YESAYA 63 - ALLAH NIHYET MEM TUNGWATU NYA

tuhan mibindei timek ngkiai nya No di ya ser minu ndig mbrap

¹ “Tou rikwei leu minu ndig Bozra ei minu Edom i? Noni juk sinsun ngwoi di sieng kei bimbut sindem ba, mimbri kui ningkek bibor.” Da di dikwei dini ne tuhan rin ba, disindem mem gima diteu tungwatu nya bingwes ngun ba, dikwei tri tut nihyet nibindei timek siceusi nya.

tuhan mbrap No di ya ser minu ndig mbrap

² Na di tuhan e, nggon rino Ade sinsun ngwoi noyam kin no di kimut ba anggur ngat de sinsun i?

tuhan mbrap

³ “Dangkom ngat dikinyon ei bak di ikimut ba anggur ngat eisi lo, Ditde limwa nya hi kwei mpu Da bi. Diba Ditde nigga biborti bico kep ngkiai nya noyam kin no di co kep ba anggur ngat apino inggrom rus Ditde sinsun hagom bingwoi-ngwau a.

⁴ Dikos tut bipia tto bou mem nibirop hanyenti kin njap niteu ningwes ngunti mem Ditde limwa nya dem tu.

⁵ Dinggok yo di impu Da lo, dinga leu sut gi hi kwei mpu Da bi. Noro Ditde nisindem biborti mpu Da ba, Ditde nigga biborti kon tut Da.

⁶ Diba Ditde nigga biborti di cig-cai bico kep ngkiai nya ba, dibindei timek yok leu api disiber inggrom bingwig ug ei dihyeiti.”

Allah minjei mun di kei bak mben Israel

⁷ Miditri tut tuhan ningon ngakei nyeti bidinggei sut Noni tut niyai munti nya. Noni njei mun di kei nindig bibor bak Nide limwa nya lewo ningondut yokti kin ningon ngakei yokti ug hon nohonti bi sren.

⁸ tuhan pai “Jit, yo dini ne Ditde limwa nya ba, munggwom di ibindei di dingon pus tut yok bi ri.” Gima rino Noni teu yok bingwes ngun,

⁹ leu mun di buhun di cut igkep yok hagom. tuhan cuk malaikati hi kin no di ya hacan hi ndam yok bi noro Nonti kwek yok lewo ngondut yok ba, ningon nggriu sut yok. Noni nyohou yok ei nimbie him kikau kwei bipek njap dima kep.

¹⁰ Noro yaham imbuk kep Noni bibindei ba, ningon buhun tut yok. Gima rino Noni luei nitta binok ide siceu bu bikon pran bit yok.

¹¹ Mpe dima lene igyok ngon kep nijam timiei Musa po tuhan de awak pima leu api ihig yam ser “tuhan po bie tut Nide limwa nya ide nibou nya di imbut ei muk nikieti pima no ritou i? tuhan po kes ninnei ei Musa dip pima no ritou i?

¹² tuhan po ya tut Musa pima no ritou i? Lewo Noni ba ninda di sindem bibor bitot minyei ngwa dip ei yoho bei bibindei ba, tungwatu nya ikon ninyeng bijo ninno bijo kikau.

¹³ tuhan po bie tut yok tirigi imbut imig ei minyei jou pima ritou i? Mpe dima lene inok kuda di mbut sindem bibor ei iggum ndigsi di cut-cut nyen bi sren.”

¹⁴ tuhan buwak Nide limwa nya ug ei mpia di ibong kep inghuisi noyam kin gembala di jem nide sapi nya kep abris nghousi. Noni bie tut Nide limwa nya nok gima bibindei ba, tungwatu nya inggei sut ninyenga.

Mben Israel ide nadi nahara mem ningondut kin nimpu yoti

¹⁵ Na di tuhan di agwam anai ei Ade ig di kwes-kwau ba, kei-kau-kei cem ei gwamti e, ma ayok ayai kep nye. Angon ngakeisi kin mimbri di kui angkekti kin angon nemti kin angondutti no ritou i? Ma aba angha bak nye bu au.

¹⁶ Nani ne nyeni nicig ri. Nyende pung di nintun him di Abraham Yakub nya ikan tut nye bi. Noro Na di tuhan e, anok nyeni nicig ba, ateu nye biningwes ngun habiei ei nimbie him kikau kwei bipek ammani kep.

¹⁷ tuhan e, nggon rino asindui sut nye ba, nisrawir i? Nggon rino abindei ba, nyeni ningkek ndok apino nittin tut Na bu bi i? Ma akwei ba, angat rin bit nye hanyen bu lewo angon a tut Ade awak nya di inok Ade limwa nya drek dip gima aba Nakep nye nipou su.

¹⁸ Nggon rino asindui sut nyende siceu nya ba, ibindei timek Ade Ig lene ibimangkrei Ade nungug tou di kwes-kwau i?

¹⁹ Abibon nye tereu nok anyeng tak kep nye bininok Ade limwa nya bi sren.