1 KORIN 10 - Laibaibal Thiang (BSI)

¹ Ule nau hna hihi nan hngalh lo ka duh lo, a kan hringtu vialte kha minmei tangah an um dih i an dihlak in rili zong an tan dih,

² an dihlak in Moses ah minmei le rili ah Baptisma an in dih,

³ an dihlak in thlarau lei rawl an ei dih i

⁴ an dihlakin thlarau lei dinawk hmunkhat ah an din dih. Anmah zultu thlarau lei lungpi chungin an din cio i cu lungpi cu Krih a si.

⁵ Asinain an lak i mi tamdeuh cungah Pathian lung a tling lo i ramcar ah khan an thi dih.

⁶ Cu thil hna cu kan caah zohchunhawk a si, sualnâk tuah an duh bang i kan duh ve nâkhnga lo.

⁷ Anlakah cheukhat milem an biak bangin bia ve hlah u sih. “Mizapi hna cu ei le ding dingin an ṭhu i nomhhnaihnâk tuah awkah an tho,” tiah ṭialmi bangin.

⁸ Anlakah cheukhat nupa sualnâk ah an tlu i nikhat ah mi 23000 an thih bang khan nupa sualnâk tuah hlah u sih.

⁹ Anlakah cheukhat nih Krih an hneksak i rul hmang i hrawh an si bangkhan hniksak ve hlah u sih,

¹⁰ asiloah anlakah cheukhat an phunzai i hrawktu hrawh i an um bangkhan phunzai hlah u sih.

¹¹ Cuthil hna cu i zohchunh awkah an cungah a tlungmi a si i cân hmadung phâk lainâk i a kan chimhringtu dingah an ṭialmi a si.

¹² Cucaah fek tein ka dir ko a timi kha i ralring seh, culoahcun a tlu sual lai.

¹³ Minih anton tawnmi tukforhnâk dah tilo cu tukforhnâk nan cungah a tlung lai lo. Pathian cu zumhtlâk a si. Nan tuar khawh lengin tukforhnâk nan cungah tlunter a siang lai lo. Nan tuar khawh nâkhnga tukforhnâk chungin himnâk lam an ser piak hna lai.

¹⁴ Cucaah ka dawtmi hna, milem biak hi zâmtâk u.

¹⁵ Mifim sin i chimbangin ka chim. Ka chimmi hi nanmah te in rakruat ve u.

¹⁶ Thluachuahnâk hrai, thlua kan chuah tawnmi hi, Krih thisen hrawmpinâk a si lo maw? Changreu kan cheumi zong hi Krih taksa hrawmpinâk a si lo maw?

¹⁷ Zeitintiah kannih hi tampi kan si nain, changreu tlangkhat, taksa pumkhat kan si. Changreu tlangkhat chungin kan co cio mi a si.

¹⁸ Isreal mi hna hi zoh hna hmanh u. Raithawinâk sa eitu hna nih biakṭheng cu an i hrawm lo maw?

¹⁹ Chim ka timhmi hi zeidah a si? Milem kha maw biapi, asiloah milem sinah pêkmi thil hna dah?

²⁰ Ka chim duhmi cu, Gentel mi hna raithawinâk cu Pathian sinah si loin khuachia sinah a si, timi hi. Cucaah nannih cu khuachia he nan i komh hi kan duh piak hna lo.

²¹ Bawipa hrai le khuachia hrai nan ding`i kho lai lo. Bawipa cabuai ta le khuachia cabuai ta zong nan eiṭi kho lai lo.

²² Asiloah Bawipa a hnah kan chuahter lai maw? Amahnâk in kan ṭhawng deuh maw?

²³ Thil vialte ka caah a thiang nain, santlaimi an si dih theng lo. Thil vialte ka caah an thiang dih nain ka caah ṭhatnâk an si dih theng lo.

²⁴ Mikip nih mah zawn lawng ruat loin midang ca ṭhatnâk ding kha an ruah deuh awk a si.

²⁵ Chawdawr i an zuarmi sa pauh cu chiaṭha hngalhnâk i dot-hlat theng lo in ei ko u,

²⁶ zeitintiah vawlei le a chung i a ummi vialte hi BAWIPA ta an si.

²⁷ Zumlotu nih rawl ei an in sawm i kal naduh ahcun chiaṭha hngalhnâk ruangah dot-hlat theng lo in an in pêkmi pauh cu ei ko.

²⁸ Asinain nan sinah, “Hihi raithawinâk i pêkmi a si tiah an ti ahcun, an chimtu hna le chiaṭha hngalhnâk ruangah khan ei hlah u. “Vawlei le a chung i a ummi vialte hi BAWIPA ta a si.

²⁹ Chiaṭha hngalhnâk timi hi nangmah leiah si loin midang chiaṭha hngalhnâk kha ka ti duhmi cu a si. Midang chiaṭha hngalhnâk nih ka zallonnâk cungah zeiruangahdah nawl a ngeih khawh lai?

³⁰ Lunglawm tein lawmhnâk bia zong ka chim i ka eimi kongah maw chimchiat ka ton lai?

³¹ Cucaah nan ei ah siseh, nan dinah siseh, nan tuahmi kipah Pathian sunparnâk ding lawng teah tuah u.

³² Judah siseh, Grik siseh, Pathian kawhhran siseh, an tluknâk dingah zeihmanh tuah hlah u,

³³ kei zong nih kaca miaknâk ding lawng ka kawl ballo. Mi tampi nih an santlaih pi i khamh an si khawh nâkhnga, zeizong vialte ah mi vialte lunglawmhter in kan um tawn.