YESAYA 54 - ALLAH NIHYET MEM TUNGWATU NYA

Allah ningon ngakei mben Israel

¹ Minu ndig Yerusalem e, nipou ne apijet noro tini bu ne ayai nillei ba, aba angon di nggan-triot bipai doia. Lewo amunggwom bat nya imang bibor dor njiriek sop di nijjep kes ei bi nimunggwom bat nya imangti.

² Ma abindei ba, ade prak meng bres ba, aba nikuk binut nijeisi bu lene adat biei di sindem nya cem binddong kei bu!

³ Lewo ade minu mikum ei nibresti ei nite bei anda com kin anda prak. Ade limwa nya inyeng mitak kep ide dihyei ninda rom di mben hiter nya ipos leu na tu. Ba, yoni mibong kei migwam kei ei ide minu ndig nya di nogindini nok ha ngunti he pima.

⁴ Ma attin tut au. Hiter minim kep na ba, ningwes moom kep na bu bi. Angon miprion ser nijam di anok sop wak cam di nibou buwei kin nijam di apijet hon di angwes sigon.

⁵ Jide Nipai Tes Mun Cig mibon Nonti nok ajjep. Mben Israel ide Allah di kwes-kwau miteu na ba, angwes ngun. Ninyeng rino tuhan Di Sindem Bibor ba, ninyeng tak kep dihyeisi dini hagom.

⁶ Mben Israel e, jinok sop wak cam di ningon buhun bibor drek dip nijjep di kou noni. Noro Allah hig na hanyen ndam Noni bipai,

⁷ “Dikes na mem nituti poi he noro midiba dingon di mpung tut ningondut nati biya um na hanyen.

⁸ Dinghek na lai-lai de drek dip dingon di sibui sut na nindig bibor noro midingon ngakei na bu bijo ninno bijo kikau.” Nihyet dima tibim kwei leu Allah di teu na ba, angwes ngun nuhui him tu.

⁹ “Bit leu nok gi po dipreu ei mem Nuh pima bipia minyei misu buut kep dihyei ninjek dip bu bi sren. Dipreu ei mem nani nogindini bipia dingon misibui sut na ba, midicuug na bu bi sren.

¹⁰ Mbro nok gino mbigdip nya kin nungug tou nya ugwa-kwei bitti bingwig lo, midingon ngakei na bidingon kwes kin na bit leu nok dipreu ei mem nati bijo ninno bijo kikau.” Nihyet dima tibim kwei leu tuhan di ningon ngakei na nuhui him.

Minu ndig Yerusalem nijep

¹¹ tuhan pai “Na di minu ndig Yerusalem e, mun di buhun cut igkep na apino asindem bi cem hi gwam ser angon bi cem. Midiprion tig permata di nibok kak bibor nok atriti nya.

¹² Midiba tig delima bibon ig di bon ninggre di jo-jo yam dip anai ei ngug tig nuhuisi nya. Midiba tig baiduri sepah bibon dimbou pmem di ditu ei ngug tig dima. Midiba tig permata ninyeng hagom bibon ngug tig di bikrop ttai na.

¹³ Ade limwa nya yahagom minok munggwom di icoi pikor leu api dingginau yok. Yoni minyeng tut mun di bindei ba, ibong kei igwam kei.

¹⁴ Midiwin ade minu ei tig nikiou di ninyeng rino ningon sren-srausi dip ba, mun di cut igkep je kin yo di ico kep je mibong ei minu ting bibor.

¹⁵ Gino siceu hi hwen na lene midibiang nibuhunti bi lewo dicuk noni bi. Tungwa tou rino kon pran bit na mitimek bingwig.

¹⁶ Dipai tes tukan ngkimom di miep hum ba, bibon minggwen nya. Dipai tes tentara di krau minggwen dima biyai nimai bak tungwatu nya kan.

¹⁷ Noro bit bon minggwen di tukan nya ibon dima sindem mem gima tot na kan bi. Tirigi hi pai kep na ei nikei noho bei lene nihyet minok bu tan lewo ando bindo di bindo pia yai mun tunggwei bak. Midimbrap gau Ditde awak nya bidibindei ba, ihwen ide siceu nya bitimek.” tuhan simbot dat tu.