YESAYA 62 - ALLAH NIHYET MEM TUNGWATU NYA

¹ Midimbrap tut minu ndig Yerusalem ninyeng. Midigwam nyahan bi drek dip Sion bibou Allah teu minu ndig dima biningwes ngun lene bindei timek nide siceu nya ba, gima noyam kin hyem njeng di piga mem mmun ug e.

² Minu ndig Yerusalem e, ngkiai nya yahagom mingat bou igyai him bipia abindei timek ade siceu nya yahagom. Nibou ndig nya yahagom mitou kep anyeng jeisi. Anyeng nijep miluei nitimiei hanyen bu ba, tuhan Nonti rino yai ninyeng nijep dima bina ba.

³ Ba, anok topi nibou ndig de di kei-kau ei tuhan nindati kin topi nibou ndig ninyeng tak kepti ei ade Allah nindati.

⁴ Tungwatu nya mijem anyeng Minu Ndig Di Ikes Bijo Ei Bu Bi kin Minu Prenti bu bi. Noro mijem anyeng Minu Ndig Di Allah Ngondut kin Minu Niwak Cam. Gima hagom nok lewo tuhan joi sut na ba, Noni dem kep nijjep mem ade minu.

⁵ No di pai tes na mijem na nok nitnem dem kep pinai pilei gom di wak sop gwam nitta pilei di ya kin pinai bigyo. Allah joi sut na dem kep pinai pilei gom di ngat ningwes ei nitnemti.

⁶ Dikes yo di igya ser minu ndig Yerusalem ei ngug tig nidip. Ba, bikwop mmun-njap dimo igigwam nyahan bi. Noro suar iwin kep Allah ningonti tut Nide nipreu ei mem yoti.

⁷ Ma isindui sut Noni bigwam nyahan au. Nok gima bibou Noni pui nihyet tut minu ndig Yerusalem hanyen bibindei ba, ninyeng di jei mbut bidem dihyei nisurti-nipekti ug e.

⁸ tuhan ba neheng bipreu ei mem yok. Noni miba Nide nisindemti biyai mun dima bipek kep. Noni pai “Midiyai jide gandum bak siceu nya ba, ngkiai nya midut ba anggur ngei di jicom jimuhup tut cem bu bi.

⁹ Noro je di jimbus gandum bijikos keyam mijiyem ningat ba, jibikon tuhan ninyeng a. Je di jipuk ba anggur ngat mijidut ningei ei mpia di jo bas hak di iba ngug tig bikrop ttai ei Ditde Ig yo.”

¹⁰ Timiei minu ndig Yerusalem jen e, jehei kak dimbou pmem nuhui bijidime kep puig mem yo di ingkwei hanyen kwei. Jibon simpak ndig ba, jinjei tig ug ei puig nghas leu lene jitin kendera nya bijitas leu binhyepo ngkiai nya yahagom mikan tut bipia,

¹¹ tuhan sok nihyet dini bak tungwatu bidem dihyei nisurti-nipekti bipai “Ma jipai bak timiei Sion nya ‘Jingat i! tuhan Niteu Ningwes Ngun Cig tau su! Yo di Noni kwek yok tu nya injei bit Noni.’ ”

¹² Tungwatu nya mijem inyeng ‘Limwa Di Ingon Kwes’ kin ‘Limwa Di tuhan Teu Yok Di Ingwes Ngun’ cem. Yoni mijem minu ndig Yerusalem ninyeng ‘Minu Ndig Di tuhan Ngondut kin Minu Ndig Di tuhan Kes Ei Bi’.