YESAYA 56 - ALLAH NIHYET MEM TUNGWATU NYA

Ngkiai nya yahagom micoi Allah de limwa nya imangti

¹ tuhan pai bak Nide limwa nya “Ma jibon mun di igbit di dem igbit Ditde nicukti nya. Leu ariman bu ne midihwou teu je bijingwes ngun rin ba, dingon sren-srausi jo brei bou tungwatu nya yahagom igyai him.

² Dinjei mun di kei bak yo di ikrau kep Njap Nigwam Kep Ninghuisi di ibindei ba, map kui njap dimati bi. Midibibon yo di ibon mun di kinei bi nya nok gi kei.”

³ Suar ma ngkiai di ibicom yam bit Ditde limwa nya mipai “tuhan ce tut gima dikuk da biNoni bit Nide limwa nya bi au.” Suar ma no di ikwai nimmai joti leu su mikan “Dem mem gima dibicom yam bit nimpung tuhan de limwa nya bi lewo bit bon diyai munggwom di intun da him kan bi au.”

⁴ tuhan pai bak yo dima “Gino jikrau kep Njap Nigwam Kep Ninghuisi bijiba jingon gom bikrau kep Ditde nipreu ei mem jeti ba, jibon mun di biyai dingon di kei cem,

⁵ lene Ditde limwa nya migyok ngon kep jinyeng ei Ditde Ig cem ei ikieti cem ba, gima kei dor njiriek niyai munggwom pinai nya kin munggwom sop nya. Midibindei ba, jinyeng jo kikau. Ditde limwa nya mibbwe ser je bi sren.”

⁶ tuhan pai bak ngkiai nya di icoi bit tuhan de limwa nya imangti kin yo di ingon ngakei tuhan kin yo di ikuk yok biNoni kin yo di ikrau kep Njap Nigwam Kep Ninghuisi kin yo di iba ingon gom bikrau kep Nide gi preu ei mem yokti cem,

⁷ “Midibuwak je ug ei Sion di nok Ditde nungug di kwes-kwau bidiyai ningon di nggei-hi-nggei bije ei Ditde Ig di ibon midut nya eisi. Midijoi sut jide midut nindig mindhe-ndhe ei Ditde nimbar hum dokti cem leu api tungwatu nya itri tut bipia tuhan De Ig rinok gumihyep mem mben yahagom ingat nadi eisi.”

⁸ tuhan Di Ninyeng Jei Bibor di buwak mben Israel di ingkwei hanyen kwei leu ingkiaisi pai “Midibuwak nindigsi nya ba, iba yok bikum yo di idem yam ei su.”

tuhan kes hukum ei nibou mben Israel nya dip

⁹ tuhan cuk ngkiai nya bikwei ba, idem kep mindhe di ten mem gima ittem Nide limwa nya nok mun di igyem.

¹⁰ Noni pai “Nibou di ibie tut Ditde limwa nya ne nibou di igyai tu nya ri! Igikan tut mun nyeng hi bi cem. Idem kep nsien di bbwe di tai mun hi bi di bong he bimumpriem. Nibou dima yok ijoi sut gima ibong mai he!

¹¹ Idem kep nsien di duhwen mun di yem he lo, gima gi ndei ninggumti bi. Nibou dima yok ingon huk niti cem bi ba, ibon mun bit leu yonti ingon kanti bibikwop nok ba, iba yoho rok ningat di kei mem yonti he.

¹² Nibou ngwak sibui sut pes cig dima yok ipai ‘Jikwei bidut ba anggur ngei bindei nye kei ug e! Mun di igyai mem njap di hyep mikei dor njiriek mun di igyai mem njap di ammani!’ ”