1 KORIN 6 - Laibaibal Thiang (BSI)

¹ Nanlak ah mi pakhat khat nih midang sinah bia nan ngeih ahcun, mithiang hna sinah phâkpi lo in miding lo hna sinah nan phâkpi hnga maw?

² Mithiang hna nih vawlei bia an ceih te lai ti hi nan hngal lo maw? Vawlei bia hmanh nan ceih ahcun thil hmete hna cu nan ceih awk a si hnga lo maw?

³ Vanmi hna hmanh an kong kan ceihte lai ti nan hngal lo maw? Cucaah a tu nunchung konglam hna cu kan ceih chinchin awk a si ko.

⁴ Asiah a tu nunchung ca i ceih awk nan ngeih tikah, kawhhran hna lakah santlai lo bik hna maw nan ceihter tawn hna?

⁵ Nan ning a zah nâkhnga ka chimmi a si. Mah unau karlak ah bia ceih kho tu mifim pakhat te hmanh nan ngei lo tinâk a si maw?

⁶ Unau nih a unau cu biaceihtu sinah a chuahpi, cuzong cu zumlotu hmai ah hei si kaw!

⁷ Cucaah hibantukin biaceihtu hna hmai i nan i chuahpi lengmang mi hi nan palh hrimhrim ko. Zeiruangahdah palhnâk cu nan in ko hna lo? Zeiruangahdah hlengtu nâkin hlenmi si cu nan i thim ko lo?

⁸ Cucu chim rih loin, nanmah tu kha palhnâk tuahtu le hlengtu siin hibantuk thil hna hi nan unau hna sinah nan tuah!

⁹ Miding lomi hna nih Pathian pennâk an co lai lo ti nan hngal lo maw? Hlen in um hlah u. Nupa sualnâk a tuahmi, milem a biami, ṭangdang kaimi, mi hor, tawka hormi,

¹⁰ mifir, hakkaumi, zurit hmang, mi hauhhmang, ningcang lo lak hmangmi hna nih Pathian pennâk an co lai lo.

¹¹ Nan lakah cheu khat cu cubantuk tuah a hmangmi nan rak si. Asinain Bawipa Jesuh min le kan Pathian Thlarau ah `awlthian nan si cang, thianter nan si cang, thiamcoter nan si cang.

¹² Thil vialte ka caah a thiang ko, asinain thil vialte hi san an tlai dih theng lo. Zeizong vialte ka caah a thiang ko, asinain zei sal hmanh ah kâ siang lo.

¹³ Eiding cu paw caah a si, paw zong eiding caah a si, asinain Pathian nih a hrawh ve ve lai. Taksa hi nupa sual tuahnâk caah a si lo i Bawipa caah a si. Bawipa zong cu taksa caah a si.

¹⁴ Pathian nih Bawipa cu a thawhter i kan nih zong a ṭhawnnâk in a kan thawhter te lai.

¹⁵ Nan taksa kha Krih nge a si ti kha nan hngal lo maw? Krih nge kha lakpiak zau in hlawhhlang sinah kan pe lai maw? Pe naisai hlah!

¹⁶ Asiloah hlawhhlang he i peh hi amah he pumkhat sinâk a si tiah nan hngal lo maw? “An pahnih in taksa pumkhat an si cang lai,” ti a si kha.

¹⁷ Asinain Bawipa a pehtu cu amah he thlarau ah pumkhat an si.

¹⁸ Nupa sualnâk tuah hi zâmtâk u. Minung tuahmi sualnâk tampi cu pum lenglei ah a si. Nupa sualnâk a tuahtu cu amah pum cungah sualnâk a tuahtu a si.

¹⁹ Asilo ah nan pum hi nan chung i a ummi, Pathian sin in nan hmuhmi, Thiang Thlarau ṭempal a si le, nanmah ta nan si ti lo, ti kha nan hngal lo maw?

²⁰ A man in cawkmi nan si cang; cucaah Pathian ta a simi nan pum le nan thlarau in Pathian thangṭhat u.