YESAYA 53 - ALLAH NIHYET MEM TUNGWATU NYA

¹ Tungwatu nya ibuhup “Tou riba ningon com mun di tibim ei nyeni itingou nsi i? Tou riningon dor niti tut tuhan ningon kanti tug hon mun di timon nye dini i?

² Lewo tuhan de awak dima noyam kin biei kioi di hei ei dihyei di ngoi-ngati bit leu tuhan ningon kanti mem noni. Awak dima niyai nggrop mbris kei ba, niimaisi kei bibor kei leu dima nyeni ingat ingwes ei noti bi.

³ Nyeni ighyet kinei sut noni biyoom nye leu noni. Noni yai niwei kin nidut biborti. Tungwatu nya iba ingha bak noni ba, nyeni cem ingon llei sut noni bi.

⁴ Noro noni tug ndei hukum ninghuisi wei biluei nye ba, tug ndei nidut di suar nyeni ibiang nibuhunti. Nyeni ikan bigya ninghuisi wei dima ne hukum di Allah kes ei noni dip ri.

⁵ Noro noni tug ndei nibok bimos kei drek dip nyeni ide sisar ba, tungwatu nya ibui noni binem-nnai drek dip ide mun di mbuk nya. Noni tug ndei hukum leu binhyepo biteu nye leu sisar biyai niyaijo nijep binye. Nyeni igyai inghuisi kwes hanyen tug hon nibokti di mos kei nya.

⁶ Nyeni yahagom inok domba di israwir nya ba, hi mbut nide hi mbut nide tu. Noro tuhan kes nyeni yahagom ide hukum ei noni dip.

⁷ Tungwatu nya iba imbuk bibon noni kinei bibor noro noni om ningon tut. Ibuwak noni nok ijem domba mem ibui bidigo ba, nok domba pmot di ikos ninta leu lo, hara bahap niji cem bi.

⁸ Ikat noni bibuwak noni ug ei nikei noho bei leu api nikei pai kep noni bikes hukum ei noni dip. Hi di ningon buhun tut mun di cut igkep noni bi. Noni mai biluei nyeni ide mben nya ide sisar.

⁹ Mbro nok gino noni bon sisar ba, ris ei tungwatu nya dip bi sren lo, itig bit yo di irom ndok nya kin yo di inyeng bibor nya ijui.”

¹⁰ tuhan pai ditde awak yai ninghuisi wei bit leu dingon kanti leu binhyepo nimaisi midem kep nok midut nibikos ser sisarti. Gima rino noni mingat nide nintun him yamti di bram yam nya bou niyai him lewo nide njap jei bibor. tuhan ningon kanti mipek kep tug hon noni.

¹¹ Gima rino tuhan pai “Niabiati Ditde awak dima yai ninghuisi wei leu su lene noni miyai nillei bu lewo kan bipia noni yai ninghuisi wei mikui-kausi bi. Ditde awak mibindei ba, dijoi sut noni drek dip gi noni yai tungwatu nya imang bibor ide hukum ei noni dip. Midikos ser ide sisar tug hon nide niyai munti dima.

¹² Noni kes niyaisi bihigom ei bitug ndei hukum ba, ninyeng tibim kin yo di imbuk bibor nya inyeng. Noni biang yo di imang bibor ide sisar bingat nadi leu binhyepo igyai nikos ser sisarti. Gima rino midinjei nide limwa nya imang bibor mikuisi bak noni ba, noni miyai hanjop nsi bit yo di inyeng jei nya.”