keimah bantukin um dih sehlaw ka duh. Asinain mi kip nih Pathian sinin thilpêk an hmuh cio. Pakhat nih lam dangin, pakhat nih phun dangin.

⁸ Asinain kawp ngeilo le nuhmei sinah hitihin ka ti. Keimah bantukin um hna seh law an caah a ṭha lai,

⁹ asinain an i sûmkhawh lo ahcun nupi pasal ngei ko hna seh. Pumsa duhnâk ngeihpeng nâk cha cun nupi pasal ngeih a ṭha deuh.

¹⁰ Cubangin nupi pasal ngeicang mi sinah, keimah si loin, Bawipa nih nawl a pêk. Nupi nih a va ṭhen hlahseh.

¹¹ A ṭhen a si ahcun, va ngei lo in um lawlaw seh, asiloah a va he i rem ṭhân seh. Pasal nih a nupi a mâ hlah seh.

¹² Asinain midang sinah Bawipa si loin keimah nih ka chim. Unau pakhat nih zumlotu ṭhi sehlaw, a nupi nih a va sin um peng kha a duh ahcun mâ hlah seh.

¹³ Cun nu nih zumlotu va ah ngei sehlaw, a va nih a sin um peng a duh ahcun ṭhen hlah seh.

¹⁴ Zeitintiah ava zumlotu cu, a nupi thawngin thianter a si i nupi zumlotu zong cu a vapa thawngin thianter a si, cutinsihlahsehlaw nan fa le tiangin an thiang lai lo, asinain atu cu an thiang cang.

¹⁵ Asinain zumlotu deuh nih ṭhen a duh ahcun ṭhen ko seh. Cu kongah unau pa le unau nu kha hrênpiak an si ti lo. Pathian nih cun daihnâk umtertu ah a kan kawh.

¹⁶ Maw nupi, nava na khamh lai le khamh lai lo zeitindah na hngalh? Nang pasal zong, na nupi na khamh lai le khamh lai lo zeitindah na hngalh?

¹⁷ Asinain Pathian nih mikip sinah a phawt ning cio le Bawipa nih mikip a kawh ningin nunpi ding a si. Cucu kawhhran vialte nih an tuah awkah ka ruahmi a si.

¹⁸ Cuarpar tanmi kawh an um maw? Cuarpar tan lomi ah i canghlah seh. Cuarpar tanlo lio ah kawhmi an um maw? Cuarpar i tan theng hlah seh.

¹⁹ Cuarpar tan hi zeihmanh a si lo i cuarpar tanlo zong hi zeihmanh a si hlei lo. A biapi bik cu Pathian nawlpêk zulh hi a si.

²⁰ Mikip kawh an si lio i an sining te ah khan um cio ko hna seh.

²¹ Sal i na um lio ah kawh na si maw? Ruat tuk duh hlah. Chuah cân a um a si ah cun, cu cân rem cu rak la te.

²² Zeitintiah sal si lio i Bawipa kawhmi cu, Bawipa luat termi a si, cubantuk in zalon lio i kawhmi cu, Krih sal tu ah â cang.

²³ Aman in cawkmi nan si cang, cucaah minung sal ah lut ti hlah u.

²⁴ Ule nau hna mikip kawh si lio i nan sining teah khan Pathian sinah um peng u.

²⁵ Cun ngaknu thiang kongah Bawipa nawlpêk cia ka ngei lo, asinain Bawipa nih a zângfahnâk thawngin zumhtlâk i a ka sernâk thawngin ruahnâk ka cheuh hna lai.

²⁶ Atu chan harnâk ruangah a ho cio pauh atu i an sining ah hin um cio ko hna sehlaw a ṭha.

²⁷ Nupi na ngei cang maw? Ṭhen tim hlah. Nupi ngei lo na si maw? Nupi kawl theng hlah.

²⁸ Asinain nupi na ngeih tikah sualnâk na tuah theng lo. Ngaknu thiang nih va a ngeih zongah, a palh theng lo. Asinain cuhna nih cun taksa ah harnâk cu an tuar lai. Cucaah keinih cun tuarter lo kha kanduh piak hna.

²⁹ Cucaah hihi ka ti, unau hna, cân a tlawmcang i atu thawk cun nupi ngei zong ngeilomi bangin an um i

³⁰ aṭap mi zong ṭaplo mi bang i an um i â nuammi cu nuamlomi bangin an um i thil a cawmi zong zeihmanh ngei lomi bangin an um nâkhnga,

³¹ vawlei hmangtu zong nih a pingin an hman sual nâkhnga lo kha ka duh. Zeitintiah hi vawlei umtuning hi a lotlau cuahmah cang.

³² Asinain ruahkhun mi ngei in nan um hi kan duhpiak hna lo. Nupi a ngei lomi nih Bawipa lawmhnâk ding lawng ruatin Bawipa kong kha a ruat tawn.

³³ Asinain nupi a ngeimi nih a nupi lawmhnâk ding ruat in vawlei thil kha a ruat tawn.

³⁴ Va ngei le ngaknuthiang cu an i lo lo. Va ngeilo nih cun a pum le a thlarau cu thianghlim te i a um khawh nâkhnga Bawipa lei cu a ruat tawn, va ngeimi nih cun a va lawmhnâk ding a ruah ruangah vawlei thil kha a ruat tawn.

³⁵ Cun hi thil hna hi nan santlaih pi dingah ka chimmi a si. Ṭembawh kan tim hna lo, dawhte i khua nan sak nâkhnga, ngerhngawhtu dang um loin Bawipa rian nan ṭuan khawh nâkhnga ka chimmi a si.

³⁶ A ho pauh nih a fanu, ngaknuthiang, a ngaknu lio dawhnâk a ziamh tiangin ngaknu a siter ruang i ka palh ko tiah a ruah ahcun ṭha a tining in tuah ko seh.

³⁷ Asinain lungfek tein a um i a herh zongah ruat loin, amah duhning tein lanhter a timh i a fanu ngaknu thiang a sinâk humhak thai a duhmi cu thilṭha chinchin a tuahmi a si.

³⁸ Cuticun va a ngeihtertu nih thil ṭha a tuah ko, a ngeihter lotu zong nih khan thilṭha chinchin a tuah.

³⁹ Nupi cu ava nunchung vialte phungin ṭem a si, asinain a va a thih ahcun, a duhmi pauh ngei kho in zalonter a si, asinain Bawipa mi a si awk a si.

⁴⁰ Asinain ka ruahnâk ahcun a si bon ah sipeng sehlaw â nuam deuh lai. Hi kongah hin Pathian Thlarau cu ka ngeih ve ko tiah ka ruah.