YESAYA 58 - ALLAH NIHYET MEM TUNGWATU NYA

Niyem njita bi mem nituti poi di nijit

¹ tuhan pai “Ma ambrua Ditde limwa nya tignam ba, ando ide sisar brei biyok!

² Ikuk yok biDa bikwop njap ba, ingon bisau sut dingon kanti nya tereu nok igyai mun di igbit ba, ingon gom tut dicuk yokti nya cem. Ipai ei yuhui him bipia illei sut gi ikuk yok biDa ba, ijoi sut gi ditri tut dicukti nya biyok.”

³ Ihig yam “Nggon rino nyeni igyem njita bi mem nituti poi gino tuhan tou kep nye bi i? Nggon rino iba ibou coi mem Noni gino Noni ngig niyai kep nye bi i?” tuhan buhup “Ningat ne tirigi jiyem njita bi mem nituti poi lene jibrim jingkek mem jide mun di bitut jenti bijico kep jide awak nya.

⁴ Tirigi jiyem njita bi mem nituti poi lene jibui yam ba, jibroi leu yam bijimbuk tut yam cem. Jikan bipia jiyai munti dima mibindei ba, dingig ditingou mem jihyet e?

⁵ Tirigi jiyem njita bi mem nituti poi lene jihwen bit jenti bijindun bou dem kep nok minta di nimeng hun ba, jidis sinsun kron bijigimahap atriem eisi bijibong dip. Jikan bipia niyem njita bi mem nituti poi dima ne nijit rin e? Jikan bipia dijoi sut jiyai munti dima e?

⁶ Noro niyem njita bi mem nituti poi di dingon llei sut rinok gini. Ma jico kep tungwatu nya ba, jipai kep yok ei nikei noho bei bu au. Lewo gima dem kep nok lante di biteu ikimam kin mun di buhun tak yok. Ma jikes yo di isima hukum mikuisi nya ba, imbut hak.

⁷ Ma jikwas njita hi tut yo di inggum nya bijicigit yo di ibong lis kui jide igya. Ma jiyai sinsun bak yo di inyeng tut sinsun hi bi nya bijingkek ndok tut jide bat nya au.

⁸ Leu api midisingat tut je noyam kin mpia nipriti di wam je apino jei bi lene jibokti nya jut hanyen. Midingat rin bit je biditeu je ba, jingwes ngun. Midiya srak ko hagau je bidiyon ttai je cem.

⁹ Mpe dino jingat nadi ne midibirop hanyen bije. Mpe dino jahara Da ne midibuhup jihyet hanyen. Gino jimbuk tut yam bijiba nitok biyam ba, jipai yam nghapti cem bu bi ba,

¹⁰ jikwas njita tut yo di inggum nya bijimpu yo di yuhui mbum nya leu api midibindei ba, nidinditi di nggai kep je minok mpia huk pijumti di nipigati com kei.

¹¹ Midibie tut je bidibindei ba, jingon llei bibor tirigi jingat rin ei iggum ndigsi. Midinyohou je leu binhyepo jinghuisi kwes bijiyai nisindemti. Mijinok beisi di minyei dem ba, ngat ningat di kei kin minyei bousi di pingge hanyen bi sren.

¹² Mijiwin jide minu di timek bingwig ei nigkumti bikei hanyen. Keret dihyeisi dini mipai sut je bipia yo dima ne mben di ikinding ngug tig hanyen bingot ide ig ei nigkumti hanyen ri.”

Yo di yahati tut Njap Nigwam Kep Ninghuisi mitug ndei mun di kei

¹³ tuhan pai “Ma jahati tut Njap Nigwam Kep Ninghuisi nok njap di kwes-kwau. Ma jinyohou dimig mun di bitut jenti mem njap dima au. Jibindei ba, njap dima bon ninyeng mem je. Ma jinggei sut tuhan de njap dima tug hon gi jimbut ei minu ting cem jiyai kep jide midyai nya cem jimbrap tut mun di ugwai-gwai nya cem au.

¹⁴ Tug hon nisinati dima lene mijiyai nillei lewo jibit dicuk jeti nya. Midibindei ba, tungwatu dihyeisi dini hagom ikon jinyenga. Mijibong kei jigwam kei ei minu po jide pung Yakub di jintun him pima ba nokep. Da di tuhan disimbot dat tu.”