1 KORIN 2 - Laibaibal Thiang (BSI)

¹ Ule nau hna, Pathian hngalhternâk bia phuang dingin nan sin i ka rat ah khan biachimthiamnâk le a thûkmi fimthiamnâk he ka ra lo.

² Jesuh Krih le khenchih a sinâk kong dah tilo cu nanlakah zeihmanh hngalh ka tim lo.

³ Thazângder le ṭihphân bu he, ther thluahmah in nan lakah ka um kha.

⁴ Cun ka biachim le phungchimnâk ah, minung fimnâk i biachimthiamnâk hmangin tei kan tim bal hna lo, Thlarau le ṭhawnnâk tu in langhter a si,

⁵ cucu nan zumhnâk kha minung fimnâk ah si loin Pathian ṭhawnnâk ah a si nâkhnga.

⁶ Asinain puitling hna sinah fimnâk bia zong kan chim tawn, asinain hi vawlei fimnâk bia hi a si lo, zeihmanh lo i a cang hngami, hi vawlei biaceihtu hna fimnâk bia zong a si lo.

⁷ Asinain Pathian biathli fimnâk kha kan chim tawn, â thupmi fimnâk, kan sunparnâk dingah Pathian nih vawlei ser hlanin a ruah cangmi kha,

⁸ cucu hi vawlei biaceihtu hna nih an rak hngal lo; rak hngal hna sehlaw, sunparnâk Bawi kha an khenhchih hnga lo.

⁹ “Mit in hmuh bal lomi, hna zongin theih bal lomi, Pathian nih Amah dawtu hna ca i a timhlamh mi kha,” tiah ṭialmi bangin.

¹⁰ Asinain cucu Pathian nih kan sinah a Thlarau in a kan hngalhter. Thlarau nih cun zeizong vialte a dahhriah dih, asi, a thûkmi Pathian bia zong.

¹¹ Zeitintiah minung kong cu amah i a ummi minung thlarau dah tilo ahonihdah an hngalh bal? Cubantuk ṭhiam ṭhiamin Pathian kong zong Pathian Thlarau dah ti lo cun ahohmanh nih an hngal kho lo.

¹² Cuticun Pathian nih man loin a kan pêkmi thil kan hngalh khawh nâkhnga kan comi hi vawlei thlarau si loin Thlarau Pathian sinin a comi kan si.

¹³ Cuthil hna cu minung cawnpiak mi fimnâk si loin, Thiang Thlarau cawnpiakning tuin, thlarau kong cu thlarau in kan chim tawn.

¹⁴ Vawlei mi nih cun Pathian Thlarau thil kha an cohlang duh lo, zeitintiah a nih caah cun hruhbia an si, thlarau leiin hngalh fian a si caah an hngal kho hrimhrim lo.

¹⁵ Asinain Thlarau mi nih thil vialte hi a hngalh tawn, anih tu cu ahohmanh nih an hngal kho lo.

¹⁶ “Ahonihdah Bawipa ruahnâk a hngalh i amah cu a cawnpiak khawh lai?” Asinain kan nih cu Krih lungput kha kan ngei.