YOHANES GI NICAN 1 - ALLAH NIHYET MEM TUNGWATU NYA

Nibou mbusyamei gom pigo Sindig gom

¹ Srat dini leu da di nibou mbusyamei. Dipinak srat dini bak na di Sindig di Allah dimig na tu kin amunggwom bat nya cem lewo dingon ngakei jahagom nindig bibor. Ba, dangkom he bi noro yo di ingon dorti tut Allah di nijit cem yahagom ingon ngakei je,

² lewo nihyet di nijit ningat rin ei ingonti nogindini ba, kikau ug hon nohonti bi cem.

³ Handei kon ba, Icig Allah kin Nipmot Yesus Kristus isingat tut nye bingondut nye ba, ibiyai ingon jo nyahan. Handei kon ba, jimbun mun dima yok tug hon jingon srenti kin jingon ngakei yamti.

Nijit-jausi kin ningon ngakei yamti

⁴ Dingon llei bibor tirigi dimiap tut bipia amunggwom bat nya bihi igyai igbit Allah ningon kanti bit leu nok nicuk nyeti.

⁵ Gima rino na di Sindig e, ditigtai na bibor tut mun nyeng gom. Gi dipas tut dini ne nicukti di nijep rin bi. Noro dipas bram nicukti timiei di jimiap tut habiei ei nimbie him tu. Ningat ne ma yahagom ingon ngakei yam.

⁶ Ningon ngakei yamti ket ei nibit Allah nicuk nyeti. Nicuk nyeti di tibim habiei ei nimbie him pai bipia suar jahagom jingon ngakei yam kikau ug bipek jiyaijo ningwig honti.

⁷ Niris kep mun cig nya imang bibor ikieng kep dihyeisi bisrig tungwatu nyati. Itri tut bipia tirigi Yesus Kristus kwei ei dihyeisi dini ne Noni tungwatu nijit bi. No dima ne niris kep mun cig kin No Di Ba Nitok Bak Kristus cem ri.

⁸ Ma jingon sok kep jenti ser nhyema mun po nicom nahanggwap tut sar hanyen bi. Ma jibrim jingkek leu binhyepo jiyai jimuhup titut leu Allah.

⁹ No di krau kep Kristus nipingok nyeti bi noro krau tunggwei nipingokti niyaijo nok gom kin Allah bi. No di krau kep Kristus nipingok nyeti niyaijo nok gom kin Icig Allah kin Nipmot cem.

¹⁰ Gima rino gino no di krau kep Kristus nipingok nyeti bi kwei cem kep je lene ma jicigit noni kui ig bijipigo noni au.

¹¹ Lewo no di pigo noni bicom yam kin noni ei niyai munti di suwok nya.

Nibou mbusyamei kes nihyet hon

¹² Dipi bidipui kep bina tut mun nyeng mang bibor bu noro dingon hukti bipia dipas kep tut ei srat diniti bi. Diyok dingon mem nituti di dihwou cem kep na leu binhyepo simbrap bit yam tut lene gima mibindei ba, sillei ngwig ei singonti.

¹³ Asut sop gom di Allah dimig ei su nimunggwom bat nya cem ipigo na di Sindigya.