1 KORIN 1 - Laibaibal Thiang (BSI)

¹ Paul, Pathian duhning in Jesuh Krih lamkaltu si dingah kawhmi le kan unau pa Sosthen nih,

² Korin khua i Pathian kawhhran, Krih Jesuh ah thleidanmi, mithiang si ding i kawhmi hna sinah le ramkip i kan Bawipa Jesuh Krih min kotu vialte sinah le, annih le kan nih sin zongah:

³ Kan Pa Pathian le Bawipa Jesuh Krih sinin zângfahnâk le daihnâk nan sinah um ko seh.

⁴ Krih Jesuh thawngin nan sinah Pathian nih zângfahnâk an pêk hna ruangah nan kongah Pathian sinah lawmhnâk bia kan chim tawn,

⁵ phuanmi le hngalhnâk vialte ah, Amah ah zeizong vialte ah rumter nan si.

⁶ Krih bia hngalhpinâk zong nanmah ah fehter in a um,

⁷ cuticun kan Bawipa Jesuh Krih â langhnâk kha hngak in, thilpêk lei ah chambau in nan um lo,

⁸ Amah nih kan Bawipa Jesuh Krih ni ah sawiawk um lo in nan um nâkhnga a dongh tiangin an fehter hna lai.

⁹ Pathian, a Fapa Jesuh Krih kan Bawipa he i hawikomhnâk i an luhtertu kha zumh awk tlâk a si.

¹⁰ Ule nau hna, kan Bawipa Jesuh Krih min in kan nawl hna, nan lakah i ṭhennâk um lo in, nan chimmi i khat sehlaw, ruahnâk le biakhiahnâk ah lungnge te le tlamtling te in hmunkhat ah nan i pehtlaih khawh nâkhnga.

¹¹ Zeitintiah ule nau hna, nan kong ka rak theih i nanmah chungah i el-hnialnâk a um lengmang tiah Khalawi chungkhar nih anka chimh.

¹² Hihi ka chim lai, nan i thawh i kei cu Paul bu ka si, kei cu Apollo bu ka si, kei cu Peter bu ka si, kei cu Krih bu ka si, nan ti ciomi hi.

¹³ Krih cu ṭhen in a um maw? Paul hi nan caah khenhchih a si maw? Asilo ah Paul min in baptisma nan ing maw?

¹⁴ Krispas le Gaisus dah ti lo cu ahohmanh baptisma ka pêk hna lo caah Pathian sinah lawmhnâk bia ka chim.

¹⁵ culoahcun, minih keimah min i baptisma a ingmi ah an in ruah sual hna lai.

¹⁶ Asi, Steven chungkhar tu cu baptisma ka pêk hna. Cu lo cu midang baptisma ka pêk hna ka hngal lo.

¹⁷ Zeitintiah Krih nih baptisma pêk awkah a ka thlah lo, thawngṭha bia chim dingah a ka thlah, fimnâk bia hmang i chim lo in, culoahcun Krih vailamtahnâk bia hi zeihmanh lo ah an canter sual lai.

¹⁸ Zeitintiah vailamtah biacah hi a tlau lio lengmang mi hna caah hruhbia men a si, asinain khamhlio lengmang mi hna kan nih caah cun Pathian ṭhawnnâk a si.

¹⁹ Zeitintiah, “Mifim fimnâk cu ka hrawh lai i mithiam hna thiamnâk zeihmanh lo ah ka canter lai,” tiah ṭial a si.

²⁰ Mifim cu khuazeiahdah a um? Cathiam cu khuazeiahdah a um? Hi vawlei i bia al thiam cu khuazeiahdah a um? Hi vawlei fimnâk hi Pathian nih hruhnâk ah a ruat lo maw?

²¹ Zeitintiah vawlei fimnâk nih Pathian a hngalh khawhlo hnu ah, Pathian fimnâk hmangin, hruhbia hmang i phungchimnâk a zumtu hna khamh an si kha Pathian â lawm deuh.

²² Zeitintiah Judah mi nih hmelchunhnâk an ngiat i Grik nih fimnâk lawnglawng an kawl tawn,

²³ kannih cu Krih khenhchihnâk kong kha kan chim, cucu Judah mi caah tluknâk, Grik mi caah hruh bia,

²⁴ asinain kawhmi hna caah cun, Judah he Grik he Krih cu Pathian ṭhawnnâk le Pathian fimnâk a si.

²⁵ Zeicatiah Pathian hruhnâk cu minungnâk in a fim deuh i Pathian derthawmnâk zong minung nâk in a ṭhawng deuh.

²⁶ Zeitintiah unau hna an kawhnâk hna hi ruat tuah u, minung tahnâk i mifim, mi ṭhawng, dirhmun a sângmi kawhmi lakah an tlawm ning hi.

²⁷ Pathian nih mifim hna ningzahter awkah hi vawlei hruh thil hna hi a thim tawn, vawlei thil i a ṭhawngmi mualpho ter dingin Pathian nih zeihmanh lo kha a thim tawn;

²⁸ cun vawlei thil i santlai lo le zeihmanh lo hna le thil um lomi tiangin Pathian nih a thim i a um ciami thil hna zeihmanh lo i canter a duh caah a si,

²⁹ cuticun ahohmanh Amah hmai ah an i porhhlaw kho lo.

³⁰ Nannih tu cu Amah thawngin Krih Jesuh ah nan um, Amah cu Pathian sinin kan ca fimnâk, dinnâk, thiannâk le tlanhnâk a si,

³¹ cuticun an ṭial bang khan, “Porhlawt a duhmi nih, BAWIPA lawnglawng i porhlawtpi seh.”