1 KORIN 11 - Laibaibal Thiang (BSI)

¹ Krih kâ zohchunh bangin, rakka zohchunh ve u.

² Cubangin thil vialte ah nanka hngalh peng caah le nuncan kan chimhmi hna zong nan i cinken caah nan cungah kâ lawm.

³ Hngalhter kan duhmi hna cu pa vialte lu cu Krih a si, nu lu cu pa a si i Krih lu cu Pathian a si.

⁴ Pa nih lukhuh khuh bu in thla a cam i bia a phuan ahcun, alu kha a zomhtaih a si.

⁵ Asinain lukhuh khuh loin nu kha thla a cam i biacah a phuan ahcun a lu kha a ṭihzah lo tinâk a si. Kongh he â khat ko.

⁶ Nu nih a lu â khuh lo ding a si ahcun kongh lawlaw seh. Nu caah lumeh le kongh cu ningzak a si ahcun lukhuh tu i khuh seh.

⁷ Pa cu Pathian muikeng le sunparnâk a si caah alu â khuh awk a si lo, nu cu pa sunparnâk a si.

⁸ Zeitintiah pa hi nu in a chuakmi a si lo i nu tu hi pa in a chuakmi a si.

⁹ Pa hi nu caah sermi a si lo, nu tu cu pa caah sermi a si.

¹⁰ Hiruangah hin vanmi hna thawngin nu nih nawlngeihnâk hmuhsak dingin hmelchunnâk â khuh awk a si.

¹¹ Asinain Bawipa ah pa hi nu sinin ṭhen khawh a si lo i nu zong pa loin um kho a si hlei lo. Thil vialte hi Pathian sinin a chuakmi an si.

¹² Zeitintiah nu hi pa sinin a chuakmi a si bangin pa zong hi nu hrinmi a si; asinain thil vialte hi Pathian in a chuakmi an si.

¹³ Nanmah te ṭha tein ruat tuah u. Lukhuh lo i nu nih Pathian sin i thla a cam hi â dawh maw?

¹⁴ Pa nih samsau a ngeih ah hin a kokek sining hmanh nih ningzah awk a si kha a cawnpiak lo maw?

¹⁵ Nu nih samsau a ngeih ahcun a caah dawhnâk a si. A sam cu amah khuhnâk caah pêkmi a si.

¹⁶ Hi kongah hin a el hnialtu an um a si ahcun; hi hlei in phung zeihmanh kan ngei lo. Pathian kawhhran zong nih an ngei hlei lo.

¹⁷ Hi cawnpiaknâk kan chimh hna lio ah hin kâ lawmhkhawh lonâk a um; nan i pumh tikah ṭhatnâk lei si loin chiatnâk leitu i nan hmanmi hi.

¹⁸ Ahmasa bikah, kawhhran nan i pumh tikah nanlakah ṭhennâk a um tiah mi chim ka theih, a dik zong a dik ko, tiah ka zumh.

¹⁹ Nanlakah a taktak a simi an langhkhawh nâkhnga zumhnâk phundang a ngeimi zong an um awk a si.

²⁰ Cucaah nan i pumhnâk ah Bawipa zanriah ei kho nan si lo.

²¹ Zeitintiah nan ei tik zongah i hngak loin mah le ta cio nan ei; mi pakhat a rawl a ṭam lio ah, midang an rak ri cang.

²² Zeiruangahdah a si? Ei le dinnâk inn nan ngei lo hlah maw? Ei awk a ngei lomi hna an ning zahter in, Pathian kawhhran kha nan zomhtaih hna hlah maw? Zeidah kan chimh ṭhân hna lai? Hi kongah hin kan thangṭhat hna lai maw? Kan thangṭhat kho hna lai lo.

²³ Zeitintiah kan chimhchin mi hna hi Bawipa sinin ka hmuhmi a si. Bawipa Jesuh kha tlaih i a um zanah khan changreu a lâk i,

²⁴ lawmhnâk bia a chim dih in a cheu i, “I lâk ulaw, ei uh, hihi nan ca i ka pêkmi ka pum a si, Keimah philhlonâk ah hi hi tuah u,” a ti kha.

²⁵ Cubagin zanriah ei dih ah hrai zong cu a lâk i, “Hi hrai hi ka thisen i biakam thar cu a si. Keimah philhlonâk ah rakding tawn u,” tiah a ti kha.

²⁶ Zeitintiah cu changreu cu nan ei i hrai zong cu nan din fate, A rat ṭhân hlan tiang Bawipa thihnâk cu nan phuan a si.

²⁷ Cucaah mizei pauh, ei awk â tlaklo buin changreu cu a ei i Bawipa hrai a dingtu pauh cu Bawipa taksa le thisen ah thiam lo a co lai.

²⁸ Asinain ei awk ah mah le mah i hniksak seh law changreu cu eiin, hrai cu ding seh.

²⁹ Zeitintiah a eitu le a dingtu nih Bawipa taksa a si zia ruat setsai loin tlâklo bu in a ei ahcun, amah cungah biaceihnâk tlunter awkah a eimi a si.

³⁰ Hiruanghah hin mi tampi thazâng derin nan zaw i tampi nan i hngilh.

³¹ Zeitintiah kanmah le kanmah kan i chek ahcun biaceihnâk kan tong hnga lo.

³² Asinain biaceihnâk kan ton hmanh ah, vawlei sinah thiamlo kan co nâkhnga lo Bawipa chimhhrin in kan um.

³³ Cucaah unau hna, ei awkah nan i pumh tikah i hngak u.

³⁴ Rawlṭammi nan um ahcun innah rak ei hmasa seh, culoahcun biaceihnâk tuar dingin â pummi nan si sual lai. Hi hlei in a herhmi bia dang hna cu ka rat tikah fel tein ka ruah te lai.