1 KORIN 5 - Laibaibal Thiang (BSI)

¹ Nanlak ah nupa sualnâk kong, Gentel hna lak hmanh ah a um ballo mi thawng kha a thang, mipa pakhat nih apa nupi he an i um.

² Cubantuk thil a tuahtu cu ngaihchiatpi in nan sinin ṭhawl ding hmanh a si lio ah nan i porhawt pi khawh rih.

³ Keimah hrimhrim hi pum in nan sinah ka um lo nain thlarau in nan sinah ka um ko, ( nan sin i a ummi bangin) cubantuk thil a tuahtu cu a kong fel tein ka ruah cang.

⁴ Kan Bawipa Jesuh Krih minin nan i pumhnâk ah kei zong ka thlarau in kan Bawipa Jesuh Krih ṭhawnnâk in kâ tel ve,

⁵ cubantuk thil a tuahtu cu a thlarau Bawipa ni ah khamh a si khawh nâkhnga a pumsa cu hrawh dingin Satan pe ko u sih, tiah ka ti.

⁶ Nan i porhlawtpi mi hi a ṭha lo taktak, thilnu tlawmte nih changreu cu a ning piin a thawhter tawn ti nan hngal lo maw?

⁷ Cucaah thilnu cawhlo mi nan si bantukin changreu tlangkhat nan si khawh nâkhnga thilnu hlun cu thenh u. Zeitintiah kan Lanhtâk Thô taktak, Krih cu thawinâk ah pêkchanh a si cang.

⁸ Cucaah Thô cu tuah usih, thilnu hlun i tuah loin, ruahnâk ṭhalo le rawhralnâk thô kha tuah lo in, zumhawktlâk le diknâk changreu, thilnu cawh loin thô cu tuah u sih.

⁹ Nupa sualnâk tuah hmangmi hna he i komh peng lo dingin ka cakuat chungah ka ṭial cang kha.

¹⁰ Asinain hi vawlei i nupa sualnâk tuah a hmangmi, hakkaumi, ningcang loin lak hmangmi, milem biami hna hi komh hna hlah u kan ti hna lo. Culoahcun hi vawlei in kan chuah a herh lai.

¹¹ Asinain atu ka ṭial chan cu unau min pu ve ṭung i nupa sualnâk tuah ngol hlei lomi, mi hakkau, milem biami, misik hmang, zu rimi, ningcanglo lâk hmangmi hna kha komh peng hna hlah u, an sinah rawl hmanh ei hlah u.

¹² Zeitintiah lênglei mi hna kong cu ka ceih awk a si hnga maw? Nan ceih ding cu a chungmi hna hi an si awk a si.

¹³ Lênglei mi hna cu Pathian nih a ceih te ko lai. Cucaah cubantuk mi ṭhalo hna cu nansin in chuah hrimhrim hna u.