YESAYA 55 - ALLAH NIHYET MEM TUNGWATU NYA

tuhan ningon nggriu sut Nide limwa nya

¹ tuhan pai “Jahagom di jinggobiau e, ma jikwei dut minyei di ditau ei mem je! Je di jima mitiei hi bi e, ma jikwei yai gandum mikuisi bijiyem ug! Ditin ei anggur ngei kin sapi do ngei tu ba, jikwei yai hi mikuisi bijidut ug!

² Nggon rino jiba jide mitiei bipek mun di jijoi sut bi i? Nggon rino jita jibou ei jide midyai di bindei ba, jingon kei bi nyati i? Ma jibit dicuk jeti nya apino mijiyem njita di kei bibor kei dor njiriek njita nindigsi nya hagom.

³ Ditde limwa jen, ma jintu kep dihyet bijikwei bit Da leu api midiyai niyaijo nijit bije. Midipreu ei mem je bidiyai ningon ngakeisi kin ningon gomti bijo ninno bijo kikau bije bit leu nok dipreu ei mem Daudti.

⁴ Dita noni nok nibou ndig cem nibou pran cem bidindo Ditde nisindemti bak ngkiai nya ei dihyeisi dini tug hon noni.

⁵ Mbro nok gino nipou ne ngkiai nya ikan tut je bi lo, tini bu ne tirigi jihig yok kwei lene yoni ibipbur bibrim imig kwei bigya joho bei. Da di tuhan ne jide Allah kin mben Israel ide Allah di kwes-kwau ri. Midibindei ba, mun dini yok mipek kep mem je. Midikon jinyeng ba, jei bibor.”

⁶ Ma jingkwei hanyen ndam tuhan lewo Noni bon nikwesti mem je ba, jingat nadi bak Noni lewo Noni dideu je.

⁷ Ma no di sibut kes hon ba, sibut bu bi. Ma noni luei ningonti tut niyai munti nya bikwei kuk no bak tuhan di ningon nggriu. Ma noni ngkwei hanyen ndam tuhan di ngondut noni. Lewo tuhan kos ser nide sisar.

⁸ tuhan pai “Dingon kanti nya noyam kin jingon kanti nya bi. Diyai munti nya cem noyam kin jiyai munti nya bi.

⁹ Dingon kanti nya jo nai dor njiriek jingon kanti nya. Diyai munti nya cem jo nai dor njiriek jiyai munti nya noyam kin mpia-bbed him di jo anai dor njiriek dihyeisi dini.

¹⁰ Dihyet nok biget di but kwei leu mpia-bbed him. Bit bon biget ngkwei hanyen kui ug ei mpia-bbed him kan bi noro prok bidem dihyei ninjek dip bibindei ba, dihyei nnum kei apino njita kioi hei bijei ba, bon ningan mem njita bou kin ningat di igyem cem.

¹¹ Nok gima cem tut Dihyet di disimbot dat nya mingkwei hanyen ndam Da mikui-kausi kan bi noro mingat ningat bit leu dingon kanti biyai midyai hagom bit leu nok dicukti.

¹² Mijiyai nillei tirigi jehei leu minu Babel. Ngkiai nya miba ingon di kwes kin je behei sut je. Mbigdip nya kin nungug tou nya migyai nillei ba, biei susti nya ittem inda.

¹³ Buom mehei luei nitigot-tigausi lene biei murad hei luei tigau nggig-nggwenti nya. Mun dini yok mindo bindo di mipror yon hanyen kan bi binok bindo di bindo tut niyok ngon kep Da di tuhan diyai munti nya cem.”