1 KORIN 15 - Laibaibal Thiang (BSI)

¹ Cuhleiah unau hna, thawngṭha ka chimmi kha nan cohlan i dirnâk ah nan hmanmi kha, cu bia cu chimh ṭhan kan duh hna,

² kan chimhmi hna bia kha nan zumh mênmên si loin fek tein nan i tlaih ahcun, cucu khamh nan sinâk cu a si.

³ Zeitintiah a hmasa bikah, keizong nih ka hmuhmi kha kan chimhchin hna: Cathiang ning tein Krih cu kan sual ruangah a thi,

⁴ phum in a um i Cathiang ning tein nithum niah a tho ṭhân,

⁵ Peter sinah â lang, cun hleihnih hna sinah,

⁶ Cu hnu ah cân khat ah unau zanga nâk tam nih an hmuh, cuhna lakah a tamdeuh cu atu tiangin an nung i a cheu tu cu an i hngilh cang.

⁷ Cuhnuah Jeim sinah â lang i cuhnu ah lamkaltu vialte sinah â lang.

⁸ A donghnâk ah, a cânlo ah a chuakmi bang, keimah sin zongah â lang ve.

⁹ Zeitintiah kei cu lamkaltu lakah a hmebik, Pathian kawhhran hna ka serhsat ruangah lamkaltu ti awk hmanh ah kâ tlâk lo.

¹⁰ Asinain Pathian zângfahnâk ruangah atu ka sining hi ka rak si, ka cung i a zângfahnâk cu a sawhsawh a si lo. Cucaah annih vialte nâkin thaba deuh in ka ṭuan, asinain keimah ṭuanmi cu a si lo. Pathian zângfahnâk keimah i a ummi nih a ṭuanmi a si.

¹¹ Cucaah, annih le kei â danghlei lo, bia kan chim i nannih nih nan rak zumh.

¹² Krih cu thihnâk in thawhter a si tiah chim a si lio ah, zeiruangahdah nan lakah cheukhat nih, mithi thawhṭhannâk a um lo, tiah nan ti.

¹³ Mithi thawhṭhânnâk a um lo ahcun, Krih zong a tho ṭhân lo tinâk a si.

¹⁴ Krih kha a thawhṭan lo ahcun kan chimmi bia hi zeihmanhlo a si lai i nan zumhnâk zong zeihmanhlo a si lai.

¹⁵ Asi, Pathian nih Krih a thawhter tiah kan hngalhpi caah, Pathian lei ah hngalhpitu deu kan si lai - mithi thawhter an si lo ahcun Krih zong thawhter a si lai lo.

¹⁶ Zeitintiah mithi hna thawhter an si lo ahcun Krih zong thawhter a si hlei lo tinâk a si.

¹⁷ Krih kha thawhter a si lo ahcun nan zumhnâk cu pakpalawng a si lai i nan sualnâk ah nan um peng rih tinâk a si.

¹⁸ Cuti a si ahcun, Krih i â hngilhmi hna kha an tlaulan tinâk a si hnga.

¹⁹ Hi nunchung ca lawng i Krih ah ruahchannâk kan ngeih ahcun mi vialte lakah zângfah awk tlak bik kan si.

²⁰ Asinain Krih cu thihnâk in a thoṭhân i â hngilhmi hna caah theitlai hmasa bikah a cang.

²¹ Zeitintiah thihnâk hi minung ruangah a um, Minung ruang ṭhiamṭhiam in thawhṭhannâk zong a um.

²² Zeitintiah Adamah mi vialte an thih bantukin Krih ah mi vialte nunter in an um lai.

²³ Asinain mah le cân cio ah Krih cu theipar hmasa a si, a rat ṭhân tikah a thoṭhân dingmi cu Krih ta an si te lai.

²⁴ Cuticun biaceihnâk vialte, nawlngeihnâk vialte le ṭhawnnâk vialte a donghter tikah donghnâk tak tak a phân lai i Pa Pathian sinah Pennâk cu a chanh lai.

²⁵ Zeitintiah a ral vialte a ke tang i a chiah dih hlan lo Amah nih bia cu a ceih lai.

²⁶ Hmadung bik ral hrawh in a um cu thih hi a si.

²⁷ Zeitintiah “A ke tangah zeizong vialte a chiah.” Asinain “A ke tangah zeizong vialte a chiah,” a ti tikah, a tang i zeizong vialte a chiatu Pathian cu â tel ve lo, ti kha a langhter.

²⁸ Cubangin a tang i zeizong vialte chiah a si tikah, Fapa zong cu a tang i zeizong vialte chiatu tangah a um ve lai, cucu Pathian kha zeizong i zeizong a si khawh nâkhnga.

²⁹ Mithi hna hi thoṭhân hna hlah sehlaw, mithi hna ca i baptisma in hi zeitindah a si kun lai? Zeiruangah dah mithi hna caah baptisma an in tawn?

³⁰ Cun kannih zong suimilam cân kip i `ihphâng ngai i kan um hi zeiruangah?

