1 KORIN 16 - Laibaibal Thiang (BSI)

¹ Mithiang mi hna ca i thawhlawm kong ah, Galatih ram i kawhhran hna sin i nawl ka pêk bantukin nan nih zong nih rak tuah ve u.

² Ka rat tikah khawlh a herh nakhnga lo, mikip nih nan hmuhmi thluachuahnâk he â tlâk cio in zarhkhat chung ni hmasa bik pauh ah rak pum hna u.

³ Cun karat tikah nan thilpêk hna cu Jerusalem ah kalpi dingin nan zumhmi sinah ca ṭial in kan kenter lai i kan thlah lai.

⁴ Ka kal ve nâk ding a si ahcun, keimah sinah an kal ve lai.

⁵ Cubangin Masidonia ram ka ṭol dihin nan sinah ka ra lai. (Masidonia ram lanh cu kâ timh cia mi a si)

⁶ Cun nan sinah sau deuh ka câm kho lai, khua sik cân chung dihlak zong a si kho ko. Khuazei lei a si hmanh ah nannih nih nanka thlah khawh ko lai.

⁷ Zeitintiah khualtlawn pah i hmuh lawng cu ka lung a si lo, Bawipa nih rem a ti ahcun nan sinah sau deuh câm ka duh ko.

⁸ Asi, Efesa khua ah Pentikos ni tiangin câm ka timh lai.

⁹ Zeitintiah rianṭuannâk ding lam kau deuh le a hlawk deuh ding ka caah â ong, doh kalhtu zong tampi cuka ah an um.

¹⁰ Timote a rat tikah ṭihphang lo tein rak umter u. Keimah nih ka ṭuan bantukin Bawipa rian ṭuntu a si.

¹¹ Cucaah ahohmanh nih rak zomhtaih hna hlah seh. Lungdai tein ka sinah a rat khawh nâkhnga ṭha tein nan rak thlah lai, zeitintiah unau hna he raṭi dingin kan rak hngah ko.

¹² Cubangin kan unau pa Apollos kha unau hna he hmunkhat ah nan sin ra ding in ka nawl len i atu cân i rat hi a ngaihlah ngai, asinain cân rem a ngeih tikah a ra hrimhrim ko lai.

¹³ I ralring ulaw, zumhnâk ah fek tein dir u. ralṭha le ṭhawng ngai in um u.

¹⁴ Nan tuahmi pauh cu dawtnâk in tuah si dih seh.

¹⁵ Ule nau hna Stefenas chung le cu Akai ram i zumtu hmasa bik an si i mithiang hna rianṭuan piak awkah an i pêk ning nan hngalh;

¹⁶ cubantuk mi sinah rian a kan ṭuanpi i sem a kan ngaih pitu hna sinah tangdor dingin kan nawl hna.

¹⁷ Stefenas le Fortunatas le Akhaikas an rat hi kâ lawm taktak, zeitintiah nan umlo zong lang lo in an kan tuam hlawm.

¹⁸ Zeitintiah annih nih nan thlarau an tharchuah bangin ka thlarau zong an tharchuah ngaingai. Cucaah hi bantuk mi hi cohlang hna u.

¹⁹ Asia ram i kawhhran hna nih nan kut an in tlaih hna. Akuila le Prisilla an inn i kawhhran hna he nan kut an in tlaih hna.

²⁰ Unau vialte nih nan kut an in tlaih hna. A thiangmi hnamhnâk in nan kut rak i tlai u.

²¹ Keimah Paul zong nih hi kut tlaihnâk hi keimah kut hrimhrim in ka ṭialmi a si.

²² Mizei pauh nih Bawipa Jesuh Krih a dawt lo ahcun chiatserh in um seh. Maw, Bawipa ra ko cang.

²³ Bawipa Jesuh Krih zângfahnâk cu nan sinah um ko seh.

²⁴ Krih Jesuh ah ka dawtnâk cu nan dihlak cungah um ko seh. Amen.