YOHANES GI NIGOM 5 - ALLAH NIHYET MEM TUNGWATU NYA

Ibindei cut mun di ntun dihyeisi dini him

¹ No di ningon jo kep bipia Yesus ne Nibou Ndig di teu tungwatu nya biyai niyaijo nijep biyok rin ne no dima Allah nimunggwom ri. No di ningon ngakei nicig ningon ngakei nicig nimunggwom bat nindigsi nya cem sindam.

² Gino ingon ngakei Allah bibit nicuk nyeti nya lene ma ikan tut bipia ingon ngakei Allah nimunggwom bat nya cem sindam.

³ Lewo ningon ngakei Allahti bindei ba, ibit nicuk nyeti nya sindam lene nicuk nyeti nya buhun tak nye bi.

⁴ Bikwop Allah nimunggwom bat nya yahagom igyai nisindemti mem ibindei cut mun di ntun dihyeisi dini him. Ibindei cut mun di ntun dihyeisi dini him tug hon ide niba ningon com Yesus Kristusti.

⁵ Tou ribindei cut mun di ntun dihyeisi dini him i? No di ningon jo kep bipia Yesus ne Allah Nipmot rin a.

Mun di bindo tut Yesus Kristus

⁶ No di srek kwei ei dihyeisi dini ne Yesus Kristus rin ba, Noni kwei yai nitur No ei minyeiti ba, ninggrom siber tug hon nimaisi cem. Noni kwei sut minyei he bi noro kwei sut minyei kin ninggrom. Allah Ninnei ngat gini bou niyai him bitri tut bipia hagom ne nijit rin lewo Noni ris bi sren.

⁷ Mun nyeng ningai di ingat gini bou igyai him bitri tut yo rinaha.

⁸ Allah Ninnei kin minyei kin ninggrom ba, hagom ce tut yam.

⁹ Nyeni ingon jo kep mun di tungwatu nya ingat bou igyai him bitri tut. Noro mun di Allah ngat bou niyai him bitri tut bon ninyeng dor njiriek bu. Mun di bon ninyeng dima rino mun di Allah ngat bou niyai him bitri tut Nipmot.

¹⁰ Gima rino no di ningon jo kep Allah Nipmot pwoi mun di Allah ngat bou niyai him bitri tut dima ei ningonti. Noro no di ningon jo kep Allah bi pai kep Noni bipia Noni ris. Noni pai nok lewo ningon jo kep mun di Allah ngat bou niyai him bitri tut Nipmot bi.

¹¹ Mun di Allah ngat bou niyai him bitri tut ndo bipia Noni yai niyaijo nijep dijo kikau binye tu ba, niyaijo nijep dima nibousi rino Nipmot.

¹² Ba, no di yai Nipmot ei ningonti yai niyaijo nijep tu. No di yai Allah Nipmot ei ningonti bi yai niyaijo nijep cem bi.

Ningginausi tut niyaijo nijep di jo kikau

¹³ Dipas kep srat dini bak je di jingon jo kep Allah Nipmot leu binhyepo jingon dorti tut bipia jiyai niyaijo nijep di jo kikau tu.

¹⁴ Ibrim ingkek ei Allah Noho bei lewo ingon dorti tut bipia Noni miap kep ighyet tirigi yahara Noni bit leu ningon kanti mem nye.

¹⁵ Noni miap kep ighyet tirigi yahara Noni. Ikan tut bipia gini ne nijit ri. Gima rino ikan tut bipia Noni mibirop binye bit leu nok yahara Noniti.

¹⁶ Gino jigom ngat nisut no di Kresten di bon sisar di bindei ba, nide niyaijo nijep di jo kikau srawir bi ne ma jingat nadi tindei noni apino Allah mitug niyaijo nijep hanyen binoni. Dipaisi dini bitut yo di ibon sisar di bindei ba, ide niyaijo nijep di jo kikau srawir bi nya. Noro sisar ninyeng gom bindei ba, niyaijo nijep di jo kikau pror hak leu tungwatu nya ba, israwir. Tut nadi di bitut sisar dima ne dipai bije tut bi.

¹⁷ Mun di tungwatu nya igyai tunggwei nya hagom ninyeng sisar. Noro sisar di bindei ba, israwir bi ninyeng hi nonaha.

¹⁸ Ingon dorti tut bipia Allah nimunggwom bat nya ibon kep sisar bi lewo Allah Nipmot nyohou yok ba, bit bon No Di Ba Nitok Bak Allah ngget yok kan bi.

¹⁹ Mbro nok gino No Di Ba Nitok Bak Allah ninyeng tak kep tungwatu dihyeisi dini yahagom lo, ingon dorti tut Allah di ninyeng tak kep nye.

²⁰ Ba, ingon dorti tut bipia Allah Nipmot kwei bibindei ingon ki leu binhyepo ikan tut Allah di nijit. Igyaijo nok gom kin Allah di nijit ba, igyaijo nok gom kin Nipmot Yesus Kristus cem. Noni ne Allah di nijit di bindei ba, igyai niyaijo nijep di jo kikau ri.

²¹ He dimunggwom bat jen, ma jimbres jenti leu kwar nya!