³¹ Kan Bawipa Jesuh Krih ah kan hmaihngalpi hna nâk chalh in, “Ni chiarte ka thi tawn” ka ti.

³² Efesa khua i sahrang hna kha minung phungin ka doh ahcun ka caah zeidah a ṭhahnem hnga? Mithi hna an thawhṭan lo ding ahcun, “Ra u, ei in ding hna u sih, thaizing ah pei kan thih ko lai cu.”

³³ Hlen in um hlah u: “Hawikawm ṭhalo nih nun ṭha a hrawh tawn.”

³⁴ Dingfel dingin i hlau u, sualnâk tuah hlah u; zeitintiah cheukhat cu Pathian hngalhnâk nan ngei lo. Nan ning azah nâkhnga hihi ka chimmi a si.

³⁵ Mi zeimaw nih, “Mithi hna cu zeitiset in dah thawhter an si lai? Zeibantuk pum in dah an rat lai?” tiah nan ti.

³⁶ Mihrutpa, na tuhmi thlaici hmanh a thihlo ahcun nunter in a um bal lo.

³⁷ Na tuhmi cu, a um laimi pum kha si loin, buh fang, asiloah thlaici dangdang zong a si ko.

³⁸ Asinain Pathian nih amah duhning in pum a pêk tawn, a fang kip caah takpum kha a pêk cio.

³⁹ Taksa vialte hi â lo dih lo, minung taksa â dang i saram taksa â dang, nga taksa le va taksa zong â dang.

⁴⁰ Van taksa a um i lei taksa zong a um. Van taksa sunparnâk â dang i lei taksa sunparnâk zong â dang.

⁴¹ Ni nih sunparnâk phunkhat a ngei i thlapa nih sunparnâk a ngei ve. Arfi hna zong nih sunparnâk an ngei i arfi le arfi zong sunparnâk ah an i khat lo.

⁴² Cubangin mithi thawhṭhannâk zong a si. Thu kho i tuh in a um i thu kho loin thawhter a si.

⁴³ Zeihmanhlo bangin tuh a si i sunpar ngaiin thawhter a si. Der ngaiin tuh a si i ṭhawng ngai in thawhter a si.

⁴⁴ Minung taksa in tuh a si i thlarau lei taksa in thawhter a si. Minung lei taksa a um ahcun, thlarau lei taksa zong a um lai.

⁴⁵ Cun hiti hin ṭial a si, “Minung hmasa bik Adam cu a nungmi a si,” Adam hmadung deuh cu nunnâk petu thlarau a rak si.

⁴⁶ Asinain thlarau lei cu a um hmaisa lo, minung lei kha a um hmasa deuh, cuhnu ah thlarau lei kha a rak um.

⁴⁷ Minung hmaisa bik cu vawlei, leidip i ser a si i pahnihnâk Minung cu vanlei mi Bawipa a si.

⁴⁸ Minung hi leidip i ser a si bantukin leidip i sermi dang zong an um, van lei mi bangkhan van lei mi hna zong an um.

⁴⁹ Leidip i sermi lawhnâk kan ngeih bangin Van lei Mi lawhnâk zong kan ngei.

⁵⁰ U le nau hna, thisa le thisen nih hin Pathian pennâk cu a co kho lai lo, thut hmangmi nih thuthmang lo cu a thleng kho lai lo, tiah ka chim.

⁵¹ Ngaihmanh u biathli kan chimh hna lai. Kan dihlakin kan i hngilh dih theng lai lo, asinain thlen in kan um lai,

⁵² muko hmadung bik an tumtikah, chikkhat teah, mitṭhep kar ah thlen kan si dih lai. Zeitintiah muko cu an tum hrimhrim lai. Cuticun mithi hna cu thu kho tilo dingin thawhter an si lai i kan nih zong thlen kan si lai.

⁵³ Zeitintiah hi thut a hmangmi nih thut a hmang lomi â hruk awk a si i hi a thi khomi nih a thi kho lomi â hruk awk a si.

⁵⁴ Cuticun hi thut a hmangmi nih thut a hmang lomi â hruk i hi a thi khomi nih a thi kho lomi â hruk tikah, cu cân hrimhrim ah, “Thihnâk cu teinâk nih a dawlh,” tiah ṭialmi hi a tling lai.

⁵⁵ Maw, thihnâk khuazeiahdah na sivai cu? Maw Mithi khua khuazeiahdah na teinâk cu?

⁵⁶ Thihnâk sivai cu sual a si i sual ṭhawnnâk cu nawlbia hi a si.

⁵⁷ Asinain kan Bawipa Jesuh Krih thawngin teinâk a kan petu Pathian sinah lawmhnâk bia um ko seh.

⁵⁸ Cucaah, ka dawtmi ule nau hna, fek tein, hninh khawh loin um ulaw, Bawipa rian biatak tein ṭuan zungzal ko u, Bawipa ah nan ṭuanman cu pakpalawng a si lailo ti kha hngal ko u.